Top 30 news
1
ଏଲଏସି ପାଖ ଦେଇ ଯିବ ଚୀନର ରେଳ ନେଟୱର୍କ, ଭାରତ ପାଇଁ ଚିନ୍ତା
ବାସ୍ତବିକ ସୀମା ରେଖା ବା ଏଲଏସି ପାଖ ଦେଇ ଚୀନ୍ ବିଛାଇବ ରେଳ ଲାଇନ । ତିବ୍ଦତ ସହ ଚୀନର ସିନଜିଆଙ୍ଗ ପ୍ରଦେଶକୁ ଏହି ରେଳ ଲାଇନ ଯୋଡ଼ିବ । ଏଥିପାଇଁ ୧୩ ଶହ ଆମେରିକୀୟ ଡଲାର ନିବେଶରେ ଏକ ସ୍ୱତନ୍ତ୍ର କମ୍ପାନି ଗଠନ କରାଯାଇଛି । ଏହା ଦେଶର ସର୍ବବୃହତ ରେଳ ଗ୍ରୁପ୍ ଅଧୀନରେ ରହିଛି । ଚୀନର ଲକ୍ଷ୍ୟ ୨୦୩୫ ମସିହା ସୁଦ୍ଧା ଲାସାକୁ କେନ୍ଦ୍ର କରି ଦେଶର ଚାରି ଦିଗରେ ପ୍ରାୟ ୫ ହଜାର କିଲୋମିଟରର ରେଳ ନେଟୱର୍କ ବିଛାଇବା । ଏଥିପାଇଁ ମୋଟ ଖର୍ଚ୍ଚ ୪୫ ଶହ କୋଟି ଆମେରିକୀୟ ଡଲାରରୁ ଅଧିକ ରହିବ ବୋଲି ଆକଳନ କରାଯାଇଛି । ଏହି ନେଟୱର୍କ ବିବାଦୀୟ ଅକ୍ସାଇ ଚୀନ୍ ମଧ୍ୟ ଦେଇ ଯିବ । ୧୯୬୨ ଯୁଦ୍ଧରେ ଅକ୍ସାଇ ଚୀନ୍ ଭାରତ-ଚୀନ୍ ବିବାଦର ଏକ କାରଣ ମଧ୍ୟ ଥିଲା ।
…
2.
ଗାଜା ନରସଂହାର ପ୍ରସଙ୍ଗ ଉଠାଇଲେ ପ୍ରିୟଙ୍କା ଗାନ୍ଧୀ, ଜବାବ ଦେଲେ ଇସ୍ରାଏଲ ରାଷ୍ଟ୍ରଦୂତ
ଗାଜାରେ ଇସ୍ରାଏଲ ଆକ୍ରମଣରେ ଦୁଇ ଦିନ ତଳେ ଅଲଜଜିରା ନୁ୍ୟଜ ଚାନେଲର ୫ ଜଣ ସାମ୍ବାଦିକଙ୍କ ମୃତୁ୍ୟ ହୋଇଥିଲା । ଏହାକୁ ଲଜ୍ଜାଜନକ ବୋଲି ଦର୍ଶାଇ ସାଂସଦ ପ୍ରିୟଙ୍କା ଗାନ୍ଧୀ ସୋସିଆଲ ମିଡିଆରେ ପୋଷ୍ଟ କରିଥିଲେ । ସେ ଲେଖିଥିଲେ, ଇସ୍ରାଏଲ ଆକ୍ରମଣରେ ଗାଜାରେ ୬୦ ହଜାର ଲୋକଙ୍କ ମୃତୁ୍ୟ ହେଲାଣି । ଏହା ମଧ୍ୟରେ ଅଛନ୍ତି ୧୮ ହଜାର ୪୩୦ ଛୋଟ ପିଲା । ଇସ୍ରାଏଲର ଏ ନରସଂହାର ଦେଖି ଭାରତ ସରକାର ନିରବ ରହିବା ଦୁଃଖଦାୟକ । ଇସ୍ରାଏଲ ରାଷ୍ଟ୍ରଦୂତ ରେୟୁୱେନ ଆଜାର ଏହାର ଜବାବରେ କହିଛନ୍ତି, ହମାସର ହିସାବକୁ ବିଶ୍ୱାସ କରନ୍ତୁନି । ଇସ୍ରାଏଲ ୨୫ ହଜାରରୁ ଅଧିକ ହମାସ ଆତଙ୍କୀଙ୍କୁ ବି ମାରିଛି । ସେମାନେ ସାଧାରଣ ଲୋକଙ୍କ ପଛରେ ଲୁଚୁଛନ୍ତି । ଇସ୍ରାଏଲ ଗାଜାକୁ ୨ ମିଲିଅନ ଟନ ଖାଦ୍ୟ ପଠାଇଛି, ତାହାକୁ ହମାସ ଲୁଟି ନେଇଛି । ୫୦ ବର୍ଷ ମଧ୍ୟରେ ଗାଜାରେ ଜନସଂଖ୍ୟା ୪୫୦% ବଢ଼ିଛି । କୌଣସି ନରସଂହାର ହୋଇନି ।
…
3.
ଏସଆଇଆର ବିରୋଧରେ ସଂସଦ ବାହାରେ ସାଂସଦଙ୍କ ବିକ୍ଷୋଭ, ପିନ୍ଧିଲେ ମିନ୍ତା ଦେବୀ ଟି-ସାର୍ଟ
ବିହାରରେ ଚାଲିଥିବା ସ୍ୱତନ୍ତ୍ର ଭୋଟର ତାଲିକା ସଂଶୋଧନ ବା ଏସଆଇଆର ବିରୋଧରେ ମଙ୍ଗଳବାର ସାଂସଦ ମାନେ ବିକ୍ଷୋଭ କରିଛନ୍ତି । ସଂସଦର ମକର ଦ୍ୱାର ନିକଟରେ ଏହି ବିକ୍ଷୋଭ ହୋଇଥିଲା । ବିକ୍ଷୋଭ ସମୟରେ ସାଂସଦମାନେ ମିନ୍ତା ଦେବୀ ଟି-ସାର୍ଟ ପିନ୍ଧି ଥିଲେ । ଖେଶଦ୍ ପ୍ରିୟଙ୍କା ଗାନ୍ଧୀ ମଧ୍ୟ ଏପରି ଟି-ସାର୍ଟ ପିନ୍ଧିଥିଲେ । ମିନ୍ତା ଦେବୀ ଜଣେ ମହିଳା, ଯାହାର ବୟସ ୧୨୪ ବର୍ଷ ବୋଲି ଭୋଟର ତାଲିକାରେ କମିଶନ ଦର୍ଶାଇଛନ୍ତି । ତାଙ୍କ ନାମ ପ୍ରଥମ ଥର ପାଇଁ ସାମିଲ ହୋଇଥିବା ନୂତନ ଭୋଟରଙ୍କ ତାଲିକାରେ ରହିଛି । ନିକଟରେ ରାହୁଲ ଗାନ୍ଧୀ ନିର୍ବାଚନ କମିଶନଙ୍କ ଭୋଟ ଚୋରି ପ୍ରସଙ୍ଗରେ କରିଥିବା ସାମ୍ବାଦିକ ସମ୍ମିଳନୀରେ ମିନ୍ତା ଦେବୀଙ୍କ ଉଦାହରଣ ଉଲ୍ଲେଖ କରିଥିଲେ । ଏହା ଏବେ ବିରୋଧୀଙ୍କ ପାଇଁ ଭଲ ଖୋରାକ୍ ଯୋଗାଇଛି ।
…
4.
ଭୋଟର ତାଲିକା ସଂଶୋଧନ ପ୍ରସଙ୍ଗ; ମମତା ସରକାର-ନିର୍ବାଚନ କମିଶନ ମୁହାଁମୁହିଁ
ପଶ୍ଚିମବଙ୍ଗର ଭୋଟର ତାଲିକା ସଂଶୋଧନକୁ ନେଇ ଆରମ୍ଭ ହୋଇଛି ବିବାଦ । ନିର୍ବାଚନ କମିଶନ ଏବଂ ମମତା ବାନର୍ଜୀ ସରକାର ମୁହାଁମୁହିଁ ହୋଇଛନ୍ତି । ସଂଶୋଧନ କାର୍ଯ୍ୟରେ ସହଯୋଗ କରୁନଥିବା ୫ ଜଣ ଅଧିକାରୀଙ୍କୁ ତୁରନ୍ତ ନିଲମ୍ବିତ କରି ଏଫଆଇଆର ଦେବାକୁ କମିଶନ ନିଦେ୍ର୍ଦଶ ଦେଇଥିଲେ । କିନ୍ତୁ ରାଜ୍ୟ ସରକାର ଏହାକୁ ମାନି ନାହାନ୍ତି । ୨ ଜଣ ଅଧିକାରୀଙ୍କୁ ସଂଶୋଧନ କାର୍ଯ୍ୟରୁ ହଟାଇ ନିଆଯାଇଥିବା ବେଳେ ୩ ଜଣ ପୂର୍ବବତ୍ ରହିଛନ୍ତି । କମିଶନଙ୍କ ନିଦେ୍ର୍ଦଶ ପାଳନ କରାଗଲେ, ରାଜ୍ୟର ପ୍ରଶାସନିକ ମହଲରେ ନକାରାତ୍ମକ ପ୍ରଭାବ ପଡ଼ିବ ବୋଲି ରାଜ୍ୟ ସରକାର କହିଛନ୍ତି । ତେବେ ନିଦେ୍ର୍ଦଶ କାହିଁକି ପାଳନ କରାଯାଇନି, ଏ ନେଇ ଉତ୍ତର ରଖିବାକୁ ମୁଖ୍ୟ ଶାସନ ସଚିବ ମନୋଜ ପନ୍ତଙ୍କୁ ଆଜି ଅପରାହ୍ଣ ୫ଟା ସୁଦ୍ଧା ଦିଲ୍ଲୀରେ ହାଜର ହେବାକୁ କମିଶନ ତଲବ କରିଛନ୍ତି ।
…
5.
ବମ୍ବେ ହାଇକୋର୍ଟଙ୍କ ଉକ୍ତି; ଆଧାର, ପାନ , ଭୋଟର ପରିଚୟ ପତ୍ର ନାଗରିକତ୍ୱର ପ୍ରମାଣ ନୁହେଁ
ଜଣଙ୍କ ପାଖରେ ଆଧାର କାଡ, ପାନ କାର୍ଡ, ଭୋଟର ପରିଚୟପତ୍ର ଏବଂ ପାସପୋର୍ଟ ଥାଇପାରେ । ଏହାର ଅର୍ଥ ନୁହେଁ ସେ ଭାରତର ନାଗରିକ । ଏସବୁ କେବଳ ପରିଚୟପତ୍ର ଭାବେ ଗ୍ରହଣୀୟ, ନାଗରିକତ୍ୱ ପାଇଁ ନୁହେଁ । ବମ୍ବେ ହାଇକୋର୍ଟ ଏକ ମାମଲାର ଶୁଣାଣି କରି ଏହା କହିଛନ୍ତି । ବାବୁ ଅବଦୁଲ ରଉଫ ସର୍ଦ୍ଦାର ନାମକ ଜଣେ ବାଂଲା ଅନୁପ୍ରବେଶକାରୀଙ୍କ ଜାମିନ ଆବେଦନ ନାକଚ କରି କୋର୍ଟ ଏହା କହିଛନ୍ତି । କୋର୍ଟ ସ୍ପଷ୍ଟ କରିଛନ୍ତି, ନାଗରିକତ୍ୱ ଆଇନ-୧୯୫୫ ସ୍ପଷ୍ଟ ଭାବେ ଉଲ୍ଲେଖ କରିଛି କାହାକୁ ନାଗରିକ ଭାବେ ବିବେଚନା କରାଯାଇପାରିବ । କିନ୍ତୁ କିଛି ପରିଚୟପତ୍ରର ଦସ୍ତାବିଜକୁ ଜାଲି କରି ସଂଗ୍ରହ କରିଦେଲେ ଜଣେ ଭାରତର ନାଗରିକ ଭାବେ ଗ୍ରହଣୀୟ ନୁହେଁ ।
..
6.
ଟ୍ରମ୍ପଙ୍କ ବିବୃତି; ଭାରତ ଉପରେ ଶୁଳ୍କ; ରୁଷ ପାଇଁ ଝଟକା
ଭାରତ ଉପରେ ଲଗାଯାଇଥିବା ଅତିରିକ୍ତ ୨୫ ପ୍ରତିଶତ ଶୁଳ୍କ ରୁଷ ପାଇଁ ବଡ଼ ଝଟକା । ଏହି ଶୁଳ୍କ ରୁଷର ଅର୍ଥ ବ୍ୟବସ୍ଥାକୁ ସମ୍ପୂର୍ଣ୍ଣ ପ୍ରଭାବିତ କରିଛି । ରୁଷ ରାଷ୍ଟ୍ରପତି ପୁତିନଙ୍କ ସହ ଆଗାମୀ ବୈଠକ ପୂର୍ବରୁ ଆମେରିକା ରାଷ୍ଟ୍ରପତି ଟ୍ରମ୍ପ ଏହି ମନ୍ତବ୍ୟ ଦେଇଛନ୍ତି । ସେ ଦାବି କରିଛନ୍ତି, ‘ଏବେ ରୁଷ ଅର୍ଥନୀତି ମାନ୍ଦା ହୋଇଯାଇଛି । ବୈଶ୍ୱିକ ଚାପ ଏବଂ ଅନ୍ୟ ଦେଶ ଉପରେ ଆମେରିକା ଲଗାଇଥିବା ଶୁଳ୍କ ଯୋଗୁ ରୁଷର ବଡ଼ କ୍ଷତି ହୋଇଛି । ସମୟ ଆସିଛି ଏବେ ରୁଷ ନିଜ ଦେଶ ଗଠନକୁ ପ୍ରାଧାନ୍ୟ ଦେବା ଉଚିତ ।’ ଟ୍ରମ୍ପ ଚେତାବନୀ ଦେଇ କହିଛନ୍ତି, ରୁଷଠାରୁ ସର୍ବାଧିକ ତୈଳ କ୍ରୟ କରୁଥିବା ଚୀନ ଓ ଦ୍ୱିତୀୟ ବୃହତ୍ତମ କ୍ରେତା ଭାରତ ଉପରେ ଆମେରିକା ୫୦ ପ୍ରତିଶତ ଶୁଳ୍କ ଲଗାଇବ । ସ୍ଥିତି ନ ସୁଧୁରିଲେ ଆଗକୁ ଆହୁରି ବଡ଼ ପଦକ୍ଷେପ ନିଆଯିବ ।’
…
7.
ଜଷ୍ଟିସ ବର୍ମାଙ୍କ ବିରୋଧରେ ମହାଭିଯୋଗକୁ ଲୋକସଭାରେ ମଞ୍ଜୁରୀ
ଘରୁ ନଗଦ ଟଙ୍କା ଜବତ ମାମଲାରେ ବିବାଦରେ ଫଶିଥିବା ଆହ୍ଲାବାଦ ହାଇକୋର୍ଟ ବିଚାରପତି ଯଶୱନ୍ତ ବର୍ମାଙ୍କ ସମସ୍ୟା ବଢ଼ିବାରେ ଲାଗିଛି । ତାଙ୍କ ବିରୋଧରେ ‘ମହାଭିଯୋଗ’ ପ୍ରସ୍ତାବକୁ ଲୋକସଭା ବାଚସ୍ପତି ଓମ ବିର୍ଲା ମଙ୍ଗଳବାର ମଞ୍ଜୁରୀ ଦେଇଛନ୍ତି । ଏଥିପାଇଁ ଶାସକ ଓ ବିରୋଧୀ ଦଳର ୧୪୬ ସାଂସଦ ପ୍ରସ୍ତାବ ଦେଇଥିଲେ । ଏହି ପ୍ରସ୍ତାବରେ ଜଷ୍ଟିସ ବର୍ମାଙ୍କୁ ହଟାଇବାକୁ ଦାବି କରାଯାଇଥିବା ବାଚସ୍ପତି କହିଛନ୍ତି । ସେ ମାମଲାର ଯାଞ୍ଚ ପାଇଁ ୩ ସଦସ୍ୟ ବିଶିଷ୍ଟ କମିଟି ଗଠନ କରିଛନ୍ତି । ଏଥିରେ ସୁପ୍ରିମ କୋର୍ଟ ଓ ହାଇକୋର୍ଟର ଜଣେ ଲେଖାଏ ବିଚାରପତି ଏବଂ ଅନ୍ୟ ଜଣେ ଆଇନ ବିଶେଷଜ୍ଞ ସାମିଲ ଅଛନ୍ତି । ଏହି ଯାଞ୍ଚ ରିପୋର୍ଟ ଆସିବା ପର୍ଯ୍ୟନ୍ତ ‘ମହାଭିଯୋଗ’ ପ୍ରସ୍ତାବକୁ ସ୍ଥଗିତ ରଖାଯାଇଛି ।
…
8.
ଭାରତୀୟ କୂଟନୀତିଜ୍ଞଙ୍କ ଘରକୁ ଗ୍ୟାସ ଓ ପାଣି ଯୋଗାଣ ବନ୍ଦ କଲା ପାକିସ୍ତାନ
ଭାରତର ଆତଙ୍କବାଦ ବିରୋଧୀ କାର୍ଯ୍ୟାନୁଷ୍ଠାନରେ ଭୟଭୀତ ହୋଇପଡ଼ିଛି ପାକିସ୍ତାନ । ଏହି ଦେଶ ହଡ଼ବଡ଼େଇ ଇସଲାମାବାଦରେ ମୁତୟନ ଭାରତୀୟ ଦୂତାବାସର କୂଟନୀତୀଜ୍ଞଙ୍କ ଘରକୁ ପାଣି, ଗ୍ୟାସ ଏବଂ ଖବରକାଗଜ ଯୋଗାଣ ବନ୍ଦ କରିଦେଇଛି । ଏହା ବ୍ୟତୀତ କୂଟନୀତିଜ୍ଞଙ୍କୁ ଗ୍ୟାସ ସିଲିଣ୍ଡର ନ ଦେବାକୁ ସ୍ଥାନୀୟ ଯୋଗାଣକାରୀଙ୍କୁ ନିଦେ୍ର୍ଦଶ ଦେଇଛି । ‘ଅପରେସନ ସିନ୍ଦୁର’ ପରେ ପ୍ରତିଶୋଧ ପରାୟଣ ହୋଇ ଗୁଇନ୍ଦା ଏଜେନ୍ସି ଆଇଏସଆଇର ଇଙ୍ଗିତରେ ପାକିସ୍ତାନ ଏହି ପଦକ୍ଷେପ ନେଇଛି । ଏହାର ଜବାବରେ ଭାରତ ମଧ୍ୟ ସମାନ ପଦକ୍ଷେପ ନେଇଛି । ନୂଆଦିଲ୍ଲୀରେ ମୁତୟନ ପାକିସ୍ତାନ କୂଟନୀତିଜ୍ଞଙ୍କ ଘରକୁ ଖବରକାଗଜ ଯୋଗାଣ ବନ୍ଦ କରିଦେଇଛି ।
…
9.
ବଲୁଚି ଲିବରେସନ ଆର୍ମିକୁ ଆତଙ୍କବାଦୀ ସଂଗଠନ ଘୋଷଣା କଲା ଆମେରିକା
ପାକିସ୍ତାନ ସେନାମୁଖ୍ୟ ଅସୀମ ମୁନିର ଏବେ ଆମେରିକା ଗସ୍ତରେ ଅଛନ୍ତି । ଏପରି ସମୟରେ ନିଜ ପୁରୁଣା ସହଯୋଗୀ ପାକିସ୍ତାନକୁ ଖୁସି କରିବା ପାଇଁ ଟ୍ରମ୍ପ ସରକାର ଗୋଟି ଚାଳନା କରିଛନ୍ତି । ଭାରତକୁ ଚିଡ଼ାଇ ଇସଲାମାବାଦକୁ ପୁଣି ସମର୍ଥନ ଦେଇଛନ୍ତି । ବଲୁଚି ଲିବରେସନ ଆର୍ମି ଓ ଏହାର ସହଯୋଗୀ ସଂଗଠନ ମାଜିଦ ବ୍ରିଗେଡକୁ ଟ୍ରମ୍ପ ଆତଙ୍କବାଦୀ ଗୋଷ୍ଠୀ ଘୋଷଣା କରିଛି । ଏମାନେ ପାକିସ୍ତାନ ସେନା ଓ ସରକାର ପାଇଁ ମୁଣ୍ଡବିନ୍ଧା ପାଲଟଛନ୍ତି । ଆମେରିକା ବିଦେଶ ମନ୍ତ୍ରୀ ମାର୍କ ରୁବିଓ ଏହି ସୂଚନା ଦେଇଛନ୍ତି । ବଲୁଚି ଲିବରେସନ ଆର୍ମି ୨୦୨୪ରେ କରାଚି ବିମାନ ବନ୍ଦର ନିକଟରେ ଏବଂ ଗ୍ୱାଦର ବନ୍ଦରରେ ଆତ୍ମଘାତୀ ଆକ୍ରମଣ କରିଥିଲା ।
…
10.
ଚୀନ ଉପରେ ଅତିରିକ୍ତ ଶୁଳ୍କକୁ ପୁଣି ୯୦ ଦିନ ଘୁଞ୍ଚାଇଲା ଆମେରିକା
ଡୋନାଲ୍ଡ ଟ୍ରମ୍ପ ପୁଣି ନିଜ ନିଷ୍ପତ୍ତିକୁ ଅଟକାଇଛନ୍ତି । ଚୀନ ଉପରେ ଲଗାଇଥିବା ଅତିରିକ୍ତ ଶୁଳ୍କକୁ ପୁଣି ୯୦ ଦିନ ପାଇଁ ଘୁଞ୍ଚାଇ ଦେଇଛନ୍ତି । ଏହି ଶୁଳ୍କ ସମୟ ସୀମାକୁ ନଭେମ୍ବର ୯ ପର୍ଯ୍ୟନ୍ତ ବଢ଼ାଇଛନ୍ତି । ଏଥିପୂର୍ବରୁ ମେ ୧୧ ତାରିଖରେ ଜେନେଭାରେ ଆମେରିକା ଓ ଚୀନ ମଧ୍ୟରେ ବାଣିଜ୍ୟ ଚୁକ୍ତି ସ୍ୱାକ୍ଷର ହୋଇଥିଲା । ଏଥିରେ ଶୁଳ୍କ ବୃଦ୍ଧି ନିଷ୍ପତ୍ତିକୁ ୯୦ ଦିନ ଘୁଞ୍ଚାଇବା ପାଇଁ ସହମତି ପ୍ରକାଶ ପାଇଥିଲା । ଆମେରିକା ଏବେ ଚୀନ ଉପରେ ଭାରତଠାରୁ କମ୍ ମାତ୍ର ୩୦ ପ୍ରତିଶତ ଶୁଳ୍କ ଲଗାଇଛି । ଉଲ୍ଲେଖଯୋଗ୍ୟ, ପୂର୍ବରୁ ଆମେରିକା ଓ ଚୀନ ମଧ୍ୟରେ ଦୀର୍ଘଦିନ ପର୍ଯ୍ୟନ୍ତ ଶୁଳ୍କ ଯୁଦ୍ଧ ଚାଲିଥିଲା । ବେଜିଂ ଉପରେ ୨୪୫ ପ୍ରତିଶତ ପର୍ଯ୍ୟନ୍ତ ଶୁଳ୍କ ଲଗାଇବାକୁ ଟ୍ରମ୍ପ ଧମକ ଦେଇଥିଲେ । ଏହାର ଜବାବରେ ଚୀନ ୧୨୫ ପ୍ରତିଶତ ଶୁଳ୍କ ଲଗାଇବାକୁ କହିଥିଲା ।
…
11.
ଆଉ ପ୍ରତିଷ୍ଠା ହେବନି ଧରାଲି ଗ୍ରାମ, ସୁରକ୍ଷିତ ସ୍ଥାନକୁ ହେବ ସ୍ଥାନାନ୍ତର
ଉତ୍ତରକାଶୀରେ ବାଦଲ ଫଟା ବର୍ଷା ଯୋଗୁ ଆସିଥିବା ଭୟଙ୍କର ବିପର୍ଯ୍ୟୟରେ ଧରାଲି ଗ୍ରାମ ଧ୍ୱଂସ ହୋଇଯାଇଛି । ଏବେ ଏହି ଗ୍ରାମକୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯିବ । ନଦୀ କୂଳରେ ଏବଂ ଭୂସ୍ଖଳନ ହେଉଥିବା ସମ୍ବେଦନଶୀଳ ଅଞ୍ଚଳରେ କୌଣସି ନୂଆ ନିର୍ମାଣ କାର୍ଯ୍ୟ ନ କରିବାକୁ ଉତ୍ତରାଖଣ୍ଡ ସରକାର ନିଷ୍ପତ୍ତି ନେଇଛନ୍ତି । ଏଭଳି ଅଞ୍ଚଳରେ ଥିବା ଅନ୍ୟ ଗ୍ରାମଗୁଡ଼ିକୁ ମଧ୍ୟ ସ୍ଥାନାନ୍ତର କରାଯିବ । ପ୍ରକାଶଯୋଗ୍ୟ, କେବଳ ଗତ ୧୦ ବର୍ଷ ମଧ୍ୟରେ ଧରାଲି ଅଞ୍ଚଳରେ ୩ ବଡ଼ ବିପର୍ଯ୍ୟୟ ଆସି ୩ଥର ଗ୍ରାମ ଧ୍ୱଂସ କରିଦେଇଛି । ମାତ୍ର ପ୍ରତିଥର ସ୍ଥାନୀୟ ଅଧିବାସୀ ନୂଆ କୋଠା ନିର୍ମାଣ କରିଥାନ୍ତି । ନିକଟରେ ଘଟିଥିବା ଏହି ବିପର୍ଯ୍ୟୟକୁ ୭ ଦିନ ବିତିଥିଲେ ମଧ୍ୟ ଏପର୍ଯ୍ୟନ୍ତ ଧରାଲି ଗ୍ରାମରେ ଲକ୍ଷ ଲକ୍ଷ ଟନ ଅବଶେଷ ଗଦା ହୋଇରହିଛି । ୪୫ରୁ ଅଧିକ ଲୋକ ଏବେବି ନିଖୋଜ ରହିଛନ୍ତି ।
…
12.
କାନାଡା ବିରୋଧୀ ଦଳଙ୍କ ଦାବି; ଲରେନ୍ସ ବିଷ୍ଣୋଇ ଗ୍ୟାଙ୍ଗକୁ ଆତଙ୍କବାଦୀ ଘୋଷଣା କର
ଲରେନ୍ସ ବିଷ୍ଣୋଇ ଗ୍ୟାଙ୍ଗକୁ ଆତଙ୍କବାଦୀ ସଂଗଠନ ଘୋଷଣା କରିବା ପାଇଁ କାନାଡା ବିରୋଧୀ ଦଳ କଞ୍ଜରଭେଟିଭ ପାର୍ଟି ସରକାରଙ୍କ ନିକଟରେ ଦାବି କରିଛି । କାନାଡାର ବିଭିନ୍ନ ଅଞ୍ଚଳରେ ଏସିଆ ଲୋକଙ୍କୁ ଧମକ ଦେଇ ବଟି ଆଦାୟ ଓ ହିଂସା ମାମଲା ସାମ୍ନାକୁ ଆସିବା ପରେ ବିରୋଧୀ ଦଳ ପ୍ରଧାନମନ୍ତ୍ରୀ ମାର୍କ କାର୍ଣ୍ଣେଙ୍କୁ ଏହି ନିବେଦନ କରିଛି । ବିଷ୍ଣୋଇ ଗ୍ୟାଙ୍ଗ ସଂଗଠିତ ଅପରାଧରେ ସାମିଲ ଥିବା ଅଭିଯୋଗ ହୋଇଛି । ବିଭିନ୍ନ ସ୍ଥାନରେ ଘଟୁଥିବା ଗୁଳିକାଣ୍ଡ ପାଇଁ ଲରେନ୍ସ ଗ୍ୟାଙ୍ଗ ନିଜକୁ ଦାୟୀ କରିଛି । ଏଥିରେ ହାସ୍ୟଅଭିନେତା କପିଳ ଶର୍ମାଙ୍କ କାଫେ ଉପରେ ଦୁଇଦୁଇଥର ଗୁଳିମାଡ଼ ଘଟଣା ମଧ୍ୟ ସାମିଲ ରହିଛି । ଗ୍ୟାଙ୍ଗ ସମ୍ପତ୍ତି, ବ୍ୟାଙ୍କ ଆକାଉଣ୍ଟ ଜବତ କରି ବିପୁଳ ଜରିମାନା ଲଗାଇବାକୁ ବିରୋଧୀ ସାଂସଦ ଫ୍ରାଙ୍କ କାପୁଟୋ ଦାବି କରିଛନ୍ତି ।
…..
13.
ସେୟାର ବଜାରରେ ହ୍ରାସ: ସେନସେକ୍ସ ଓ ନିଫ୍ଟି ତଳମୁହାଁ
ମଙ୍ଗଳବାର ଘରୋଇ ସେୟାର ବଜାର ହ୍ରାସ ସହ ବନ୍ଦ ହୋଇଛି। ଦିନସାରା ବଜାରରେ ଉଠାପକା ଲାଗି ରହିବା ପରେ ପ୍ରମୁଖ ସୂଚକାଙ୍କଗୁଡିକ ପ୍ରାୟ ଅଧା ପ୍ରତିଶତ ତଳକୁ ଖସିଛି। ବିଏସ୍ଇ ସେନସେକ୍ସ ୩୬୮ ପଏଣ୍ଟ ହ୍ରାସ ପାଇ ୮୦,୨୩୬ ସ୍ତରରେ ବନ୍ଦ ହୋଇଛି। ସେହିପରି ଏନ୍ଏସ୍ଇ ନିଫ୍ଟି ମଧ୍ୟ ୯୮ ପଏଣ୍ଟ କମି ୨୪,୪୮୭ରେ ପହଞ୍ଚିଛି। ଅନ୍ୟପଟେ, ମିଡ୍-କ୍ୟାପ୍ ସୂଚକାଙ୍କରେ ସାମାନ୍ୟ ୦.୨୫ ପ୍ରତିଶତ ହ୍ରାସ ଦେଖାଯାଇଥିବା ବେଳେ ସ୍ମଲ୍-କ୍ୟାପ୍ ସୂଚକାଙ୍କରେ କୌଣସି ବିଶେଷ ପରିବର୍ତ୍ତନ ହୋଇନାହିଁ।
….
14.
ଏସଏସସି ଜିଡି କନଷ୍ଟେବଳ ଶାରୀରିକ ପରୀକ୍ଷା ପାଇଁ ଆଡମିଟ୍ କାର୍ଡ ଜାରି
କେନ୍ଦ୍ରୀୟ ରିଜର୍ଭ ପୋଲିସ ଫୋର୍ସ (ସିଆରପିଏଫ) ପକ୍ଷରୁ ଏସଏସସି ଜିଡି କନଷ୍ଟେବଳ ୨୦୨୫ ନିଯୁକ୍ତି ପାଇଁ ଶାରୀରିକ ଦକ୍ଷତା ପରୀକ୍ଷା (ପିଇଟି) ଏବଂ ଶାରୀରିକ ମାନକ ପରୀକ୍ଷା (ପିଏସଟି) ପାଇଁ ଆଡମିଟ୍ କାର୍ଡ ଜାରି କରାଯାଇଛି। ଯେଉଁ ପ୍ରାର୍ଥୀମାନେ କମ୍ପ୍ୟୁଟର ଆଧାରିତ ପରୀକ୍ଷାରେ ଉତ୍ତୀର୍ଣ୍ଣ ହୋଇଛନ୍ତି, ସେମାନେ ଏହାକୁ ଡାଉନଲୋଡ୍ କରିପାରିବେ। ଏହି ଶାରୀରିକ ପରୀକ୍ଷା ଅଗଷ୍ଟ ୨୦, ୨୦୨୫ରୁ ଆରମ୍ଭ ହେବ। ପ୍ରାର୍ଥୀମାନେ ସିଆରପିଏଫ ୱେବସାଇଟ୍ rect.crpf.gov.in ରୁ ନିଜର ଆଡମିଟ୍ କାର୍ଡ ଡାଉନଲୋଡ୍ କରିପାରିବେ। ପରୀକ୍ଷା କେନ୍ଦ୍ରକୁ ଆଡମିଟ୍ କାର୍ଡର ପ୍ରିଣ୍ଟ୍ କପି ସହିତ ଚାରୋଟି ପାସପୋର୍ଟ ସାଇଜ୍ ଫଟୋ ଏବଂ ଏକ ମୂଳ ଫଟୋ ପରିଚୟ ପତ୍ର (ଯେପରିକି ଆଧାର କାର୍ଡ, ଭୋଟର ଆଇଡି) ନେବା ବାଧ୍ୟତାମୂଳକ। ଏହି ପରୀକ୍ଷାରେ ପୁରୁଷ ପ୍ରାର୍ଥୀଙ୍କୁ ୨୪ ମିନିଟରେ ୫ କିଲୋମିଟର ଏବଂ ମହିଳା ପ୍ରାର୍ଥୀଙ୍କୁ ୮.୫ ମିନିଟରେ ୧.୬ କିଲୋମିଟର ଦୌଡ଼ିବାକୁ ପଡ଼ିବ। ଉଲ୍ଲେଖଯୋଗ୍ୟ, ଏହି ନିଯୁକ୍ତି ମାଧ୍ୟମରେ ମୋଟ ୫୩,୬୯୦ଟି ପଦବୀ ପୂରଣ କରାଯିବ।
…..
15.
ସରକାରଙ୍କ ପ୍ରତ୍ୟକ୍ଷ କର ଆଦାୟ କମିଲା
ଚଳିତ ଆର୍ଥିକ ବର୍ଷରେ ସରକାରଙ୍କ ପ୍ରତ୍ୟକ୍ଷ କର ସଂଗ୍ରହରେ ହ୍ରାସ ଦେଖାଯାଇଛି। ଆୟକର ବିଭାଗର ତଥ୍ୟ ଅନୁଯାୟୀ, ଏପ୍ରିଲ ୧ ରୁ ଅଗଷ୍ଟ ୧୧ ମଧ୍ୟରେ ନେଟ୍ ପ୍ରତ୍ୟକ୍ଷ କର ସଂଗ୍ରହ ଗତ ବର୍ଷ ତୁଳନାରେ ୩.୯୫% କମି ୬.୬୪ ଲକ୍ଷ କୋଟି ଟଙ୍କାରେ ପହଞ୍ଚିଛି। ଅଧିକ ପରିମାଣର ଟିକସ ଫେରସ୍ତ (ରିଫଣ୍ଡ) ଯୋଗୁଁ ଏହି ହ୍ରାସ ଘଟିଥିବା କୁହାଯାଇଛି। ଏହି ସମୟ ମଧ୍ୟରେ ସରକାର ୧.୩୫ ଲକ୍ଷ କୋଟି ଟଙ୍କାର ଟିକସ ଫେରସ୍ତ କରିଛନ୍ତି, ଯାହା ଗତ ବର୍ଷ ତୁଳନାରେ ୯.୮୧% ଅଧିକ। ରିଫଣ୍ଡ ପୂର୍ବରୁ ମୋଟ କର ସଂଗ୍ରହ ମଧ୍ୟ ୧.୮୭% କମି ୭.୯୯ ଲକ୍ଷ କୋଟି ଟଙ୍କା ରହିଛି। ବିଶେଷଜ୍ଞଙ୍କ ମତରେ, ବାର୍ଷିକ ଲକ୍ଷ୍ୟ ପୂରଣ ପାଇଁ ଆଗାମୀ ମାସଗୁଡ଼ିକରେ କର ସଂଗ୍ରହରେ ଦ୍ରୁତ ବୃଦ୍ଧି ଆବଶ୍ୟକ। ତେବେ ସମୟ ସହିତ ଏଥିରେ ସୁଧାର ଆସିବ ବୋଲି ଆଶା କରାଯାଉଛି।
…..
16.
ଓଡ଼ିଶାରେ ପ୍ରତିଷ୍ଠା ହେବ ଦୁଇଟି ସେମି କଣ୍ଡକ୍ଟର ୟୁନିଟ, କେନ୍ଦ୍ର କ୍ୟାବିନେଟର ମଂଜୁରୀ
ଓଡ଼ିଶା, ଆନ୍ଧ୍ର ପ୍ରଦେଶ ଏବଂ ପଂଜାବରେ ଚାରୋଟି ସେମି କଣ୍ଡକ୍ଟର ୟୁନିଟ ପ୍ରତିଷ୍ଠା ସକାଶେ କେନ୍ଦ୍ର କ୍ୟାବିନେଟ ମଂଜୁରୀ ଦେଇଛି । ଏଥିପାଇଁ ୪ ହଜାର ୬୦୦ କୋଟି ଟଙ୍କା ବ୍ୟୟ ହେବ । ଓଡ଼ିଶାରେ ସିକସେମ୍ ଓ ଥ୍ରୀଡି ଗ୍ଲାସ ପ୍ରକଳ୍ପ ପ୍ରତିଷ୍ଠା ହେବ । ସିକସେମ ପ୍ରାଇଭେଟ ଲିମିଟେଡ ଭୁବନେଶ୍ୱର ଇନଫୋ ଭ୍ୟାଲିରେ ୟୁନିଟ କରିବ । ବ୍ରିଟେନର କ୍ଲାସ-ସିକ୍ ୱେଫର ଫ୍ୟାବ ଲିମିଟେଡ ସହ ମିଶି ସିଲିକନ୍ କାର୍ବାଇଡ ଆଧାରିତ କମ୍ପାଉଣ୍ଡ ସେମି କଣ୍ଡକ୍ଟର୍ସର ଏକ ପ୍ୟାକେଜିଂ ୟୁନିଟ କରାଯିବ । ସେହିପରି ଥ୍ରୀଡି ଗ୍ଲାସ ସଲୁ୍ୟସନ୍ସ ଇନଫୋ ଭୁବନେଶ୍ୱରର ଇନଫୋ ଭ୍ୟାଲିରେ ଭର୍ଟିକଲ ଇଣ୍ଟିଗ୍ରେଟେଡ ଆଡଭାନ୍ସ ଗ୍ଲାସ ସବଷ୍ଟ୍ରେଟ ୟୁନିଟ ସ୍ଥାପନ କରିବ । ଏହି ୟୁନିଟ ଭାରତରେ ସବୁଠାରୁ ଉନ୍ନତ ପ୍ୟାକେଜିଂ ଟେକନିକ ଆଣିବ ।
…
17.
ଆଇପିଏଲ୍ ବେଟିଂ: ଧୋନିଙ୍କ ମାନହାନି ମାମଲାର ଶୁଣାଣି ୧୧ ବର୍ଷ ପରେ ଆରମ୍ଭ ହେବ
୨୦୧୪ ମସିହାରେ ଆଇପିଏଲ ବେଟିଂ ପ୍ରସଙ୍ଗ ଦେଶବ୍ୟାପୀ ଚର୍ଚ୍ଚାର ବିଷୟ ହୋଇଥିଲା । କେତେକ ଟିଭି ଚ୍ୟାନେଲ ମହେନ୍ଦ୍ର ସିଂ ଧୋନିଙ୍କ ନାମକୁ ମଧ୍ୟ ଏଥିରେ ଯୋଡ଼ିଥିଲେ । ଧୋନି ସେହିବର୍ଷ ନୁ୍ୟଜ ନେସନ ଟିଭି ଚ୍ୟାନେଲ ବିରୋଧରେ ୧୦୦ କୋଟି ଟଙ୍କାର ମାନହାନି ମାମଲା କରିଥିଲେ । ଜି ମିଡିଆ କର୍ପୋରେସନ, ସାମ୍ବାଦିକ ସୁଧୀର ଚୌଧୁରୀ, ଆଇପିଏସ୍ ଜି ସମ୍ପଥ କୁମାର ଏବଂ ନୁ୍ୟଜ ନେସନ ଚ୍ୟାନେଲକୁ ସେ ପକ୍ଷଭୁକ୍ତ କରିଥିଲେ । ଧୋନି ବେଟିଂ, ମ୍ୟାଚ ଫିକ୍ସିଂରେ ସଂପୃକ୍ତ ଥିବା ଏବଂ ଚେନ୍ନାଇ ପୁଲିସ ତାଙ୍କୁ ସମନ ପଠାଇଥିବା ନୁ୍ୟଜରେ କୁହାଯାଇଥିଲା । ବିଭିନ୍ନ କାରଣରୁ ମାମଲାର ଶୁଣାଣି ହୋଇ ନଥିଲା । ଏବେ ଧୋନି ବୟନ ରେକର୍ଡ କରିବାକୁ କୋର୍ଟଙ୍କୁ ଜଣାଇଥିବାରୁ ମାମଲାର ଶୁଣାଣି ଆରମ୍ଭ ହେବ ।
…
18.
ପାକ୍ ସେନା ମୁଖ୍ୟଙ୍କ ଚେତାବନୀ, ଯୁଦ୍ଧ ହେଲେ ଜାମନଗର ରିଫାଇନାରୀ ହେବ ଟାର୍ଗେଟ
ଏବେ ଆମେରିକା ଗସ୍ତରେ ଅଛନ୍ତି ପାକିସ୍ତାନ ସେନାମୁଖ୍ୟ ଅସିମ ମୁନିର । କିଛି ଦିନ ହେଲା ସେ ଭାରତ ବିରୋଧରେ ବିଷୋଦଗାର କରି ଆସୁଛନ୍ତି । ଏବେ ପୁଣି କହିଛନ୍ତି, ଆଗାମୀ ଦିନରେ ଯଦି ଭାରତ ସହ ଯୁଦ୍ଧ ହୁଏ, ତେବେ ଗୁଜରାଟର ଜାମନଗରରେ ଥିବା ରିଲାଏନ୍ସ ରିଫାଇନାରୀ ହେବ ତାଙ୍କର ମୁଖ୍ୟ ଟାର୍ଗେଟ । ଯାହାକି ବିଶ୍ୱର ସର୍ବବୃହତ ରିଫାଇନିଂ କମ୍ପ୍ଲେକ୍ସ ଭାବେ ଜଣା । ଭାରତର ଆର୍ଥିକ ଶକ୍ତିକେନ୍ଦ୍ର ଉପରେ ଆକ୍ରମଣ ପାଇଁ ସିଧାସଳଖ ଧମକ ପ୍ରଥମ ଥର ପାଇଁ ମିଳିଛି । କେଇ ମାସ ତଳେ ପାକିସ୍ତାନର ଜଣେ ମନ୍ତ୍ରୀ କହିଥିଲେ, ଭାରତ ପାଇଁ ପାକିସ୍ତାନ ୧୩୦ଟି ପରମାଣୁ ଯୁଦ୍ଧାସ୍ତ୍ର ରଖିଛି । ଦୁଇ ଦିନ ତଳେ ସେନାମୁଖ୍ୟ ମୁନିର କହିଥିଲେ, ପାକିସ୍ତାନ ଯଦି ଧଂସ ହେବ ଅଧା ଦୁନିଆକୁ ନେଇ ଧ୍ୱଂସ ହେବ ।
..
19.
ଦଣ୍ଡ ଭୋଗିସାରିଥିବା କଏଦୀଙ୍କୁ ମୁକ୍ତ କର: ସୁପ୍ରିମ କୋର୍ଟ
ସଜା କାଟିସାରି ଜେଲରେ ଥିବା କଏଦୀଙ୍କୁ ଚିହ୍ନଟ କରି ତୁରନ୍ତ ମୁକ୍ତ କରିବାକୁ ସୁପ୍ରିମକୋର୍ଟ ନିଦେ୍ର୍ଦଶ ଦେଇଛନ୍ତି । ସମସ୍ତ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳର ଗୃହ ସଚିବଙ୍କୁ ନୋଟିସ କରି ସର୍ବୋଚ୍ଚ ଅଦାଲତ ଏହା କହିଛନ୍ତି । ନୀତୀଶ କଟାରା ହତ୍ୟା ମାମଲାର ଦୋଷୀ ସୁଖଦେବ ପେହଲୱାନଙ୍କ ଆବେଦନର ଶୁଣାଣି କରି ଜଷ୍ଟିସ ବିଭି ନାଗରତ୍ନା ଏବଂ କେଭି ବିଶ୍ୱନାଥନଙ୍କ ଖଣ୍ଡପୀଠ କହିଛନ୍ତି, ‘ଯଦି କୌଣସି ବ୍ୟକ୍ତିଙ୍କୁ ନିର୍ଦ୍ଦିଷ୍ଟ ଅବଧି ପାଇଁ ଦଣ୍ଡ ଦିଆଯାଇଥିଲେ ତାହା ଶେଷ ହେବାମାତ୍ରେ ତୁରନ୍ତ ମୁକ୍ତ କରାଯିବା ଉଚିତ । ଅନ୍ୟ କଏଦୀଙ୍କ ପରି ସେ ସଜା ଛାଡ଼ ପାଇଁ ଆବେଦନ କରିବାର ଆବଶ୍ୟକତା ନାହିଁ ।’ ୨୦୦୨ରେ ନୀତୀଶ କଟାରାଙ୍କୁ ହତ୍ୟା କରାଯାଇଥିଲା । ଏହି ମାମଲାରେ ସୁଖଦେବଙ୍କୁ ୨୦ ବର୍ଷ ସଜା ହୋଇଥିଲା । ଯାହା ଗତ ମାର୍ଚ୍ଚରେ ପୂରଣ ହୋଇଥିଲା । କିନ୍ତୁ ତାଙ୍କୁ ମୁକ୍ତ କରାଯାଉ ନ ଥିଲା ।
…
20.
ବିଶ୍ୱର ଟପ୍-୨୦ ଧନୀ ତାଲିକାକୁ ଫେରିଲେ ଆଦାନୀ
କ୍ରମାଗତ ୬ ସପ୍ତାହ ଧରି ଶେୟାର ବଜାରରେ ହ୍ରାସ ଦେଖାଦେବା ପରେ ସୋମବାର ଏଥିରେ ବ୍ରେକ ଲାଗିଥିଲା । ଶେୟାର ବଜାରରେ ସେନସେକ୍ସ ୭୪୬ ପଏଣ୍ଟ ବୃଦ୍ଧି ପାଇଥିଲା । ଏଥିଯୋଗୁ ଅନେକ ଶିଳ୍ପପତିଙ୍କ ଉପରେ ଟଙ୍କା ବର୍ଷା ହୋଇଛି । ଏହାର ସର୍ବାଧିକ ଲାଭ ମିଳିଛି ଆଦାନୀ ଗ୍ରୁପର ଚେୟାରମ୍ୟାନ ଗୌତମ ଆଦାନୀଙ୍କୁ । ଆଦାନୀ ପୁଣିଥରେ ବିଶ୍ୱର ଶ୍ରେଷ୍ଠ-୨୦ ଧନୀଙ୍କ ମଧ୍ୟରେ ସାମିଲ ହୋଇଛନ୍ତି । ତାଲିକାରେ ଆଦାନୀ ୧୮ତମ ସ୍ଥାନରେ ରହିଛନ୍ତି । ଆଦାନୀଙ୍କ ମୋଟ୍ ସମ୍ପତ୍ତି ୫.୭୪ ମିଲିୟନ ଡଲାର ତଥା ୫ ଲକ୍ଷ ୩୦୨ କୋଟି ଟଙ୍କା ବୃଦ୍ଧି ପାଇ ୭୯.୭ ବିଲିୟନ ଡଲାରରେ ପହଞ୍ଚôଯାଇଛି । ଟେସଲା ମାଲିକ ଏଲନ ମସ୍କ ଧନୀ ତାଲିକାର ଏକ ନମ୍ବର ସ୍ଥାନରେ ରହିଛନ୍ତି ।
…
21.
ଆଠ ବର୍ଷର ଡେଟିଂ ପରେ ବାନ୍ଧବୀ ଜର୍ଜିନାଙ୍କ ସହ ରୋନାଲ୍ଡୋଙ୍କ ନିର୍ବନ୍ଧ
ବିଶ୍ୱର ମହାନ ଫୁଟ୍ବଲ ଖେଳାଳି କ୍ରିଷ୍ଟିଆନୋ ରୋନାଲ୍ଡୋ ଶେଷରେ ବିବାହ କରିବାକୁ ଯାଉଛନ୍ତି । ୮ ବର୍ଷର ଡେଟିଂ ପରେ ବାନ୍ଧବୀ ଜର୍ଜିନା ରୋଡ୍ରିଗ୍ୱେଜଙ୍କ ସହ ପର୍ତ୍ତୁଗାଲ ଅଧିନାୟକଙ୍କ ନିର୍ବନ୍ଧ ଅନୁଷ୍ଠିତ ହୋଇଛି । ଜର୍ଜିନା ସାମାଜିକ ଗଣମାଧ୍ୟମରେ ନିର୍ବନ୍ଧ ମୁଦିର ଫଟୋକୁ ଶେୟାର କରି ରୋନାଲ୍ଡୋଙ୍କ କୋଟି କୋଟି ପ୍ରଶଂସକଙ୍କୁ ଏହି ଖୁସି ଖବର ଜଣାଇଛନ୍ତି । ୯ ବର୍ଷ ତଳେ ଲା ଲିଗା ଟୁର୍ଣ୍ଣାମେଣ୍ଟ ଖେଳୁଥିବାବେଳେ ରୋନାଲ୍ଡୋ ପ୍ରଥମଥର ଜର୍ଜିନାଙ୍କୁ ଭେଟିଥିଲେ । ସେବେଠାରୁ ଉଭୟ ଡେଟିଂ କରିବା ସହ ଏକାଠି ରହୁଥିଲେ । ୪୦ ବର୍ଷୀୟ ରୋନାଲ୍ଡୋଙ୍କ ୪ଟି ସନ୍ତାନ ରହିଛି । ସେମାନଙ୍କ ମଧ୍ୟରୁ ୮ ବର୍ଷୀୟ ଆନାଲା ମାର୍ଟିନା ଓ ୩ ବର୍ଷୀୟା ବେଲା ଜର୍ଜିନାଙ୍କ ଔରସରୁ ଜନ୍ମ ହୋଇଛନ୍ତି । ସରୋଗେସି ମାଧ୍ୟମରେ ରୋନାଲ୍ଡୋଙ୍କର ଅନ୍ୟ ୨ ସନ୍ତାନ ଅଛନ୍ତି ।
…
22.
ସରକାରୀ କାଗଜରେ ବ୍ୟବହାର ହେବନି ‘ହରିଜନ’ ଶବ୍ଦ, ରହିବ ‘ଅନୁସୂଚିତ ଜାତି’
ରାଜ୍ୟର କୌଣସି ସରକାରୀ କାଗଜରେ ଆଉ ‘ହରିଚନ’ ଶବ୍ଦ ବ୍ୟବହାର ହେବନାହିଁ । ଏହା ବଦଳରେ ‘ଅନୁସୂଚିତ ଜାତି’ ଲେଖାଯିବ । ଏ ନେଇ ରାଜ୍ୟ ଅନୁସୂଚିତ ଜାତି ଓ ଅନୁସୂଚିତ ଜନଜାତି ଉନ୍ନୟନ, ସଂଖ୍ୟାଲଘୁ ଏବଂ ପଛୁଆ ବର୍ଗ କଲ୍ୟାଣ ବିଭାଗ ପକ୍ଷରୁ ଚିଠି ଲେଖାଯାଇଛି । ଜାତି ପ୍ରମାଣପତ୍ରରେ ମଧ୍ୟ ‘ହରିଜନ’ ଶବ୍ଦ ବ୍ୟବହାର ହେବ ନାହିଁ । ଅତୀତରେ ‘ହରିଜନ’ ଶବ୍ଦକୁ ନେଇ ବହୁ ବିବାଦ ଉଠିଥିବାର ନଜିର ରହିଛି । କେନ୍ଦ୍ର ସରକାର ଅତୀତରେ ଏ ଶବ୍ଦକୁ ନ ଲେଖିବାକୁ ମଧ୍ୟ ପରାମର୍ଶ ଦେଇଥିଲେ ।
…
23.
ଅଫିସରେ ଲାଗିବ ଏଆଇ କ୍ୟାମେରା, ସମୟାନୁବର୍ତ୍ତୀ ହେବାକୁ ନିଦେ୍ର୍ଦଶ
ଅଫିସରମାନଙ୍କୁ ଠିକ୍ ସମୟରେ ଅଫିସ ଆସିବାକୁ ରାଜ୍ୟ ସରକାର ନିଦେ୍ର୍ଦଶ ଦେଇଛନ୍ତି । ଏହାର ତଦାରଖ ପାଇଁ ଭୁବନେଶ୍ୱରର ଖାରବେଳ ଭବନ ଏବଂ ଲୋକସେବା ଭବନ ସମେତ ଜିଲ୍ଲାସ୍ତରର ଅଫିସଗୁଡ଼ିକରେ ଏଆଇ କ୍ୟାମେରା ଲାଗିବ । ସଚିବସ୍ତରୀୟ ବୈଠକରେ ଏ ନେଇ ନିଷ୍ପତ୍ତି ହୋଇଛି । ଲୋକଙ୍କୁ ଭଲ ବ୍ୟବହାର ପ୍ରଦର୍ଶନ ନ କରୁଥିବା ଅଫିସରମାନଙ୍କ ଉପରେ ନଜର ରଖାଯିବ । ଅକ୍ଟୋବର ମାସରୁ ଆରମ୍ଭ ହେବ ମୁଖ୍ୟମନ୍ତ୍ରୀ ଡାସବୋର୍ଡ । ସବୁ ବିଭାଗ ସେମାନଙ୍କ ଖର୍ଚ୍ଚ ବୃଦ୍ଧିକୁ ଗୁରୁତ୍ୱ ଦେବେ । ଅଫିସରମାନେ ମଧ୍ୟ କ୍ଷେତ୍ର ପରିଦର୍ଶନକୁ ଗୁରୁତ୍ୱ ଦେବେ । ଦୁର୍ନୀତିର ମୂଳ କାରଣ ଖୋଜି କାର୍ଯ୍ୟାନୁଷ୍ଠାନ କରାଯିବ । ପ୍ରତି ମାସ ୭ ତାରିଖରେ ଜିଲ୍ଲାପାଳମାନେ କେନ୍ଦ୍ରୀୟ ଯୋଜନା ଗୁଡ଼ିକର ସମୀକ୍ଷା କରିବାକୁ ନିଷ୍ପତ୍ତି ହୋଇଛି ।
…
24.
ଦିଲ୍ଲୀରେ ଏବେ ବନ୍ଦ ହେବନି ପୁରୁଣା ଗାଡ଼ି, ନିଦେ୍ର୍ଦଶ ଦେଲେ ସୁପ୍ରିମକୋର୍ଟ
ଦିଲ୍ଲୀ-ଏନସିଆରରେ ୧୫ ବର୍ଷର ପୁରୁଣା ପେଟ୍ରୋଲ ଏବଂ ୧୦ ବର୍ଷର ପୁରୁଣା ଡିଜେଲ ଗାଡ଼ି ଚଳାଚଳ ଉପରେ କୌଣସି ପ୍ରତିବନ୍ଧକ ରହିବ ନାହିଁ । ଏହି ନିଦେ୍ର୍ଦଶ ଦେଇଛନ୍ତି ସୁପ୍ରିମକୋର୍ଟ । ଗାଡ଼ି କେବଳ ପୁରୁଣା ହୋଇଗଲା ବୋଲି ସେଗୁଡ଼ିକୁ ଉପରେ ରୋକ୍ ଲଗାଇବା ଅନୁଚିତ । ଅନେକ ଲୋକ ସେମାନଙ୍କ ଗାଡ଼ି ସୀମିତ ସମୟ ପାଇଁ ଘରୁ କାଢ଼ି ଥାଆନ୍ତି । ନୂତନ ନୀତି ହେଲେ ଗାଡ଼ି ମାଲିକଙ୍କର ବିପୁଳ କ୍ଷତି ହେବ । ତେଣୁ ଏହି ନିୟମର ସମୀକ୍ଷା ଆବଶ୍ୟକ ବୋଲି କୋର୍ଟ କହିଛନ୍ତି । ୪ ସପ୍ତାହ ପରେ ମାମଲାର ଶୁଣାଣି ପାଇଁ ବାୟୁ ଗୁଣବତ୍ତା ପ୍ରବନ୍ଧନ ଆୟୋଗ ବା ସିକୁ୍ୟଏମଙ୍କୁ ନୋଟିସ କରାଯାଇଛି । ୨୦୧୫ ମସିହାରେ ପ୍ରଥମେ ଏନଜିଟି ଏହି ନିୟମ ଲାଗୁ କରିଥିଲେ । ଏହାକୁ ୨୦୧୮ରେ ସୁପ୍ରିମକୋର୍ଟ ବଳବତ୍ତର ରଖିଥିଲେ । ପରେ ଦିଲ୍ଲୀ ସରକାର ପୁଣି ଏହା ବିରୋଧରେ ଆବେଦନ କରିଥିଲେ ।
…
25.
ସୁପ୍ରିମକୋର୍ଟଙ୍କ ରାୟ, ଆଧାର ନାଗରିକତାର ଏକମାତ୍ର ପ୍ରମାଣ ନୁହେଁ,
ବିହାର ଭୋଟର ତାଲିକା ସଂଶୋଧନ ବା ଏସଆଇଆର ସମ୍ପର୍କିତ ମାମଲାରେ ସୁପ୍ରିମକୋର୍ଟ କହିଛନ୍ତି, ଆଧାରକୁ ନାଗରିକତା ନିର୍ଣ୍ଣୟର ଏକମାତ୍ର ପ୍ରମାଣପତ୍ର ଭାବେ ନିଆଯାଇପାରିବନି । ନିର୍ବାଚନ କମିଶନଙ୍କ ଏହି ଯୁକ୍ତିକୁ ସ୍ୱୀକାର କରିଛନ୍ତି ସୁପ୍ରିମକୋର୍ଟ । କୋର୍ଟ କହିଥିଲେ, ଆଧାର ଆଇନରେ ସ୍ପଷ୍ଟ କରାଯାଇଛି ଏହା ନାଗରିକତାର ପ୍ରମାଣପତ୍ର ନୁହେଁ । ତେବେ ପ୍ରସ୍ତୁତ ହୋଇଥିବା ତାଲିକାରେ ବ୍ୟାପକ ତ୍ରୁଟି ଥିବା ଆବେଦନକାରୀଙ୍କ ଓକିଲ କପିଲ ସିବଲ ଓ ଅଭିଷେକ ମନୁସିଂଭୀ ଯୁକ୍ତି କରିଥିଲେ । ତେବେ ନିର୍ବାଚନ କମିଶନ କହିଥିଲେ, ଏହା କେବଳ ଚିଠା ତାଲିକା । ସେପ୍ଟେମ୍ବର ୩୦ରେ ପ୍ରକାଶ ପାଇବାକୁ ଥିବା ଚୂଡ଼ାନ୍ତ ତାଲିକାରେ ଠିକ୍ ଭାବେ ଯାଞ୍ଚ କରାଯିବ । ମାମଲାର ପରବର୍ତ୍ତୀ ଶୁଣାଣି ଆସନ୍ତାକାଲି ହେବ ।
…
26.
ଶୁଭମନ ଗିଲ୍ ଜୁଲାଇ ମାସର ଶ୍ରେଷ୍ଠ ଖେଳାଳି, ପାଇଲେ ଆଇସିସି ପୁରସ୍କାର
ଭାରତୀୟ ଟେଷ୍ଟ ଦଳର ଅଧିନାୟକ ଶୁଭମନ ଗିଲ୍ ପାଇଛନ୍ତି ଆଇସିସି ପୁରସ୍କାର । ଆଣ୍ଡରସନ-ତେନ୍ଦୁଲକର ଟ୍ରଫି ଟେ୍େଟ ସିରିଜରେ ଦୃଢ଼ ବ୍ୟାଟିଂ କରି ସେ ଜୁଲାଇ ମାସର ଶ୍ରେଷ୍ଠ ଖେଳାଳି ବିବେଚିତ ହୋଇଛନ୍ତି । ପୂର୍ବରୁ ୩ ଥର ଏହି ପୁରସ୍କାର ପାଇଥିବା ଗିଲ୍ ଏଥର ଇଂଲଣ୍ଡ ଅଧିନାୟକ ବେନ୍ ଷ୍ଟୋକ୍ସ ଏବଂ ଦକ୍ଷିଣ ଆଫି୍ରିକାର ଅଲରାଉଣ୍ଡର ୱିଆନ ମୁଲ୍ଡରଙ୍କୁ ପଛରେ ପକାଇ ଦେଇଛନ୍ତି । ୨୦୨୩ ଜାନୁଆରୀ ଓ ସେପ୍ଟେମ୍ବର ଏବଂ ଗତ ଫେବ୍ରୁଆରୀ ମାସରେ ଗିଲ୍ ଏହି ପୁରସ୍କାର ପାଇଥିଲେ । ଗତ ସିରିଜରେ ଗିଲ୍ ୭୫.୪୦ ଆଭରେଜରେ ମୋଟ ୭୫୪ ରନ୍ ସଂଗ୍ରହ କରିଛନ୍ତି । ଗିଲ୍ ଅଧିନାୟକ ଭାବେ ଗୋଟିଏ ସିରିଜରେ ଦ୍ୱିତୀୟ ସର୍ବାଧିକ ରନ୍ ରେକର୍ଡ କରିଛନ୍ତି । ପୂର୍ବରୁ ବ୍ରାଡମ୍ୟାନ ୮୧୦ ରନ୍ ସଂଗ୍ରହ କରିଥିଲେ ।
…
27.
ଆଇନ ଶୃଙ୍ଖଳାକୁ ମୁଖ୍ୟମନ୍ତ୍ରୀଙ୍କ ଗୁରୁତ୍ୱ, ଗଠନ ହେବ ପୁଲିସ ନିଯୁକ୍ତି ବୋର୍ଡ
ରାଜ୍ୟର ଅପରାଧ ଏବଂ ଆଇନ ଶୃଙ୍ଖଳା ପରିସ୍ଥିତି ଉପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସମୀକ୍ଷା କରିଛନ୍ତି । ସାଧାରଣ ଜନତାଙ୍କ ସୁରକ୍ଷା ପାଇଁ ପଦକ୍ଷେପ ନେବାକୁ ସେ ପୁଲିସକୁ ନିଦେ୍ର୍ଦଶ ଦେଇଛନ୍ତି । ପୁଲିସ ପାଟ୍ରୋଲିଂ ଜୋରଦାର କରିବାକୁ, ସୀମାରେ ବ୍ରାଉନସୁଗର ଚାଲାର ରୋକିବାକୁ ଏବଂ ସ୍କୁଲ,କଲେଜ ଅଞ୍ଚଳରେ ସୁରକ୍ଷା ବଢ଼ାଇବାକୁ ସେ ପରାମର୍ଶ ଦେଇଛନ୍ତି । ପୁଲିସ ବିଭାଗରେ ଖାଲି ଥିବା ପଦବୀ ଗୁଡ଼ିକୁ ପୂରଣ କରିବାକୁ ଏକ ପୁଲିସ ନିଯୁକ୍ତ ବୋର୍ଡ ଗଠନ ହେବ ବୋଲି ସେ କହିଛନ୍ତି । ରାଜ୍ୟରେ ଏକ ବର୍ଷ ମଧ୍ୟରେ ୮ ହଜାର ୩୫ ନିଖୋଜ ମହିଳା ଓ ୩ ହଜାର ୩୦୬ ଜଣ ବାଳିକାଙ୍କୁ ଉଦ୍ଧାର କରାଯାଇଛି । ଗଞ୍ଜେଇ ଚାଷ ରୋକିବା ପଦକ୍ଷେପକୁ ସୁଦୃଢ଼ କରିବାକୁ ମୁଖ୍ୟମନ୍ତ୍ରୀ ନିଦେ୍ର୍ଦଶ ଦେଇଛନ୍ତି ।
…]
28.
ଶୀଘ୍ର ପୁଣି ଚୀନକୁ ଆରମ୍ଭ ହେବ ବିମାନ ସେନା, ଏସସିଓ ବୈଠକରେ ହୋଇପାରେ ଘୋଷଣା
ଚୀନକୁ ପୁଣି ଥରେ ଭାରତରୁ ସିଧାସଳଖ ବିମାନସେନା ଆରମ୍ଭ ହେବ । ନିଦେ୍ର୍ଦଶ ଦେବା ମାତ୍ରେ ସେବା ପୁନଃ ଚାଲୁ କରିବାକୁ ଏୟାରଲାଇନ୍ସ ଗୁଡ଼ିକୁ କୁହାଯାଇଛି । ଆସନ୍ତା ୩୧ ତାରିଖରୁ ଆରମ୍ଭ ହେଉଥିବା ସାଂଘାଇ ସହଯୋଗ ବୈଠକରେ ଏ ସମ୍ପର୍କରେ ଘୋଷଣା ହୋଇପାରେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହି ବୈଠକରେ ଯୋଗ ଦେବାର କାର୍ଯ୍ୟକ୍ରମ ରହିଛି । ଗତ କୋଭିଡ-୧୯ ସମୟରୁ ଦୁଇ ଦେଶ ମଧ୍ୟରେ ସିଧାସଳଖ ବିମାନ ସେବା ବନ୍ଦ ରହିଛି । ୨୦୨୦ ମସିହା ଗଲୱାନ ଘାଟି ସଂଘର୍ଷ ପରେ ଦୁଇ ଦେଶ ମଧ୍ୟରେ ସମ୍ପର୍କ ମଧ୍ୟ ଖରାପ ହୋଇ ଯାଇଥିଲା । ଏବେ ଉଭୟ ଦେଶ ତାହାକୁ ସୁଧାରିବାକୁ ଉଦ୍ୟମ ଚଳାଇଛନ୍ତି ।
…
29…
ଆଜି ହୋଇପାରେ ଲଘୁଚାପ, ୫ ଦିନ କେତେକ ଜିଲ୍ଲାରେ ବର୍ଷା ସମ୍ଭାବନା
ଆଜି ବଙ୍ଗୋପସାଗରରେ ଏକ ଲଘୁଚାପ ହେବାର ସମ୍ଭାବନା ରହିଛି । ଏହା ପ୍ରଭାବରେ ଆଗାମୀ ୫ ଦିନ ପର୍ଯ୍ୟନ୍ତ କେତେକ ଜିଲ୍ଲାରେ ପ୍ରବଳ ବର୍ଷା ହେବାର ସମ୍ଭାବନା ଥିବା ପାଣିପାଗ ବିଭାଗ ପକ୍ଷରୁ କୁହାଯାଇଛି । ଆସନ୍ତା ୨୪ ଘଣ୍ଟାରେ ମାଲକାନଗିରି, କୋରାପୁଟ ଏବଂ ନବରଙ୍ଗପୁର ଜିଲ୍ଲାରେ ବର୍ଷା ହେବ । ଏହି ସମୟରେ ଘଣ୍ଟା ପ୍ରତି ୩୦ରୁ ୪୦ କିଲୋମିଟର ବେଗରେ ପବନ ବହିପାରେ । ୧୪ ତାରିଖ ବେଳକୁ ଉପକୂଳ ଓଡ଼ିଶାରେ ମଧ୍ୟ ବର୍ଷା ହେବାର ସମ୍ଭାବନା ରହିଛି ।
…
30.
ବେଲୁଚିସ୍ତାନରେ ପାକିସ୍ତାନର ୯ ସୈନ୍ୟଙ୍କୁ ହତ୍ୟା
ପାକିସ୍ତାନର ବେଲୁଚିସ୍ତାନ ପ୍ରଦେଶରେ ଆତଙ୍କବାସୀମାନେ ୯ ଜଣ ପାକ୍ ସୈନ୍ୟଙ୍କୁ ହତ୍ୟା କରିଛନ୍ତି । ଅନ୍ୟ କେତେକ ସୈନ୍ୟ ଆହତ ମଧ୍ୟ ହୋଇଛନ୍ତି । ୱାସୁକ ଜିଲ୍ଲାର ବସିମା ସହରରେ ଥିବା ସୈନ୍ୟମାନଙ୍କ ଉପରେ ଅଚାନକ ଆକ୍ରମଣ ହୋଇଥିଲା । ପ୍ରାୟ ୪୦ ଜଣ ଆତଙ୍କବାଦୀ ଅସ୍ତ୍ରଶସ୍ତ୍ରରେ ସଜ୍ଜିତ ହୋଇ ପହଞ୍ଚିଥିଲେ । ସେମାନେ ଆଖିବୁଜା ଗୁଳି ଚଳାଇବା ସହ ଗ୍ରେନେଡ ମାଡ଼ କରିଥିଲେ । ଏହି ଆକ୍ରମଣ ପାଇଁ କୌଣସି ସଙ୍ଗଠନ ନିଜକୁ ଦାୟୀ କରିନାହାନ୍ତି । ତେବେ ଏହା ପଛରେ ବେଲୁଚିସ୍ତାନ ଲିବରେସନ ଆର୍ମି ଥିବା ଅନୁମାନ କରାଯାଉଛି ।
About the Author
