Top 30 news
1.
ଝାଡଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଶିବୁ ସୋରେନଙ୍କ ପରଲୋକ
ଝାଡଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ତଥା ରାଜ୍ୟସଭା ସାଂସଦ ଶିବୁ ସୋରେନଙ୍କ ପରଲୋକ ହୋଇଛି। ଦିଶୋମ ଗୁରୁଜୀ ନାମରେ ପ୍ରସିଦ୍ଧ ସୋରେନ ସୋମବାର ସକାଳେ ଦିଲ୍ଲୀର ଗଙ୍ଗାରାମ ହସ୍ପିଟାଲରେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ତାଙ୍କୁ ୮୧ ବର୍ଷ ହୋଇଥିଲା। ସୋରେନ ଗତ ଦେଢ଼ ମାସ ହେଲା ମେଡିକାଲରେ ଚିକିତ୍ସାଧୀନ ଥିଲେ। ତାଙ୍କର ବ୍ରେନ୍ ଷ୍ଟ୍ରୋକ ହୋଇଥିଲା। ଏଥିଯୋଗୁଁ ତାଙ୍କ ଶରୀରର ବାମ ଭାଗ ପକ୍ଷାଘାତର ଶିକାର ହୋଇ ଯାଇଥିଲା। ସେ ମାସେ ହେଲା ଲାଇଫ ସପୋର୍ଟ ସିଷ୍ଟମରେ ଥିଲେ। ସ୍ନାୟୁ, ହୃଦରୋଗ ଏବଂ ବୃକକ ବିଭାଗର ଡାକ୍ତରୀ ଟିମ୍ ତାଙ୍କର ଚିକିତ୍ସା କରୁଥିଲେ। ବ୍ରେନ୍ ଷ୍ଟ୍ରୋକ ପୂର୍ବରୁ ଦୀର୍ଘ ଦିନ ହେଲା ସୋରେନ ବୃକକ ରୋଗରେ ପୀଡ଼ିତ ଥିଲେ। ବର୍ଷେ ହେଲା ତାଙ୍କର ଡାଇଲେସିସ ଚାଲିଥିଲା। ସୋରେନ ମଧୁମେହରେ ଆକ୍ରାନ୍ତ ଥିଲେ। ତାଙ୍କ ହୃତପିଣ୍ଡର ବାଇପାସ ସର୍ଜରୀ ମଧ୍ୟ ହୋଇଥିଲା। ଗତ କିଛି ଦିନ ହେଲା ତାଙ୍କ ସ୍ବାସ୍ଥ୍ୟ ଅଧିକ ବିଗିଡି ଯାଇଥିଲା।
…
2.
ରାହୁଲଙ୍କୁ ସୁପ୍ରିମକୋର୍ଟଙ୍କ ଭର୍ତ୍ସନା: ପ୍ରକୃତ ଭାରତୀୟ ହୋଇଥିଲେ ଚୀନ ଭୂମି କବଜା କରିଛି କହିନଥାନ୍ତ
ଭାରତୀୟ ସେନା ଉପରେ ଆପତ୍ତିଜନକ ଟିପ୍ପଣୀକୁ ନେଇ କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କୁ ସୁପ୍ରିମକୋର୍ଟ ତୀବ୍ର ଭର୍ତ୍ସନା କରିଛନ୍ତି। ଭାରତର ୨୦୦୦ ବର୍ଗ କିମି ଜମିକୁ ଚୀନ କବଜା କରି ନେଇଛି ତାହା କେମିତି ଜାଣିଲେ? ଏହାର କିଛି ବିଶ୍ୱାସନୀୟ ସୂଚନା ଅଛି କି ବୋଲି ରାହୁଲଙ୍କୁ ସର୍ବୋଚ୍ଚ ନ୍ୟାୟାଳୟ ପ୍ରଶ୍ନ କରିଛନ୍ତି। ଏଥିସହିତ କୋର୍ଟ ତାଙ୍କ ଭାରତୀୟତା ଉପରେ ପ୍ରଶ୍ନ ଉଠାଇଛନ୍ତି। ପ୍ରକୃତ ଭାରତୀୟ ହୋଇଥିଲେ ଏପରି ଟିପ୍ପଣୀ ଦେଇ ନ ଥାନ୍ତେ। ସୀମାରେ ସଂଘର୍ଷ ଚାଲୁ ଥିବାବେଳେ ଆପଣ ଏପରି କହିପାରିବେ କି? ସଂସଦରେ ପ୍ରଶ୍ନ କାହିଁକି ପଚାରି ପାରୁ ନାହାନ୍ତି? ଆପଣ ବିରୋଧୀ ଦଳ ନେତା। ସଂସଦରେ କୁହନ୍ତୁ, ସାମାଜିକ ଗଣମାଧ୍ୟମରେ ନୁହେଁ ବୋଲି ସୁପ୍ରିମକୋର୍ଟ କହିଛନ୍ତି। ଏହା ସହିତ ସେନା ଉପରେ ଆପତ୍ତିଜନକ ଟିପ୍ପଣୀକୁ ନେଇ ରାହୁଲଙ୍କ ବିରୋଧରେ ଲକ୍ଷ୍ନୌ କୋର୍ଟରେ ଚାଲୁଥିବା ମାମଲା ଉପରେ ସୁପ୍ରିମକୋର୍ଟ କଟକଣା ଲଗାଇ ଦେଇଛନ୍ତି। ଏ ନେଇ ଆବେଦନକାରୀ ତଥା ବିଆରଓର ପୂର୍ବତନ ନିର୍ଦ୍ଦେଶକ ଉଦୟ ଶଙ୍କର ଶ୍ରୀବାସ୍ତବ ଏବଂ ଉତ୍ତର ପ୍ରଦେଶ ସରକାରଙ୍କୁ ନୋଟିସ ଜାରି କରିଛନ୍ତି।
..
3.
ଦିଲ୍ଲୀରୁ କଂଗ୍ରେସ ସାଂସଦଙ୍କ ସୁନା ଚେନ୍ ଟାଣି ନେଲେ ଚୋର
ଦିଲ୍ଲୀରେ ନେତାମନ୍ତ୍ରୀମାନେ ବି ଅସୁରକ୍ଷିତ। ଏକ ସଦ୍ୟ ଘଟଣା ଏହାର ପ୍ରମାଣ। ସୋମବାର ସକାଳ ୬ଟାରେ କଂଗ୍ରେସ ସାଂସଦ ସୁଧା ରାମକୃଷ୍ଣନଙ୍କ ବେକରୁ ସୁନା ଚେନ ଟାଣି ନେଇଛନ୍ତି ଚୋର। ଏହି ସମୟରେ ସେ ଚାଣକ୍ୟପୁରୀ ସ୍ଥିତ ତାମିଲନାଡୁ ଭବନ ନିକଟରେ ଡିଏମକେ ସାଂସଦ ସହ ବୁଲୁଥିଲେ। ହଠାତ ଏକ ସ୍କୁଟରରେ ଚୋର ଆସି ତାଙ୍କ ବେକରୁ ଚେନ ଟାଣି ନେଇଥିଲେ। ଏଥିଯୋଗୁଁ ସାଂସଦଙ୍କ ବେକରେ ଆଘାତ ଲାଗିଛି। ଦିଲ୍ଲୀ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ପୋଲିସ, ଲୋକସଭା ବାଚସ୍ପତି ଏବଂ ସ୍ଵରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କୁ ଚିଠି ଲେଖିଛନ୍ତି। ୩୨ ଗ୍ରାମର ସୁନା ଚେନ ଚୋରି ହୋଇଯାଇଛି ବୋଲି କହିଛନ୍ତି। ଏହି ଘଟଣା ବଡ ଝଟକା ଦେଇଥିବା ଉଲ୍ଲେଖ କରିଛନ୍ତି। ସୁଧା ତାମିଲନାଡୁ ମୟୀଲାଦୁଥୁରାଇର କଂଗ୍ରେସ ସାଂସଦ। ସେ ମୌସୁମୀ ଅଧିବେଶନରେ ସାମିଲ ହେବା ପାଇଁ ଦିଲ୍ଲୀ ଆସିଛନ୍ତି।
..
4.
ଆମେରିକା ପ୍ରବାସୀ ନୀତିର ଅନୁଚିତ୍ ଲାଭ ଉଠାଉଛି ଭାରତ: ଟ୍ରମ୍ପଙ୍କ ପରାମର୍ଶଦାତା
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପରେ ତାଙ୍କ ପରାମର୍ଶଦାତା ଷ୍ଟିଫେନ ମିଲର ଭାରତକୁ ନିଶାଣ କରିଛନ୍ତି। ସେ ଭାରତ ବିରୋଧରେ ଗୁରୁତର ଅଭିଯୋଗ ଲଗାଇଛନ୍ତି। ଆମେରିକା ସହ ଭାରତ ସଚ୍ଚୋଟତା ଦେଖାଉ ନାହିଁ। ଆମେରିକାକୁ ନିଜର ଘନିଷ୍ଠ ବନ୍ଧୁ ରାଷ୍ଟ୍ର କହୁଚି, ମାତ୍ର ଆମ ସାମଗ୍ରୀକୁ ମଞ୍ଜୁରୀ ଦେଉ ନାହିଁ। ଆମେରିକା ସାମଗ୍ରୀ ଉପରେ ବିପୁଳ ଟିକସ ଲଗାଉଛି। ଆମେରିକା ପ୍ରବାସୀ ନୀତିର ଭାରତ ଅନୁଚିତ୍ ଲାଭ ଉଠାଉଛି। ଆଉ ଏବେ ଋଷରୁ ତୈଳ କିଣି ୟୁକ୍ରେନ ଯୁଦ୍ଧକୁ ପରୋକ୍ଷରେ ପାଣ୍ଠି ଯୋଗାଉଛି। ଏକ ସାକ୍ଷାତକାରରେ ମିଲର ଏହି ଅଭିଯୋଗ ଲଗାଇଛନ୍ତି। ଋଷରୁ ତୈଳ କିଣିବାକୁ ନେଇ ଆମେରିକା ଚାପ ପ୍ରୟୋଗ କରୁଥିବା ବେଳେ ମିଲର ଏଭଳି ଟିପ୍ପଣୀ ଦେଇ ଦୁଇ ଦେଶ ମଧ୍ଯରେ ବିବାଦକୁ ଉଗ୍ର କରୁଛନ୍ତି। ଏବେ ଚୀନ ଭଳି ଭାରତ ମଧ୍ୟ ଋଷର ବଡ ଗ୍ରାହକ ପାଲଟି ଗଲାଣି ବୋଲି ମିଲର କହିଛନ୍ତି। ତେବେ ଟ୍ରମ୍ପ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବନ୍ଧୁତା ବହୁତ୍ ନିବିଡ଼ ବୋଲି ସେ ମାନିଛନ୍ତି।
..
5.
୨୦୧୩ର କେଦାରନାଥ ଅଘଟଣ: ନିଖୋଜ ୩୦୭୫ ଜଣଙ୍କ କଙ୍କାଳ ଖୋଜା ପୁଣି ଆରମ୍ଭ
୨୦୧୩ ମସିହାରେ କେଦାରନାଥରେ ଆସିଥିଲା ପ୍ରଳୟଙ୍କରୀ ବନ୍ୟା। ଏହା ସୃଷ୍ଟି କରିଥିଲା ବିପର୍ଯ୍ୟୟ। ଦେଖୁ ଦେଖୁ ହଜାର ହଜାର ଲୋକଙ୍କୁ ଭସିଆ ନେଇଥିଲା। କିଏ କୁଆଡେ ଗଲେ କିଛି ବି ଜଣା ପଡ଼ି ନ ଥିଲା। ସେହି ଭୟଙ୍କର ଦୃଶ୍ୟ ମନେ ପଡିଗଲେ ଦେହ ଶୀତେଇ ଯାଉଛି। କିନ୍ତୁ ସେହି ପ୍ରାକୃତିକ ବିପର୍ଯ୍ୟୟର ଶିକାର ୩୦୭୫ ଜଣ ଏବେ ବି ନିଖୋଜ ଅଛନ୍ତି। ସେମାନଙ୍କ କୌଣସି ଖୋଜ ଖବର ମିଳି ପାରିନାହିଁ। ଏହି ଲୋକଙ୍କ ସନ୍ଧାନ ଲାଗି ପୁଣି ଆରମ୍ଭ ହୋଇପାରେ ଉଦ୍ଧାର ଅଭିଯାନ। ଏ ନେଇ ଉତ୍ତରାଖଣ୍ଡ ହାଇକୋର୍ଟରେ ଆବେଦନ ଦାଏର କରାଯାଇଛି। ନିଖୋଜ ଲୋକଙ୍କ କଙ୍କାଳ ଖୋଜି ସମ୍ମାନ ପୂର୍ବକ ଅନ୍ତିମ ସଂସ୍କାର କରିବାକୁ ନିବେଦନ କରାଯାଇଥିଲା। ସରକାର ଏ ପର୍ଯ୍ୟନ୍ତ କେଦାରନାଥକୁ ଚାରି ଥର ଟିମ୍ ପଠାଇ ଲେଣି। ଏହା ପୂର୍ବରୁ ଅଘଟଣର ୭ ବର୍ଷ ପରେ ୨୦୨୦ରେ ଚଟି ଏବଂ ଗୋମୁଖ କ୍ଷେତ୍ରରୁ ୭୦୩ କଙ୍କାଳ ଉଦ୍ଧାର କରାଯାଇଥିଲା।
..
6.
ବୋଇଂରେ ଲଢୁଆ ବିମାନ ନିର୍ମାଣ କାର୍ଯ୍ୟ ବନ୍ଦ: ୩,୨୦୦ କର୍ମଚାରୀଙ୍କ ଅନଶନ
ବୋଇଂ କମ୍ପାନୀକୁ ବଡ଼ ଝଟକା ଲାଗିଛି। କମ୍ପାନୀର ସବୁ କାମ ବନ୍ଦ୍ ହୋଇଯାଇଛି। ପ୍ରାୟ ୩,୨୦୦ କର୍ମଚାରୀଙ୍କ ଅନଶନ ପାଇଁ ଲଢୁଆ ବିମାନ ଏବଂ ଅନ୍ୟ ବିମାନ ଉପକରଣ ନିର୍ମାଣ ସହିତ ରକ୍ଷଣାବେକ୍ଷଣ କାର୍ଯ୍ୟ ବନ୍ଦ ହୋଇଯାଇଛି। ଶ୍ରମ ଚୁକ୍ତିକୁ ନେଇ ସହମତି ହୋଇ ନ ପାରିବାରୁ ଏହି କର୍ମଚାରୀ ଏଭଳି ପଦକ୍ଷେପ ନେଇଛନ୍ତି। କର୍ମଚାରୀଙ୍କ ଅନୁଯାୟୀ ସେମାନେ ଗୁରୁତ୍ୱପୂର୍ଣ୍ଣ ବିମାନ ଏବଂ ପ୍ରତିରକ୍ଷା ବ୍ୟବସ୍ଥା ନିର୍ମାଣ କରୁଛନ୍ତି। ପରିବାରର ଆର୍ଥିକ ସୁରକ୍ଷା ସୁନିଶ୍ଚିତ କରିବା ପାଇଁ ଏବଂ ଅଭିଜ୍ଞତାର ମୂଲ୍ୟ ଦେବା ପାଇଁ ଭଲ ଚୁକ୍ତି ଚାହୁଁଛନ୍ତି। ଏଥିପାଇଁ ରବିବାର ରାତିରୁ ଅନଶନ କରାଯାଉଛି। ଏହି କମ୍ପାନୀକୁ ୭ ହଜାର ଲଢୁଆ ବିମାନର ଠିକା ମିଳିଛି। କିନ୍ତୁ କର୍ମଚାରୀଙ୍କ ଏପରି ପଦକ୍ଷେପ ଯୋଗୁଁ ଏ ସବୁକୁ ୨ ବର୍ଷ ଭିତରେ ନିର୍ମାଣ କରିବା କଠିନ ହେବ ବୋଲି କୁହାଯାଉଛି।
…
7.
ଅଷ୍ଟ୍ରେଲିଆ ଗ୍ରସ୍ତ ଲାଗି ଭାରତୀୟ ଦଳରେ ୩ ଓଡ଼ିଆ ହକି ଖେଳାଳି
ଆଗାମୀ ଅଷ୍ଟ୍ରେଲିଆ ଗ୍ରସ୍ତ ଲାଗି ସୋମବାର ଭାରତୀୟ ସିନିଅର ପୁରୁଷ ହକି ଦଳ ଘୋଷଣା ହୋଇଛି l ହକି ଇଣ୍ଡିଆ ପକ୍ଷରୁ ଘୋଷିତ ୨୪ ଜଣିଆ ଦଳରେ ଓଡ଼ିଶା ରୁ ୩ ଜଣ ଖେଳାଳି ସ୍ଥାନ ପାଇଛନ୍ତି l ସେମାନେ ହେଲେ ଡ୍ଡିଫେଣ୍ଡର ଅମିତ ରୋହିଦାସ, ନିଲମ୍ ସଂଜୀପ ଖେସ ଓ ଫରୱାର୍ଡ ଶିଳାନନ୍ଦ ଲାକ୍ରା l ସେହିଭଳି ଅଭିଜ୍ଞ ଡି ଫେଣ୍ଡର୍ ହର୍ମନପ୍ରୀତ ସିଂହ ଅଧିନାୟକ ଦାୟିତ୍ଵ ବଜାୟ ରଖିଛନ୍ତି l ଚଳିତ ମାସ ଦ୍ୱିତୀୟ ସପ୍ତାହ ରେ ଭାରତୀୟ ହକି ଦଳ ଅଷ୍ଟଲିଆ ଗ୍ରସ୍ତ ରେ ଯିବ l ସେଠାରେ ଅଗଷ୍ଟ ୧୫ ରୁ ୨୧ ମଧ୍ୟରେ ୪ଟି ମ୍ୟାଚ୍ ଖେଳିବ l ସମସ୍ତ ମ୍ୟାଚ୍ ପର୍ଥ ଷ୍ଟାଡିୟମ୍ ରେ ଅନୁଷ୍ଠିତ ହେବ l ଏହି ୪ଟି ମ୍ୟାଚ୍ ଏସିଆ କପ୍ ପୂର୍ବରୁ ଭାରତୀୟ ଦଳର ପୂର୍ବ ପ୍ରସ୍ତୁତି ରେ ସହାୟକ ହେବ l ଏସିଆ କପ୍ ହକି ଟୁରଣ୍ଣାମେଣ୍ଟ ଅଗଷ୍ଟ ୨୯ ରୁ ବିହାର ର ରାଜଗିରି ରେ ଖେଳାଯିବ l
…
8.
ସ୍ପେସ୍ଏକ୍ସର ପୁଣି ସଫଳତା: ୨୩ଟି ଷ୍ଟାରଲିଙ୍କ୍ ଉପଗ୍ରହ ମହାକାଶକୁ ପ୍ରେରଣ
ସ୍ପେସ୍ଏକ୍ସ ନିଜର ଫାଲକନ୍ ୯ ରକେଟ୍ ସାହାଯ୍ୟରେ ପୁଣି ୨୩ଟି ଷ୍ଟାରଲିଙ୍କ୍ ଉପଗ୍ରହକୁ ସଫଳତାର ସହ ମହାକାଶକୁ ପଠାଇଛି। ଏହି ଉତକ୍ଷେପଣ ଆମେରିକାର ଫ୍ଲୋରିଡା ସ୍ଥିତ କେପ୍ କାନାଭେରାଲ୍ରୁ କରାଯାଇଥିଲା। ବିଶେଷ କଥା ହେଉଛି, ରକେଟର ପ୍ରଥମ ପର୍ଯ୍ୟାୟ ଉତକ୍ଷେପଣର ପ୍ରାୟ ୮.୫ ମିନିଟ୍ ପରେ ଆଟଲାଣ୍ଟିକ ମହାସାଗରରେ ଥିବା ଏକ ଭାସମାନ ପ୍ଲାଟଫର୍ମକୁ ସୁରକ୍ଷିତ ଭାବେ ଫେରିଆସିଛି। ଚଳିତ ବର୍ଷ ଏହା ସ୍ପେସ୍ଏକ୍ସର ୯୬ତମ ଫାଲକନ୍ ୯ ମିଶନ। ଷ୍ଟାରଲିଙ୍କ୍ ପ୍ରକଳ୍ପ ମାଧ୍ୟମରେ କମ୍ପାନୀ ବିଶ୍ଵର ବିଭିନ୍ନ ସ୍ଥାନରେ ହାଇ-ସ୍ପିଡ୍ ଇଣ୍ଟରନେଟ୍ ସେବା ଯୋଗାଉଛି।
…
9.
ରାଜ୍ୟରେ ଖୋଲିଲା ଭ୍ରାମ୍ୟମାଣ ପ୍ରବାସୀ ସାଧନ କେନ୍ଦ୍ର, ରହିବ ଟୋଲ ଫ୍ରି ନମ୍ବର
ରାଜ୍ୟରେ ଆରମ୍ଭ କରାଯାଇଛି ଭ୍ରାମ୍ୟମାଣ ପ୍ରବାସୀ ସାଧନ କେନ୍ଦ୍ର । ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ ମଙ୍ଗଳବାର ଏହାର ଶୁଭାରମ୍ଭ କରିଛନ୍ତି । ଜାତିସଂଘ ଓ ଅନ୍ୟାନ୍ୟ ସ୍ୱେଚ୍ଛାସେବୀ ସଂସ୍ଥା ସହାୟତାରେ ଏହି କାର୍ଯ୍ୟକ୍ରମ ଆରମ୍ଭ କରାଯାଇଛି । ରାଜ୍ୟରୁ ବିଭିନ୍ନ ସ୍ଥାନକୁ ଯାଉଥିବା ଶ୍ରମିକମାନେ ବିଭିନ୍ନ ସମୟରେ ସମସ୍ୟାରେ ପଡ଼ୁଛନ୍ତି । ଏମାନଙ୍କୁ ସହଯୋଗ କରିବାକୁ ଏବଂ ପ୍ରବାସୀଙ୍କ ସମସ୍ୟା ଦୂର କରିବାକୁ ରାଜ୍ୟ ସରକାର ଏହି ପଦକ୍ଷେପ ନେଇଛନ୍ତି । ବିଶେଷ କରି ପ୍ରଥମ ଫସଲ ପରେ ଦାଦନ ଯାଉଥିବା ଲୋକଙ୍କୁ ରାଜ୍ୟ ଭିତରେ ବିକଳ୍ପ ରୋଜଗାର କିମ୍ବା ଅନ୍ୟାନ୍ୟ ଚାଷର ସୁବିଧା ଯୋଗାଇଦେବାକୁ ଏହି ସାଧନ କେନ୍ଦ୍ର ପରାମର୍ଶ ଦେବ । ଏହି କେନ୍ଦ୍ର ପକ୍ଷରୁ ଏକ ଟୋଲ ଫ୍ରି ନମ୍ବର ମଧ୍ୟ ବ୍ୟବସ୍ଥା କରାଯାଇଛି ।
….
10.
ସ୍ପଷ୍ଟ ହେଲା, ପହଲଗାଓଁ ଆକ୍ରମଣକାରୀ ତିନିହେଁ ଥିଲେ ପାକିସ୍ତାନୀ
ପହଲଗାଓଁ ଆତଙ୍କୀ ଆକ୍ରମଣରେ ଜଡ଼ିତ ତିନି ଆତଙ୍କବାଦୀ ଥିଲେ ପାକିସ୍ତାନର ନାଗରିକ । ଭାରତୀୟ ସେନା ଏହା ସ୍ପଷ୍ଟ କରିଛି । ଗତ ମାସ ୨୮ ତାରିଖରେ ଜମ୍ମୁ-କାଶ୍ମୀରର ଦଚିଗାମ ଠାରେ ‘ଅପରେସନ ମହାଦେବ’ରେ ସେନା ତିନି ଆତଙ୍କୀଙ୍କୁ ଏନକାଉଣ୍ଟର କରିଥିଲା । ଏପ୍ରିଲ ୨୨ ପହଲଗାଓଁ ଆକ୍ରମଣ ପରଠାରୁ ଏମାନେ ଦଚିଗାମ ଜଙ୍ଗଲରେ ଲୁଚି ରହିଥିଲେ । ଏମାନେ ପାକ୍ ସମର୍ଥିତ ଲସ୍କର-ଇ-ତୋଇବା ଆତଙ୍କବାଦୀ ସଙ୍ଗଠନର ସଦସ୍ୟ । ମୃତ ଆତଙ୍କବାଦୀଙ୍କ ଠାରୁ ମିଳିଛି ପାକିସ୍ତାନର ଭୋଟର କାର୍ଡ, ସାଟେଲାଇଟ ଫୋନ୍ ଏବଂ ଅନ୍ୟାନ୍ୟ ନଥିପତ୍ର । ଏଥିରୁ ସେମାନଙ୍କ ପାକିସ୍ତାନର ନାଗରିକତ୍ୱ ସ୍ପଷ୍ଟ ହୋଇଥବା ସେନା କହିଛି । ତିନି ଆତଙ୍କବାଦୀଙ୍କ ପରିଚୟ ହେଲା, ସୁଲେମାନ ଶାହ ଓରଫ ଫୈଜଲ ଜାଟ୍, ଅବୁ ହମଜା ଓରଫ ଆଫଗାନୀ ଏବଂ ୟାସିର ଓରଫ ଜିବରାନ୍ ।
…
11.
ଚୂଡ଼ାନ୍ତ ରାଉଣ୍ଡ ନାମ ଲେଖା ପାଇଁ ଆଇଆଇଏମସିର ପକ୍ଷରୁ ଆବେଦନ ଆହ୍ୱାନ
ଭାରତୀୟ ଜନସଂଚାର ସଂସ୍ଥାନ-ଆଇଆଇଏମସି ପକ୍ଷରୁ ୨୦୨୫-୨୬ ଶିକ୍ଷାବର୍ଷ ପାଇଁ ତୃତୀୟ ଓ ଅନ୍ତିମ ପର୍ଯ୍ୟାୟ ସ୍ପଟ ନାମଲେଖା ଜାରି ରହିଛି । ସଂସ୍ଥାର ଢେଙ୍କାନାଳ କ୍ୟାମ୍ପସରେ ତିନୋଟି ଡିପ୍ଲୋମା ପାଠ୍ୟକ୍ରମରେ ଖାଲି ପଦବି ରହିଛି । ସେଗୁଡ଼ିକ ମଧ୍ୟରେ କର୍ପୋରେଟ ଯୋଗାଯୋଗ ଏବଂ ବ୍ରାଣ୍ଡ ପରିଚାଳନାରେ ୯ଟି, ଇଂରାଜୀ ସାମ୍ବାଦିକତାରେ ୧୫ଟି ଏବଂ ଓଡ଼ିଆ ସାମ୍ବାଦିକତାରେ ୧୪ଟଇ ଆସନ ଫାଙ୍କା ଅଛି । ଅଧିକାଂଶ ଖାଲି ଆସନ ଅନୁସୂଚିତ ବର୍ଗଙ୍କ ପାଇଁ ସଂରକ୍ଷିତ । ଯୋଗ୍ୟ ଛାତ୍ରଛାତ୍ରୀଙ୍କ ପାଇଁ ଛାତ୍ରବୃତ୍ତି ଓ ଆର୍ଥିକ ସହାୟତାର ବ୍ୟବସ୍ଥା ରହିଛି । ପାଠ୍ୟକ୍ରମ ଗୁଡ଼ିକର ତାଲିକା ଏବଂ ଆସନ ସଂଖ୍ୟା ବିବରଣୀ କାଉନସେଲିଂ ପୋର୍ଟାଲ ଷଗ୍ଧଗ୍ଧକ୍ଟ୍ରଗ୍ଦ://ସସଜ୍ଞମ.ବୟଜ୍ଞସଗ୍ଦଗ୍ଦସକ୍ଟଦ୍ଭଗ୍ଦ.ଦ୍ଭସମ.ସଦ୍ଭ ରେ ଉପଲବ୍ଧ । ଓଡ଼ିଆ ସାମ୍ବାଦିକତା ପାଠ୍ୟକ୍ରମ ପାଇଁ ଆଗ୍ରହୀ ଛାତ୍ରଛାତ୍ରୀମାନେ ସେମାନଙ୍କ ଆବେଦନକୁ ଢେଙ୍କାନାଳ ଆଇଆଇଏମସିର ଇ-ମେଲ ସସଜ୍ଞମୟଳକ୍ଷଅଚ୍ଚବଷକ୍ଟକ୍ଟ.ମକ୍ଟ.ସଦ୍ଭ କୁ ପଠାଇ ପାରିବେ ।
…
12.
ପ୍ରଧାନମନ୍ତ୍ରୀ ମାତୃ ବନ୍ଦନା ଯୋଜନା ପଂଜିକରଣ ଅବଧି ଅଗଷ୍ଟ ୧୫କୁ ବୃଦ୍ଧି
କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରାଳୟ ପକ୍ଷରୁ ଦେଶରେ ଲାଗୁ ହୋଇଛି ପ୍ରଧାନମନ୍ତ୍ରୀ ମାତୃ ବନ୍ଦନା ଯୋଜନା । ଏହି ଯୋଜନାରେ ପଂଜିକରଣ ଅବଧିକୁ ଆସନ୍ତା ଅଗଷ୍ଟ ୧୫ ତାରିଖ ପର୍ଯ୍ୟନ୍ତ ବୃଦ୍ଧି କରାଯାଇଛି । ଆଶା, ଅଙ୍ଗନବାଡ଼ି କର୍ମୀ ଗ୍ରାମାଞ୍ଚଳରେ ଘରକୁ ଘର ବୁଲି ଏହି ଯୋଜନା ସମ୍ପର୍କରେ ହିତାଧିକାରୀମାନଙ୍କୁ ଅବଗତ କରାଉଛନ୍ତି । ଏହି ଯୋଜନା ଆରମ୍ଭରୁ ୩୧ ଜୁଲାଇ ୨୦୨୫ ମଧ୍ୟରେ ମୋଟ ୪.୦୫ କୋଟି ହିତାଧିକାରୀଙ୍କୁ ଆର୍ଥିକ ସୁବିଧା ଦିଆଯାଇଛି । ସେମାନଙ୍କୁ ପ୍ରାୟ ୧୯ ହଜାର ୨୮ କୋଟି ଟଙ୍କା ପ୍ରଦାନ କରାଯାଇଛି । ଏହି ଯୋଜନାରେ ପ୍ରଥମ ସନ୍ତାନ ଜନ୍ମ ପରେ ଦୁଇଟି କିସ୍ତିରେ ୫ ହଜାର ଟଙ୍କା ପ୍ରଦାନ କରାଯାଉଛି । ଦ୍ୱିତୀୟ ସନ୍ତାନ ଝିଅ ହୋଇଥିଲେ ୬ ହଜାର ଟଙ୍କା ଗୋଟିଏ କିସ୍ତିରେ ପ୍ରଦାନ କରାଯାଉଛି ।
…
13.
ଭୁଲ ରନୱେରେ ଓହ୍ଲାଇଲା ରାଜସ୍ଥାନ ମୁଖ୍ୟମନ୍ତ୍ରୀଙ୍କୁ ନେଇ ଯାଉଥିବା ଚାର୍ଟର୍ଡ ପ୍ଲେନ
ଭୁଲ ରନୱେ ରେ ଓହ୍ଲାଇଲା ଚାର୍ଟାର୍ଡ ପ୍ଲେନ । ପ୍ଲେନରେ ଥିଲେ ରାଜସ୍ଥାନ ମୁଖ୍ୟମନ୍ତ୍ରୀ ଭଜନଲାଲ ଶର୍ମା । ଜୁଲାଇ ୩୧ ତାରିଖ ଅପରାହ୍ଣର ଘଟଣା । ଫାଲକନ ୨୦୦୦ ବିମାନଟି ଦିଲ୍ଲୀରୁ ଟେକ୍ ଅପ୍ କରିଥିଲା । ଓହ୍ଲାଇବା କଥା ଫାଲୋଡି ଏୟାରଫୋର୍ସ ଷ୍ଟେସନରେ । ଏହାର ୫ କିଲୋମିଟର ଦୂରରେ ଥିଲା ସିଭିଲ ଏୟାରଷ୍ଟ୍ରିପ୍ । ପାଇଲଟ ନିଜର ଧାର୍ଯ୍ୟ ରନୱେକୁ ଠାବ କରିବା ପରିବର୍ତ୍ତେ ସିଭିଲ ଏୟାରଷ୍ଟ୍ରିପ୍ ରନୱେରେ ଓହ୍ଲାଇ ପଡ଼ିଥିଲେ । ପରେ ପାଇଲଟ ତୁରନ୍ତ ନିଜର ତ୍ରୁଟି ଜାଣି ପାରିଥିଲେ । କାଳବିଳମ୍ବ ନ କରି ପାଇଲ ବିମାନକୁ ପୁଣି ଟେକଅପ୍ କରି ଫାଲୋଡି ଏୟାରଫୋର୍ସ ଷ୍ଟେସନରେ ଅବତରଣ କରିଥିଲେ । ଘଟଣାର ତଦନ୍ତ ପାଇଁ ଡିଜିସିଏ ନିଦେ୍ର୍ଦଶ ଦେଇଛି ।
…
14.
ପଞ୍ଚମ ଟେଷ୍ଟ ରେ ଭାରତର ରୋମାଞ୍ଚକ ବିଜୟ; ୨-୨ ରେ ଡ୍ର ରହିଲା ସିରିଜ
ଭାରତ ଓ ଇଂଲଣ୍ଡ ମଧ୍ୟରେ ଅନୁଷ୍ଠିତ ନିର୍ଣ୍ଣାୟକ ୫ମ ଟେଷ୍ଟ ରୋମାଞ୍ଚକ ଭାବେ ସମାପ୍ତ ହୋଇଛି l ଭ୍ରମଣକାରୀ ଭାରତ ପକ୍ଷରୁ ଧାର୍ଯ୍ୟ ୩୭୪ ରନର ଟାର୍ଗେଟ କୁ ପିଛା କରି ଇଂଲଣ୍ଡ ଅନ୍ତିମ ତଥା ୫ମ ଦିବସରେ ୩୬୭ ରନ କରି ୨ୟ ଇନିଂସରେ ଅଲ ଆଉଟ୍ ହୋଇ ଯାଇଥିଲା l ଫଳରେ ଏହି ଗୁରୁତ୍ବପୂର୍ଣ୍ଣ ମ୍ୟାଚକୁ ୬ ରନ ରେ ଜିତି ଭାରତ ଟେଷ୍ଟ ସିରିଜ୍ କୁ ୨-୨ ରେ ଡ୍ର ରଖି ଅଭିଯାନ ଶେଷ କରିଛିl ପଞ୍ଚମ ଟେଷ୍ଟ ର ୫ମ ଦିନରେ ଇଂଲଣ୍ଡ କୁ ଜିତିବା ଲାଗି ୩୫ ରନ ଓ ଭାରତ ପାଇଁ ୪ ୱିକେଟ ଆବଶ୍ୟକ ହେଉଥିଲା l ତେବେ ମହମ୍ମଦ ସିରାଜ ୩ ଓ ପ୍ରସିଦ୍ଧ କ୍ରିଷ୍ଣା ଗୋଟିଏ ୱିକେଟ ଆଜି ବାଣ୍ଟି ନେଵାରୁ ଇଂଲଣ୍ଡ ବିଜୟ ଠାରୁ ୭ ରନ ଦୂରରେ ରହି ଯାଇଥିଲା l ମୋଟ ୮ଟି ୱିକେଟ ନେଇଥିବା ସିରାଜ ମ୍ୟାଚ ର ଶ୍ରେଷ୍ଠ ଖେଳାଳି ହୋଇଥିଲେ । ମାତ୍ର ୬ ରନରେ ଏହି ମ୍ୟାଚକୁ ଜିତି ଭାରତ ଏହାର ଟେଷ୍ଟ କ୍ରିକେଟ ଇତିହାସରେ ରନ ବ୍ୟବଧାନରେ ସର୍ବନିମ୍ନ ବିଜୟ ହାସଲ କରିଛି l ଏଥି ପୂର୍ବରୁ ୨୦୦୪ ରେ ଅଷ୍ଟ୍ରେଲିଆ ବିପକ୍ଷରେ ଭାରତ ୧୩ ରନରେ ଜିତିଥିଲା l
…
15.
ବାଙ୍କେ ବିହାରୀ ମନ୍ଦିର କରିଡର ମାମଲାରେ ୟୁୂପି ସରକାରଙ୍କୁ ସୁପ୍ରିମକୋର୍ଟଙ୍କ ସମାଲୋଚନା
ଉତ୍ତର ପ୍ରଦେଶ ସରକାରଙ୍କୁ ସୁପ୍ରିମକୋର୍ଟରେ ସମାଲୋଚିତ ହେବାକୁ ପଡ଼ିଛି । ବାଙ୍କେ ବିହାରୀ ମନ୍ଦିର କରିଡର ମାମଲାରେ ସୁପ୍ରିମକୋର୍ଟ ଏହି ମନ୍ତବ୍ୟ ଦେଇଛନ୍ତି । ମନ୍ଦିର ପରିଚାଳନା କମିଟି ମଧ୍ୟ ସମାଲୋଚନାରୁ ବାଦ୍ ପଡ଼ିନାହିଁ । କୋର୍ଟ କହିଛନ୍ତି, ମନ୍ଦିର କାହାର ବ୍ୟକ୍ତିଗତ ହୋଇପାରେ, ଠାକୁର ସମସ୍ତଙ୍କର । ମନ୍ଦିରକୁ ଲକ୍ଷ ଲକ୍ଷ ଶ୍ରଦ୍ଧାଳୁ ଆସୁଛନ୍ତି । ମନ୍ଦିର ପାଣ୍ଠିକୁ ଶ୍ରଦ୍ଧାଳୁଙ୍କ ସୁବିଧା ଓ ସୁରକ୍ଷା ସହିତ ଜଡ଼ିତ ଉନ୍ନୟନମୂଳକ କାର୍ଯ୍ୟରେ କାହଇକି ବିନିଯୋଗ କରାଯାଇପାରିବନି? ମନ୍ଦିର କମିଟି କଣ ପୁରା ପାଣ୍ଠିକୁ ନିଜ ପକେଟରେ ରଖିବାକୁ ଚାହୁଁଛି ବୋଲି କୋର୍ଟ ପ୍ରଶ୍ନ କରିଛନ୍ତି । ରାଜ୍ୟ ସରକାରଙ୍କୁ ମଧ୍ୟ ତରବରିଆ ଅଧ୍ୟାଦେଶ ଜାରିର କାରଣ ସମ୍ପର୍କରେ ପ୍ରଶ୍ନ କରିଥିଲେ ।
…
16.
ମନ୍ତ୍ରୀଙ୍କ ସୂଚନା, ହଷ୍ଟେଲ ଛାତ୍ରଛାତ୍ରୀଙ୍କୁ ମିଳିବ ଡିଜିଟାଲ ହେଲଥ୍ କାର୍ଡ
ହଷ୍ଟେଲରେ ରହୁଥିବା ଛାତ୍ରଛାତ୍ରୀମାନଙ୍କ ପାଇଁ ରାଜ୍ୟ ସରକାର ଏକ ନୂଆ ଯୋଜନା ଆରମ୍ଭ କରୁଛନ୍ତି । ଛାତ୍ରଛାତ୍ରୀଙ୍କୁ ମିଳିବ ଡିଜିଟାଲ ହେଲଥ କାର୍ଡ । ଛାତ୍ରଛାତ୍ରୀଙ୍କ ସ୍ୱାସ୍ଥ୍ୟ ଅବସ୍ଥାର ଉତ୍ତମ ତଦାରଖ ଏବଂ ଚିକିତ୍ସାକୁ ସୁନିଶ୍ଚିତ କରିବା ରାଜ୍ୟ ସରକାରଙ୍କ ଉଦେ୍ଦଶ୍ୟ । ଏହି ସୂଚନା ଦେଇଛନ୍ତି ରାଜ୍ୟ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ । ଏହି ପଦକ୍ଷେପକୁ ସ୍କୁଲ ଓ ଗଣଶିକ୍ଷା ବିଭାଗ ବିକଶିତ କରୁଛି । କାର୍ଡ ଗୁଡ଼ିକରେ ପିଲାମାନଙ୍କର ବିସ୍ତୃତ ସ୍ୱାସ୍ଥ୍ୟ ଇତିହାସ ରହିବ । ଏହା ସମୟାନୁସାରେ ରୋଗ ନିର୍ଣ୍ଣୟ ଏବଂ ତାହାର ଚିକିତ୍ସା ଦିଗରେ ସହାୟତା କରିବ ।
…
17.
ଜମ୍ମୁ-କାଶ୍ମୀର ଫେରି ପାଇବ କି ରାଜ୍ୟ ମାନ୍ୟତା ? ଚାଲିଲାଣି ଚର୍ଚ୍ଚା
ଦିଲ୍ଲୀର ରାଜନୈତିକ ମହଲରେ ଏବେ ଆରମ୍ଭ ହୋଇଯାଇଛି ଚର୍ଚ୍ଚା । ଜମ୍ମୁ-କାଶ୍ମୀର ରାଜ୍ୟ ମାନ୍ୟତା ଫେରି ପାଇବ କି? । ସୋସିଆଲ ମିଡିଆରେ ମଧ୍ୟ ଏଭଳି ଚର୍ଚ୍ଚା ଜୋର୍ ଧରିଛି । ନିକଟରେ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ଜମ୍ମୁ-କାଶ୍ମୀର ଗସ୍ତରେ ଯାଇଥିଲେ । ସେଠାରେ ସେ ରାଜ୍ୟ ବିଜେପି ମୁଖ୍ୟ ଏବଂ ଲଦାଖର ଉପରାଜ୍ୟପାଳଙ୍କ ସମେତ ବିଭିନ୍ନ ଦଳର ନେତାଙ୍କୁ ଭେଟିଥିଲେ । ଦିନେ ତଳେ ପ୍ରଧାନମନ୍ତ୍ରୀ ଓ ସ୍ୱରାଷ୍ଟ୍ର ମନ୍ତ୍ରୀ ରାଷ୍ଟ୍ରପତିଙ୍କୁ ଭେଟିଥିଲେ । ତେଣୁ ସମ୍ଭବତଃ ଜମ୍ମୁ-କାଶ୍ମୀରକୁ ପୁଣି ରାଜ୍ୟ ମାନ୍ୟତା ଦେବାକୁ ଆଲୋଚନା ହେଉଛି । ଏହି ଚର୍ଚ୍ଚା ଜୋର୍ ଧରିଛି । ୨୦୧୯ ଅଗଷ୍ଟ ୫ ତାରିଖରେ ଧାରା-୩୭୦ ଉଚ୍ଛେଦ କରାଯାଇଥିଲା । ଜମ୍ମୁ-କାଶ୍ମୀରକୁ ଦୁଇଟି କେନ୍ଦ୍ରଶାସିତ ଅଞ୍ଚଳ ଜମ୍ମ-କାଶ୍ମୀର ଏବଂ ଲଦାଖ ଭାବେ ମାନ୍ୟତା ଦିଆଯାଇଥିଲା । ୨୦୨୪ରେ ବିଧାନସଭା ନିର୍ବାଚନ ହୋଇ ନୂଆ ସରକାର ଗଠନ ହୋଇଥିଲା ।
…
18.
ପାଞ୍ଚ ବର୍ଷରେ ଧରାପଡ଼ିଲାଣି ୭.୦୮ ଲକ୍ଷ କୋଟି ଟଙ୍କାର ଜିଏସଟି ଠକେଇ
ଦେଶରେ ବଢ଼ି ଚାଲିଛି ଜିଏସଟି ଠକେଇ । ଗତ ୫ ବର୍ଷରେ ୭.୦୮ ଲକ୍ଷ କୋଟିର ସାମଗ୍ରୀ ଓ ସେବା ଟିକସ-ଜିଏସଟି ଠକେଇ ଧରାପଡ଼ିଛି । ଏହା ମଧ୍ୟରେ ସାମିଲ ଅଛି ୧.୭୯ ଲକ୍ଷ କୋଟିର ଇନପୁଟ ଟିକସ କ୍ରେଡିଟ । ଲୋକସଭାରେ ଏହି ସୂଚନା ଦେଇଛନ୍ତି ଅର୍ଥ ରାଷ୍ଟ୍ରମନ୍ତ୍ରୀ ପଙ୍କଜ ଚୌଧୁରୀ । ୨୦୨୪-୨୫ରେ ସିଜିଏସଟି ଅଧିକାରୀମାନେ ୨.୨୩ ଲକ୍ଷ କୋଟି ଟଙ୍କାର ଜିଏସଟି ଚୋରି ଧରିଥିଲେ । ୨୦୨୫-୨୬ରେ ୩୦,୦୫୬ କୋଟିର ପରୋକ୍ଷ ଟିକଓ ଠକେଇ ଧରାପଡ଼ିଥିଲା । ୨୦୨୩-୨୪ରେ ୨.୩୦ ଲକ୍ଷ କୋଟିର ଜିଏସଟି ଚୋରି ଠାବ ହୋଇଥିଲା । ଏଥିରେ ୩୭,୩୭୪ କୋଟିର ଆଇଟିସି ଠକେଇ ରହିଛି ।
…
19.
ଟ୍ରମ୍ପଙ୍କ ଟାରିଫ ନୀତିରେ ବିଶ୍ୱବ୍ୟାପୀ ସେୟାର ବଜାରରେ ହଲଚଲ, ବାଦ ପଡ଼ିନି ଆମେରିକା
ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ଟାରିଫ ନୀତିରେ ପ୍ରଭାବ ବିଶ୍ୱ ଆର୍ଥିକ ବଜାରରେ ପଡ଼ିଛି । ଅନେକ ଦେଶର ସେୟାର ବଜାର ଏଥିରେ ହଲଚଲ ହୋଇଛି । ଖୋଦ୍ ଆମେରିକାର ଷ୍ଟକ ବଜାରରେ ମଧ୍ୟ ଏହାର ପ୍ରଭାବ ଦେଖିବାକୁ ମିଳିଛି । ସେତିକି ନୁହେଁ ବିଶ୍ୱର ବଡ଼ ବଡ଼ ଧନୀଙ୍କ ସମ୍ପତ୍ତିକୁ ମଧ୍ୟ ଧକ୍କା ଲାଗିଛି । ଗତ ୨୪ ଘଣ୍ଟା ମଧ୍ୟରେ ଅରବପତି ଜେଫ୍ ବେଜୋସ ୩୪ ହଜାର କୋଟି ଟଙ୍କା ହରାଇଛନ୍ତି । ଲ୍ୟାରୀ ଏଲିସନ ୮୬,୮୩୦ କୋଟିରୁ ଅଧିକ ଟଙ୍କା ହରାଇଛନ୍ତି । ମାର୍କ ଜୁକ୍କରବର୍ଗ ହରାଇଛନ୍ତି ୭୦,୬୩୬ କୋଟିରୁ ଅଧିକ । ଏଲନ ମସ୍କ ମଧ୍ୟ ୮୦ ବିଲିଅନ ଡଲାରର ସମ୍ପତ୍ତିି ହରାଇଛନ୍ତି ।
…
20.
ଭଦ୍ରକ ଜିଲ୍ଲା କୋର୍ଟରେ ୩୫ ପଦବୀ ପାଇଁ ନିଯୁକ୍ତି
ଭଦ୍ରକ ଜିଲ୍ଲା କୋର୍ଟ ପକ୍ଷରୁ ଜୁନିଅର ଟାଇପିଷ୍ଟ, ଷ୍ଟେନୋଗ୍ରାଫର, କିରାଣି ଏବଂ ସାଲାରିଡ୍ ଅମିନ ଭଳି ମୋଟ ୩୫ଟି ପଦବୀ ପାଇଁ ନିଯୁକ୍ତି ବିଜ୍ଞପ୍ତି ପ୍ରକାଶ ପାଇଛି। ଇଚ୍ଛୁକ ଏବଂ ଯୋଗ୍ୟ ପ୍ରାର୍ଥୀମାନେ ଅଫଲାଇନ୍ ମାଧ୍ୟମରେ ଆବେଦନ କରିପାରିବେ। ଏଥିପାଇଁ ଶିକ୍ଷାଗତ ଯୋଗ୍ୟତା ଦଶମ ପାସ୍ ସହିତ ଡିପ୍ଲୋମା ରଖାଯାଇଛି। ଆବେଦନକାରୀଙ୍କ ବୟସ ସୀମା ୧୮ରୁ ୩୨ ବର୍ଷ ମଧ୍ୟରେ ହେବା ଆବଶ୍ୟକ। ଏହି ପଦବୀଗୁଡ଼ିକ ପାଇଁ କୌଣସି ଆବେଦନ ଶୁଳ୍କ ଦେବାକୁ ପଡ଼ିବ ନାହିଁ। ଆବେଦନ ପତ୍ର ଦାଖଲ କରିବାର ଶେଷ ତାରିଖ ଅଗଷ୍ଟ ୩୦, ୨୦୨୫ ରହିଛି। ଅଧିକ ବିବରଣୀ ପାଇଁ ପ୍ରାର୍ଥୀମାନେ କୋର୍ଟର ୱେବସାଇଟ୍ bhadrak.dcourts.gov.in ଦେଖିପାରିବେ।
…..
21.
ଦେବଗଡ଼, ଢେଙ୍କାନାଳ ଓ ପୁରୀରେ ଅଙ୍ଗନବାଡ଼ି ନିଯୁକ୍ତି
ଓଡ଼ିଶା ସରକାରଙ୍କ ମହିଳା ଓ ଶିଶୁ ବିକାଶ ବିଭାଗ ପକ୍ଷରୁ ୭ଟି ଅଙ୍ଗନବାଡ଼ି କର୍ମୀ ଓ ସହାୟିକା ପଦବୀ ପାଇଁ ବିଜ୍ଞପ୍ତି ପ୍ରକାଶ ପାଇଛି। ଏହି ନିଯୁକ୍ତି ଦେବଗଡ଼, ଢେଙ୍କାନାଳ ଏବଂ ପୁରୀ ଜିଲ୍ଲା ପାଇଁ କରାଯିବ। ଏଥିପାଇଁ ଶିକ୍ଷାଗତ ଯୋଗ୍ୟତା ଦ୍ୱାଦଶ ପାସ୍ ଏବଂ ବୟସ ସୀମା ୧୮ରୁ ୩୫ ବର୍ଷ ରଖାଯାଇଛି। ଇଚ୍ଛୁକ ପ୍ରାର୍ଥୀମାନେ ଅଗଷ୍ଟ ୧୫, ୨୦୨୫ ମଧ୍ୟରେ ଅନଲାଇନ୍ ମାଧ୍ୟମରେ ଆବେଦନ କରିପାରିବେ। ଅଧିକ ବିବରଣୀ ପାଇଁ ବିଭାଗୀୟ ୱେବସାଇଟ୍ engagement-awc.odisha.gov.in ଦେଖିବାକୁ କୁହାଯାଇଛି।
….
22.
ଭାରତୀୟ ନୌସେନାରେ ୨୬୦ ଅଫିସର ପଦବୀ: ଅଗଷ୍ଟ ୯ରୁ ଆବେଦନ ଆରମ୍ଭ
ଭାରତୀୟ ନୌସେନା ପକ୍ଷରୁ ସର୍ଟ ସର୍ଭିସ୍ କମିଶନ ଅଧୀନରେ ୨୬୦ଟି ଅଫିସର ପଦବୀ ପାଇଁ ବିଜ୍ଞପ୍ତି ପ୍ରକାଶ ପାଇଛି। ଏହି ନିଯୁକ୍ତି ଜୁନ୍ ୨୦୨୬ ବ୍ୟାଚ୍ ପାଇଁ କରାଯିବ। ଏଥିରେ ଏକଜିକ୍ୟୁଟିଭ୍, ଇଞ୍ଜିନିୟରିଂ, ପାଇଲଟ୍, ଶିକ୍ଷା ଓ ଆଇନ ଭଳି ବିଭିନ୍ନ ବିଭାଗ ରହିଛି। ପଦବୀ ଅନୁସାରେ ବି.ଇ./ବି.ଟେକ, ଏଲଏଲବି, ଏମବିଏ, ଏମ.ଏସସି ଭଳି ଡିଗ୍ରୀ ଥିବା ପ୍ରାର୍ଥୀ ଆବେଦନ କରିପାରିବେ। ଅନଲାଇନ୍ ଆବେଦନ ପ୍ରକ୍ରିୟା ଅଗଷ୍ଟ ୯, ୨୦୨୫ରୁ ଆରମ୍ଭ ହୋଇ ସେପ୍ଟେମ୍ବର ୧, ୨୦୨୫ରେ ଶେଷ ହେବ। ମନୋନୀତ ପ୍ରାର୍ଥୀଙ୍କୁ ପ୍ରାରମ୍ଭିକ ଭାବେ ମାସିକ ପ୍ରାୟ ୧,୧୦,୦୦୦ ଟଙ୍କା ଦରମା ମିଳିବ। ଇଚ୍ଛୁକ ପ୍ରାର୍ଥୀମାନେ joinindiannavy.gov.in ୱେବସାଇଟ୍ରେ ଅଧିକ ତଥ୍ୟ ପାଇପାରିବେ।
….
23.
ରାଜ୍ୟରେ ଆଉ ଖୋଲିବ ୮ ଅତିରିକ୍ତ ଜିଲ୍ଲା ଜଜକୋର୍ଟ, ୩ ଭିଜିଲାନ୍ସ କୋର୍ଟ ମଧ୍ୟ
ରାଜ୍ୟରେ ୮ଟି ନୂଆ ଅତିରିକ୍ତ ଜିଲ୍ଲା ଜଜ- ଏଡିଜେ କୋର୍ଟ ଖୋଲିବ । ୩ଟି ନୂତନ ଭିଜିଲାନ୍ସ କୋର୍ଟ ପାଇଁ ମଧ୍ୟ ଘୋଷଣା ହୋଇଛି । ଆଇନ ବିଭାଗ ପକ୍ଷରୁ ଏ ନେଇ ବିଜ୍ଞପ୍ତି ପ୍ରକାଶ ପାଇଛି । ପୁରୀ, କେନ୍ଦ୍ରାପଡ଼ା ଏବଂ ନୟାଗଡ଼ ଜିଲ୍ଲାରେ ଗୋଟିଏ ଲେଖାଏ ଅତିରିକ୍ତ ଜିଲ୍ଲା ଜଜଖ- ଭିଜିଲନ୍ସ କୋର୍ଟ ପ୍ରତିଷ୍ଠା ହେବ । ଏଥିସହ ନୟାଗଡ଼ ଜିଲ୍ଲାର ରଣପୁର, ପୁରୀ ଜିଲ୍ଲାର ପିପିଲି, ଖୋର୍ଦ୍ଧା ଜିଲ୍ଲାର ବାଣପୁର, ଭଦ୍ରକ ଜିଲ୍ଲାର ବାସୁଦେବପୁର, ଅନୁଗୁଳ ଜିଲ୍ଲାର ତାଳଚେର, ସୁନ୍ଦରଗଡ଼ ଜିଲ୍ଲାର ରାଜଗାଗଙ୍ଗପୁର, କନ୍ଧମାଳ ଜିଲ୍ଲାର ଜି.ଉଦୟଗିରି ଏବଂ କଟକ ଜିଲ୍ଲାର ବାଙ୍କି ଠାରେ ଗୋଟିଏ ଲେଖାଏ ଅତିରିକ୍ତ ଜିଲ୍ଲା ଜଜ୍ କୋର୍ଟ ଖୋଲିବ ।
…
24.
ଆଗାମୀ ୧୦ ଦିନ ପର୍ଯ୍ୟନ୍ତ ରାଜ୍ୟରେ ଲାଗି ରହିବ କାଁ ଭାଁ ବର୍ଷା
ରାଜ୍ୟରେ ଏବେ ମୌସୁମୀ ବାୟୁ ନିଷ୍କ୍ରିୟ ଥିଲେ ମଧ୍ୟ କେତେକ ଜିଲ୍ଲାରେ କାଁ ଭାଁ ବର୍ଷା ଲାଗି ରହିଛି । ଏହି ଭଳି ପାଗ ଆଗାମୀ ୧୦ ଦିନ ଲାଗି ରହିବ ବୋଲି ପାଣିପାଗ ବିଶେଷଜ୍ଞମାନେ କହିଛନ୍ତି । ୯ ତାରିଖ ପର୍ଯ୍ୟନ୍ତ ଏଭଳି ଲାଗି ରହିବ । ୧୩ ତାରିଖ ବେଳକୁ ଏକ ଲଘୁଚାପ ସୃଷ୍ଟି ହୋଇପାରେ ବୋଲି କୁହାଯାଉଛି । ଏହା ପ୍ରଭାବରେ କେତେକ ଜିଲ୍ଲାରେ ପ୍ରବଳ ବର୍ଷା ହୋଇପାରେ ।
…
25.
ଲକ୍ଷପତି ଦିଦିଙ୍କୁ ମିଳିବ ବିନା ସୁଧରେ ୧୦ ଲକ୍ଷ ପର୍ଯ୍ୟନ୍ତ ଋଣ
ରାଜ୍ୟ ସରକାର ଲକ୍ଷପତି ଦିଦିଙ୍କୁ କୋଟିପତି ଦିଦି କରିବାକୁ ଯୋଜନା କରିଛନ୍ତି । ବର୍ଷେ ମଧ୍ୟରେ ଏହା କରିବାକୁ ଲକ୍ଷ୍ୟ ରଖାଯାଇଛି । ଦିଦି ମାନଙ୍କୁ ସରକାର ୧୦ ଲକ୍ଷ ଟଙ୍କା ପର୍ଯ୍ୟନ୍ତ ସୁଧମୁକ୍ତ ଋଣ ଯୋଗାଇ ଦେବେ । ଯେଉଁମାନେ ଲକ୍ଷପତି ଦିଦି ହୋଇ ସାରିଛନ୍ତି ଏବଂ ଯଦି ଏସଏଚଜି ସହ ଅଛନ୍ତି ସେମାନଙ୍କ ସୁଧ ଛାଡ଼ କରାଯିବ । ସୋମବାଯର ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ସୁଭଦ୍ରା ଭଉଣୀମାନଙ୍କ ସହ ଆଲୋଚନା କରିଛନ୍ତି । ସେମାନଙ୍କ ସଫଳ କାହାଣୀ ଲେଖିବାକୁ ପରାମର୍ଶ ଦେଇଛନ୍ତି । କାହାରିସଫଲ ବିଜିନେସ ମଡେଲ ଥିଲେ ସେଗୁଡ଼ିକୁ ବିଭାଗୀୟ ୱେବସାଇଟରେ ସ୍ଥାନ ଦିଆଯିବ ବୋଲି ଉପମୁଖ୍ୟମନ୍ତ୍ରୀ କହିଛନ୍ତି ।
…
26.
୩୨ ବର୍ଷ ପରେ ଆସିଲା ମିଥ୍ୟା ଏନକାଉଣ୍ଟର ମାମଲାର ରାୟ, ୫ ପୁଲିସଙ୍କୁ ଆଜୀବନ ଜେଲ୍
୧୯୯୩ ମସିହାରେ ପଞ୍ଜାବର ତରନତାରନ ଜିଲ୍ଲାରେ ହୋଇଥିଲା ଦୁଇଟି ଏନକାଉଣ୍ଟର । ୭ ଜଣ ଲୋକ ଏଥିରେ ପ୍ରାଣ ହରାଇଥିଲେ । ବାସ୍ତବରେ ସେମାନଙ୍କୁ ଘରୁ ଉଠାଇ ଦେଇ ଅବୈଧ ଭାବେ ଅଟକ ରଖାଯାଇଥିଲା । ମୃତୁ୍ୟ ପରେ ଶବର କେହି ଦାବିଦାର ନଥିବା ଦର୍ଶାଇ ସେଗୁଡ଼ିକୁ ଦାହ କରି ଦିଆଯାଇଥିଲା । କିନ୍ତୁ ପରିଜନ ମାନେ ଏହା ବିରୋଧରେ କୋର୍ଟକୁ ଯାଇଥିଲେ । ୧୯୯୬ ମସିହାରେ ସୁପ୍ରିମକୋର୍ଟ ଏହି ଘଟଣାର ତଦନ୍ତ ନିଦେ୍ର୍ଦଶ ଦେଇଥିଲେ । ସିବିଆଇ ତିନି ବର୍ଷ ତଦନ୍ତ ପରେ ମାମଲା ରୁଜୁ କରିଥିଲା । ମୋମଟ ୧୦ ଜଣ ପୁଲିସ ଅଫିସରଙ୍କୁ ଅଭିଯୁକ୍ତ ଦର୍ଶାଯାଇଥିଲା । ଇତି ମଧ୍ୟରେ ୫ ଜଣଙ୍କର ମୃତୁ୍ୟ ହୋଇଯାଇଛି । ଅନ୍ୟ ୫ ଜଣଙ୍କୁ କୋର୍ଟ ଆଜୀବନ ଜେଲ ଦଣ୍ଡାଦେଶ ଦେଇଛନ୍ତି ।
…
27.
ଏୟାର ଇଣ୍ଡିଆ ବିମାନରେ ଅସରପା, ବଽଳିଲା ଯାତ୍ରୀଙ୍କ ଆସନ
ସାନଫ୍ରାନ୍ସିସ୍କୋରୁ ମୁମ୍ବାଇ ଆସୁଥିବା ଏୟାର ଇଣ୍ଡିଆର ଏକ ବିମାନରେ ଅଭାବନୀୟ ଘଟଣା ସାମ୍ନାକୁ ଆସିଛି । ବିମାନରେ ଦୁଇ ଜଣ ଯାତ୍ରୀ କେତେକ ଅସରପା ଠାବ କରିଥିଲେ । ଏହା ଜାଣିବା ପରେ ଯାତ୍ରୀମାନଙ୍କ ମଧ୍ୟରେ ଆଲୋଡ଼ନ ସୃଷ୍ଟି ହୋଇଥିଲା । ବିମାନ କ୍ରିଉ ସଦସ୍ୟ ତୁରନ୍ତ ନିର୍ଦ୍ଦିଷ୍ଟ ଯାତ୍ରୀମାନଙ୍କ ସିଟ୍ ବଦଳାଇଥିଲେ । ବିମାନଟି କୋଲକାତା ଦେଇ ମୁମ୍ବାଇ ଯାଉଥିଲା । କୋଲକାତାରେ ତାହ ଅବତରଣ କରିବା ମାତ୍ରେ ବିମାନକୁ ପୁଣି ଭଲ ଭାବେ କ୍ଲିନ୍ କରାଯାଇଥିଲା । ଏହାପରେ ମୁମ୍ବାଇ ଅଭିମୁଖେ ଉଡ଼ାଣ ଭରିଥିଲା । ଅସରପା ଘଟଣା ପାଇଁ ଏୟାରଲାଇନ୍ସ ପକ୍ଷରୁ ବିବୃତି ଜାରି କରି କ୍ଷମାପ୍ରାର୍ଥନା କରାଯାଇଛି ।
…
28.
ଗିନିଜ୍ ବିଶ୍ୱ ରେକର୍ଡରେ ‘ପରୀକ୍ଷା ପେ ଚର୍ଚ୍ଚା-୨୦୨୫’
ପରୀକ୍ଷା ପେ ଚର୍ଚ୍ଚା-୨୦୨୫ ଗିନିଜ ବୁକ୍ ଅଫ ୱାର୍ଲଡ ରେକର୍ଡସରେ ସ୍ଥାନ ପାଇଛି । ସର୍ବାଧିକ ପଂଜିକରଣ ପାଇଁ ଏହି ସଫଳତା ମିଳିଛି । ଏହି କାର୍ଯ୍ୟକ୍ରମ ପାଇଁ ୩ କୋଟି ୫୩ ଲକ୍ଷ ପଂଜିକରଣ କରିଥିଲେ । ଟେଲିଭିଜନରେ ୨୧ କୋଟିରୁ ଅଧି ଦର୍ଶକ ଏହାର ପ୍ରସାରଣ ଦେଖିଥିଲେ । ଏହି କାର୍ଯ୍ୟକ୍ରମ ୨୦୧୮ ପରଠାରୁ ମାଇଁଗଭ୍ ସହାୟତାରେ ସଫଳତାର ସହ ଆୟୋଜନ ହୋଇ ଆସୁଛି । ସୋମବାର ଏକ ସ୍ୱତନ୍ତ୍ର କାର୍ଯ୍ୟକ୍ରମରେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଏବଂ ରାଷ୍ଟ୍ରମନ୍ତ୍ରୀ ଜିତିନ ପ୍ରସାଦ ଗିନିଜ ରେକର୍ଡର ପ୍ରମାଣପତ୍ର ଗ୍ରହଣ କରିଥିଲେ ।
..
29.
ଆରମ୍ଭ ହେଲା ଆରବିଆଇ ମୁଦ୍ରାନୀତି ସମୀକ୍ଷା, କମିପାରେ ସୁଧହାର
ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆର ମୁଦ୍ରାନୀତି ସମୀକ୍ଷା ବୈଠକ ସୋମବାର ଠାରୁ ଆରମ୍ଭ ହୋଇଛି । ବୈଠକ ୩ ଦିନ ଧରି ଚାଲିବ । ୬ ତାରିଖରେ ଆରବିଆଇ ଗଭର୍ଣ୍ଣର ସଞ୍ଜୟ ମାଲହୋତ୍ରା ବୈଠକର ନିଷ୍ପତ୍ତି ଘୋଷଣା କରିବେ । ଏହି କେନ୍ଦ୍ରୀୟ ବ୍ୟାଙ୍କ ରେପୋ ରେଟ ୨୫ ବେସିସ ପଏଣ୍ଟ ହ୍ରାସ କରିପାରେ ବୋଲି ଅନୁମାନ କରାଯାଉଛି । ଇତି ମଧ୍ୟରେ ଆରବିଆଇ ୩ ଥର ରେପୋ ରେଟ ହ୍ରାସ କରିସାରିଛି । ଏହି ଅବଧିରେ ରେପୋ ୧ ପ୍ରତିଶତ ହ୍ରାସ ପାଇଛି । ପ୍ରାୟ ୫ ବର୍ଷ ପରେ ରେପୋ ଦରରେ ଏଭଳି ହ୍ରାସ ହୋଇଛି । ରେପୋ ଦର ହ୍ରାସ ହେଲେ ବ୍ୟାଙ୍କ ଗୁଡ଼ିକୁ ଶସ୍ତାରେ ଋଣ ମିଳିଥାଏ ଏବଂ ଏହାର ଲାଭ ବ୍ୟାଙ୍କ ଗୁଡ଼ିକ ଗ୍ରାହକଙ୍କୁ ଦେଇଥାନ୍ତି ।
…
30.
ପୁଣି ଦୁଇ ବର୍ଷ ପାଣିପାଗ ବିଭାଗ ଡିଜି ରହିବେ ମୃତୁ୍ୟଞ୍ଜୟ ମହାପାତ୍ର
ଭାରତୀୟ ପାଣିପାଗ ବିଭାଗର ଡିଜି ଭାବେ ପୁଣି ନିଯୁକ୍ତି ପାଇଛନ୍ତି ମୃତୁ୍ୟଞ୍ଜୟ ମହାପାତ୍ର । ଓଡ଼ିଆ ପୁଅ ମୃତୁ୍ୟଞ୍ଜୟ ସାେଇକ୍ଲୋନ ମ୍ୟାନ ଭାବେ ପ୍ରସିଦ୍ଧି ହାସଲ କରିଛନ୍ତି । ତାଙ୍କ ନିଯୁକ୍ତି ଅବଧି ଶେଷ ହେଉଛି । ତେଣୁ କେନ୍ଦ୍ର କ୍ୟାବିନେଟର ନିଯୁକ୍ତି ବ୍ୟାପାର କମିଟି ତାଙ୍କୁ ଦୁଇ ବର୍ଷ ଅବଧି ପାଇଁ ପୁନଃ ନିଯୁକ୍ତି ସକାଶେ ମଂଜୁରି ଦେଇଛି ।
…
31.
ଚାଲି ପାରୁନି ସଂସଦ, ବିହାର ଏସଆରଇକୁ ନେଇ ହେଉଛି ହଙ୍ଗାମା
ସଂସଦର ମୌସୁମୀ ଅଧିବେଶନରେ ୧୧ ଦିନ ଗଲାଣି । ଏ ପର୍ଯ୍ୟନ୍ତ କିନ୍ତୁ ମାତ୍ର ୨ ଦିନ ସଂସଦର କାର୍ଯ୍ୟକାଳ ଚାଲିପାରିଛି । ସୋମବାର ସଂସଦରେ କାର୍ଯ୍ୟ ଆରମ୍ଭ ମାତ୍ରେ ହଙ୍ଗାମା ଆରମ୍ଭ ହୋଇଥିଲା । ବିହାର ଭୋଟର ତାଲିକା ସଂଶୋଧନ-ଏସଆଇଆର ପ୍ରସଙ୍ଗରେ ସାଂସଦମାନେ ହଟ୍ଟଗୋଳ କରିଥିଲେ । ବାଧ୍ୟହୋଇ ବାଚସ୍ପତି ଗୃହକୁ ମଙ୍ଗଳବାର ପୂର୍ବାହ୍ନ ପର୍ଯ୍ୟନ୍ତ ମୁଲତବୀ ରଖିଥିଲେ । ଜୁଲାଇ ୨୧ରୁ ଆରମ୍ଭ ହୋଇଥିବା ମୌସୁମୀ ଅଧିବେଶନ ଅଗଷ୍ଟ ୨୧ ତାରିଖ ପର୍ଯ୍ୟନ୍ତ ଚାଲିବ । ଏ ପର୍ଯ୍ୟନ୍ତ ମୋଟ ୧୦ଦିନରୁ ୨ ଦିନ କାମ ହୋଇଛି । ୮ ଦିନର କାର୍ଯ୍ୟକାଳ ଉଡ଼ିଯାଇଛି । ଅଧିବେଶନ ମୋଟ ୩୨ ଦିନ ଚାଲିବ । ସ୍ୱାଧୀନତା ଦିବସ ପାଇଁ ୧୩ ଓ ୧୪ ତାରିଖରେ ଗୃହକାର୍ଯ୍ୟ ବନ୍ଦ ରହିବ ।
About the Author
