କତାର ବନ୍ଦ କଲା ଗ୍ୟାସ୍ ଉତ୍ପାଦନ; ବଢ଼ିପାରେ ସିଏନଜି ଦର

ମଧ୍ୟପ୍ରାଚ୍ୟରେ ଯୁଦ୍ଧ ଯୋଗୁ ଭାରତରେ ସିଏନଜି ଏବଂ ପିଏନଜି ଦର ବଢ଼ିପାରେ । ଇରାନର ଡ୍ରୋନ୍ ହମଲା ପରେ ଭାରତକୁ ଗ୍ୟାସ ଯୋଗାଉଥିବା ସର୍ବବୃହତ୍ ଦେଶ କତାର ଏହାର ଲିକ୍ୱିଫାଏଡ୍ ନାଚୁରାଲ ଗ୍ୟାସ ପ୍ଲାଣ୍ଟରେ ଉତ୍ପାଦନ ବନ୍ଦ କରିଦେଇଛି । ଏହାଦ୍ୱାରା ଭାରତ ଆସିବାକୁ ଥିବା ଜାହାଜଗୁଡ଼ିକ ଅଟକିଛି ଏବଂ ଘରୋଇ ବଜାରରେ ଗ୍ୟାସ ଯୋଗାଣ ୪୦ ପ୍ରତିଶତ ପର୍ଯ୍ୟନ୍ତ ହ୍ରାସ ପାଇଛି । ଭାରତ ଏହାର ଆବଶ୍ୟକତାର ୪୦ ପ୍ରତିଶତ ଏଲଏନଜି ଅର୍ଥାତ୍ ପ୍ରାୟ ୨.୭ କୋଟି ଟନ୍ କତାରରୁ ଆମଦାନି କରିଥାଏ । ଭାରତ ପାଇଁ ସବୁଠାରୁ ବଡ଼ ଆହ୍ୱାନ ହେଉଛି ‘ହୋର୍ମୁଜ’ ଜଳପଥ ବନ୍ଦ ହେବା । ଏହି ବାଟ ଦେଇ କତାର ଏବଂ ୟୁଏଇ ଭଳି ଦେଶ ନିଜ ନିଜର ତେଲ ଏବଂ ଗ୍ୟାସ ରପ୍ତାନି କରିଥାନ୍ତି । ଇରାନ ଏବଂ ଇସ୍ରାଏଲ ଯୁଦ୍ଧ ଯୋଗୁ ଏହି ରୁଟ୍ ଏବେ ସୁରକ୍ଷିତ ନାହିଁ । ୨୮ ଫେବ୍ରୁଆରୀରେ ଏହି ମାର୍ଗ ଦେଇ ୯୧ ଜାହାଜ ଅତିକ୍ରମ କରୁଥିଲେ, ଯାହା ଏବେ ହ୍ରାସ ପାଇ ୨୬ ହୋଇଯାଇଛି ।