ରାମଲାଲାଙ୍କ ସୂର୍ଯ୍ୟ ତିଲକ

ଅଯୋଧ୍ୟାରେ ରାମନବମୀ ଅବସରରେ ଶୁକ୍ରବାର ମଧ୍ୟାହ୍ନ ୧୨ଟା ଅଭିଜିତ୍ ମୁହୂର୍ତ୍ତରେ ରାମଲାଲାଙ୍କ ସୂର୍ଯ୍ୟ ତିଲକ ହୋଇଛି। ପ୍ରାୟ ୯ ମିନିଟ୍ ପର୍ଯ୍ୟନ୍ତ ଭଗବାନଙ୍କ କପାଳରେ ନୀଳ ରଶ୍ମି ପଡ଼ିଥିଲା। ପ୍ରାଣ-ପ୍ରତିଷ୍ଠା ପରେ ଦ୍ୱିତୀୟ ଥର ପାଇଁ ରାମଲାଲାଙ୍କ ସୂର୍ଯ୍ୟ ତିଲକ ହୋଇଛି। ପ୍ରଧାନମନ୍ତ୍ରୀ ମୋଦୀ ଟିଭିରେ ଏହାର ସିଧାପ୍ରସାରଣ ଦେଖିଥିଲେ। ସୂର୍ଯ୍ୟ ତିଲକ ସହିତ ରାମଲାଲାଙ୍କ ଜନ୍ମ ହୋଇଥିଲା। ଏହି ସମୟରେ ଗର୍ଭଗୃହରେ ୧୪ ଜଣ ପୂଜକ ଉପସ୍ଥିତ ଥିଲେ। ସେମାନେ ବିଶେଷ ପୂଜା ଓ ଆରତି କରିଥିଲେ। ସୂର୍ଯ୍ୟ ତିଲକ ପରେ କିଛି ସମୟ ପାଇଁ ମନ୍ଦିରର ଦ୍ୱାର ବନ୍ଦ କରିଦିଆଯାଇଥିଲା। ରାମଲାଲାଙ୍କୁ ୫୬ ପ୍ରକାର ବ୍ୟଞ୍ଜନର ଭୋଗ ଲାଗି କରାଯାଇଥିଲା। ସୂଚନାଯୋଗ୍ୟ ଯେ ସୂର୍ଯ୍ୟ ତିଲକ ପାଇଁ ଅଷ୍ଟଧାତୁର ୨୦ଟି ପାଇପ୍ ସାହାଯ୍ୟରେ ୬୫ ଫୁଟ ଲମ୍ବା ଏକ ସିଷ୍ଟମ୍ ପ୍ରସ୍ତୁତ କରାଯାଇଛି। ୪ଟି ଲେନ୍ସ ଏବଂ ୪ଟି ଦର୍ପଣ ମାଧ୍ୟମରେ ଗର୍ଭଗୃହରେ ରାମଲାଲାଙ୍କ ମସ୍ତକ ପର୍ଯ୍ୟନ୍ତ ସୂର୍ଯ୍ୟ କିରଣ ପହଞ୍ଚା ଯାଉଛି।