ବଡ଼ ଆହ୍ୱାନ ଦେଲେ ମୋଦି

ପଶ୍ଚିମ ଏସିଆ ସଙ୍କଟ ସଂପର୍କରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାଜ୍ୟସଭାରେ ମଙ୍ଗଳବାର ୨୧ ମିନିଟ୍ ଧରି ବୟାନ ରଖିଛନ୍ତି । ସେ କହିଛନ୍ତି, ତିନି ସପ୍ତାହରୁ ଅଧିକ ସମୟ ହେଲା ଚାଲିଥିବା ଆମେରିକା-ଇସ୍ରାଏଲ୍ ଏବଂ ଇରାନ ଯୁଦ୍ଧ ବୈଶ୍ୱିକ ଅର୍ଥନୀତିକୁ ଦୋହଲାଇ ଦେଇଛି । ଯୁଦ୍ଧ କାରଣରୁ ହୋଇଥିବା କ୍ଷତିର ଭରଣା ପାଇଁ ଦୀର୍ଘ ଦିନ ଲାଗିବ । ଯଦି ଯୁଦ୍ଧ ଅଧିକ ଦିନ ରହେ ତେବେ ବିଶ୍ୱବ୍ୟାପୀ ଗମ୍ଭୀର ପରିଣାମ ଦେଖିବାକୁ ମିଳିପାରେ । ଆଗାମୀ ସମୟ ଦେଶର ସବୁଠୁ ବଡ଼ ପରୀକ୍ଷା ନେବାକୁ ଯାଉଛି । ଏଥିରେ ସଫଳତା ପାଇବାକୁ ରାଜ୍ୟମାନଙ୍କ ସହଯୋଗ ଜରୁରି । ଆମକୁ ‘ଟିମ୍ ଇଣ୍ଡିଆ’ ଭଳି କାମ କରିବାକୁ ହେବ । ଉପସାଗରୀୟ ଦେଶରେ ପ୍ରାୟ ୧ କୋଟି ଭାରତୀୟ ରହୁଛନ୍ତି । ସେମାନଙ୍କ ସୁରକ୍ଷା ଆମର ପ୍ରାଥମିକତା । ଯୁଦ୍ଧ ଆରମ୍ଭ ପରଠାରୁ ଅଦ୍ୟାବଧି ପଶ୍ଚିମ ଏସିଆରୁ ୩ ଲକ୍ଷ ୭୫ ହଜାରରୁ ଅଧିକ ଭାରତୀୟ ସ୍ୱଦେଶ ଫେରିଛନ୍ତି । ସେମାନଙ୍କ ମଧ୍ୟରେ ଇରାନରେ ମେଡିକାଲ୍ ପଢ଼ୁଥିବା ୭୦୦ ଛାତ୍ରଛାତ୍ରୀ ସାମିଲ ।