ଏୟାରଷ୍ଟ୍ରାଇକରେ ଖାମେନେଇଙ୍କ ବାସଭବନ, କାର୍ଯ୍ୟାଳୟ ଧ୍ୱସ୍ତ
ଇରାନର ସୁପି୍ରମ ଲିଡର ଆୟାତୋଲ୍ଲା ଅଲ୍ଲୀ ଖାମେନେଇଙ୍କ ବାସଭବନ ଓ କାର୍ଯ୍ୟାଳୟ ବିଧ୍ୱସ୍ତ ହୋଇଯାଇଛି । ରାଜଧାନୀ ତେହରାନରେ ଥିବା ଏହି କୋଠା ଉପରେ ଶନିବାର ଆମେରିକା ଓ ଇସ୍ରାଏଲ ପକ୍ଷରୁ ଜୋରଦାର ମିସାଇଲ ମାଡ଼ ହୋଇଥିଲା । ଖାମେନେଇ ଓ ରାଷ୍ଟ୍ରପତି ମସୁଦ ପେଜେସ୍କିଆନଙ୍କୁ ଟାର୍ଗେଟ୍ କରାଯାଇ ଏହି ହମଲା ହୋଇଥିଲା । ଏବେ ଖାମେନେଇଙ୍କ ବାବଦରେ କିଛି ସୂଚନା ମିଳୁନାହିଁ । ସମ୍ଭବତଃ ଆକ୍ରମଣ ପୂର୍ବରୁ ସେ ଗୋପନ ତଥା ସୁରକ୍ଷିତ ବଙ୍କରକୁ ଚାଲିଯାଇଥିବା କୁହାଯାଉଛି । ଏମିତିକି ସେ ଦେଶ ଛାଡ଼ି ପଳାୟନ କରିଥିବା ନେଇ ମଧ୍ୟ ରିପୋର୍ଟ ପ୍ରକାଶ ପାଇଛି । ଶନିବାର ଇସ୍ରାଏଲୀ ଗଣମାଧ୍ୟମ ତରଫରୁ ଖାମେନେଇଙ୍କ ବିଧ୍ୱସ୍ତ ବାସଭବନର ଫଟୋ ଜାରି କରାଯାଇଛି । ଏଥିରେ ଦେଖିବାକୁ ମିଳିଛି ଯେ ଘରଟି ସମ୍ପୂର୍ଣ୍ଣ ଧ୍ୱଂସ ହୋଇଯାଇଛି । ଇସ୍ରାଏଲୀ ସେନା ନିଜ ‘ଅପରେସନ ରୋରିଂ ଲାୟନ’ରେ ଇରାନ ଉପରେ ଆକ୍ରମଣ କରିଛି । ତେବେ କିଛି ଘଣ୍ଟା ପରେ ତେହରାନ ତରଫରୁ ଜୋରଦାର ଜବାବୀ ଆକ୍ରମଣ ହୋଇଛି । ମଧ୍ୟପ୍ରାଚ୍ୟରେ ଥିବା ଆମେରିକାର ସାମରିକ ଘାଟିଗୁଡ଼ିକୁ ଟାର୍ଗେଟ୍ କରି ମିସାଇଲ ମାଡ଼ ହୋଇଛି ।
