୧.
ରେପୋ ରେଟ୍ ଅପରିବର୍ତ୍ତିତ ରଖିଲା ଆରବିଆଇ
ନିରାଶ କରିଛି କେନ୍ଦ୍ରୀୟ ବ୍ୟାଙ୍କ ଆରବିଆଇ । ରେପୋ ରେଟରେ କୌଣସି ପରିବର୍ତ୍ତନ ହୋଇନାହିଁ । ଏହାକୁ ପୂର୍ବଭଳି ୫.୫ ପ୍ରତିଶତରେ ସ୍ଥିର ରଖାଯାଇଛି । ଗତ ୪ ତାରିଖରୁ ଚାଲିଥିବା ଆରବିଆଇର ମୁଦ୍ରା ନୀତି କମିଟି ବୈଠକରେ ଏହି ନିଷ୍ପତ୍ତି ନିଆଯାଇଛି । ଗଭର୍ଣ୍ଣର ସଂଜୟ ମାଲହୋତ୍ରା ଏହି ସୂଚନା ଦେଇଛନ୍ତି । ସେ କହିଛନ୍ତି ‘ସୁଧ ହାର ଅପରିବର୍ତ୍ତିତ ରଖିବା ସପକ୍ଷରେ ସବୁ ସଦସ୍ୟ ମତ ଦେଇଥିଲେ । ଶୁଳ୍କକୁ ନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଆଭିମୁଖ୍ୟ ସ୍ପଷ୍ଟ ହୋଇପାରି ନାହିଁ । ଏହାକୁ ନେଇ ଅନିଶ୍ଚିତତା ଲାଗି ରହିଥିବାରୁ ରେପୋ ରେଟ୍ ଅପରିବର୍ତ୍ତିତ ରଖିବାକୁ ନିଷ୍ପତ୍ତି ନିଆଯାଇଛି ।’ ଫଳରେ ସାଧାରଣ ଲୋକଙ୍କୁ କୌଣସି ଆଶ୍ୱସ୍ତି ମିଳିବ ନାହିଁ । ଋଣ ମହଙ୍ଗା ହେବ ନାହିଁ କି ଇଏମଆଇ ବଢ଼ିବ ନାହିଁ ।
…
୨.
ପଞ୍ଜାବ ଅକ୍ସିଜେନ ପ୍ଲାଣ୍ଟରେ ଭୟଙ୍କର ବିସ୍ଫୋରଣ; ୨ ମୃତ
ପଞ୍ଜାବରେ ବୁଧବାର ସକାଳେ ବଡ଼ ଅଘଟଣ ଘଟିିଛି । ମୋହାଲି ଜିଲ୍ଲାର ଶିଳ୍ପାଞ୍ଚଳ ଫେଜ-୯ରେ ଥିବା ଏକ ଅକ୍ସିଜେନ ସିଲିଣ୍ଡର ପ୍ଲାଣ୍ଟରେ ଭୟଙ୍କର ବିସ୍ଫୋରଣ ହୋଇଛି । ଏଥିରେ ୨ଜଣ ପ୍ରାଣ ହରାଇଥିବାବେଳେ ୩ ରୁ ଅଧିକ ଗୁରୁତର ଆହତ ହୋଇଛନ୍ତି । ଆହତଙ୍କୁ ସ୍ଥାନୀୟ ସିଭିଲ ହସ୍ପିଟାଲରେ ଚିକିତ୍ସିତ କରାଯାଉଛି । ବିସ୍ଫୋରଣ ଏତେ ଭୟଙ୍କର ଥିଲା ଯେ ଅଞ୍ଚଳରେ ଭୟର ବାତାବରଣ ଖେଳିଯାଇଥିଲା । ଲୋକେ ଘରଦ୍ୱାର ଛାଡ଼ି ବାହାରକୁ ପଳାଇ ଆସିଥିଲେ । ସୂଚନା ପାଇ ଜିଲ୍ଲା ପ୍ରଶାସନ, ପୁଲିସ, ଉଦ୍ଧାରକାରୀ ଦଳ ଏବଂ ସବଭିଜିଜନାଲ ମାଜିଷ୍ଟ୍ରେଟ୍ ଘଟଣାସ୍ଥଳରେ ପହଞ୍ଚôଛନ୍ତି । ମାମଲାର ତଦନ୍ତ ଜାରି ରହିଥିବାବେଳେ ବିସ୍ଫୋରଣର କାରଣ ଏପର୍ଯ୍ୟନ୍ତ ଜଣାପଡ଼ିନାହିଁ ।
…
୩.
ଫର୍ଚୁ୍ୟନର ୧୦୦ ଶକ୍ତିଶାଳୀ ବ୍ୟବସାୟୀଙ୍କ ତାଲିକାରେ ମୁମ୍ବାଇ ଜନ୍ମିତ ରେଶମା
ବିଶ୍ୱର ୧୦୦ ଶକ୍ତିଶାଳୀ ବ୍ୟବସାୟୀଙ୍କ ତାଲିକା ଜାରି କରିଛି ଫର୍ଚୁ୍ୟନ । ମାର୍କ ଜୁକରବର୍ଗ ଏବଂ ମୁକେଶ ଅମ୍ବାନୀଙ୍କ ସହିତ ମୁମ୍ବାଇ ଜନ୍ମିତ ରେଶମା କେୱାଲରମନି ଏହି ତାଲିକାର ୬୨ତମ ସ୍ଥାନରେ ରହିଛନ୍ତି । ଆମେରିକାର ବାୟୋଟେକନୋଲୋଜି କମ୍ପାନୀର ପ୍ରଥମ ଭାରତୀୟ ବଂଶୋଦ୍ଭବ ହୋଇ ସେ ଇତିହାସ ସୃଷ୍ଟି କରିଥିଲେ । ୨୦୨୦ ଏପ୍ରିଲରୁ ସେ ୧୧୦ ବିଲିୟନ ଡଲାର କମ୍ପାନୀ ଭର୍ଟିସ ଫାର୍ମାସୁ୍ୟଟିକାଲ୍ସର ସିଇଓ ଭାବେ କାର୍ଯ୍ୟ କରୁଛନ୍ତି । ରେଶମାଙ୍କୁ ୧୧ ବର୍ଷ ହୋଇଥିବାବେଳେ ଭାରତରୁ ତାଙ୍କ ପରିବାର ଆମେରିକା ଚାଲିଯାଇଥିଲେ । ମାସାଚୁସେଟସ୍ ଜେନେରାଲ ହସ୍ପିଟାଲରୁ ଡାକ୍ତର ଭାବେ ସେ କ୍ୟାରିୟର ଆରମ୍ଭ କରିଥିଲେ । କିଛି ବର୍ଷ ପରେ ବାୟୋ ଫାର୍ମା ସେକ୍ଟରରେ ପ୍ରବେଶ କରି ଗବେଷଣା ଏବଂ ବିକାଶରେ ନାମ କମାଇଥିଲେ । ରିପୋର୍ଟ ଅନୁସାରେ, ସେ ବାର୍ଷିକ ୧୮୮ କୋଟି ଟଙ୍କା ଦରମା ପାଉଛନ୍ତି ।
…
୪.
ବ୍ରାଜିଲ ରାଷ୍ଟ୍ରପତି କହିଲେ, ଟ୍ରମ୍ପଙ୍କ ସହ ନୁହେଁ, ମୋଦିଙ୍କ ସାଥିରେ କଥା ହେବି
ନିକଟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବ୍ରାଜିଲ ଉପରେ ୫୦ ପ୍ରତିଶତ ଶୁଳ୍କ ଲଗାଇଥିଲେ । ଏହାକୁ ନେଇ ବ୍ରାଜିଲ ରାଷ୍ଟ୍ରପତି ଲୁଲା ଡା ସିଲଭା କ୍ଷୁବ୍ଧ ହୋଇ ବଡ଼ ଟିପ୍ପଣୀ ଦେଇଛନ୍ତି । ଜବାବୀ ଶୁଳ୍କକୁ ନେଇ ଆମେରିକା ସହ ମୁହାଁମୁହିଁ ହୋଇଥିବା ଏହି ଦେଶ ଭାରତ ସମର୍ଥନରେ ବାହାରିଛି । ଟ୍ରମ୍ପଙ୍କ ସହ ନୁହେଁ ବରଂ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ କଥା ହେବେ ବୋଲି ଲୁଲା କହିଛନ୍ତି । କାରଣ ଟ୍ରମ୍ପ କୌଣସି ଆଲୋଚନା କରିବାକୁ ଚାହୁଁନାହାନ୍ତି । ସେଥିପାଇଁ ସେ ଭାରତ, ଚାଇନା ଓ ରୁଷ ସମେତ ଅନ୍ୟ ରାଷ୍ଟ୍ରଙ୍କ ସହ ଦ୍ୱିପାକ୍ଷିକ ସମ୍ବନ୍ଧକୁ ଅଧିକ ମଜଭୁତ କରିବା ପାଇଁ ଯେକୌଣସି ସମୟରେ ଆଲୋଚନା କରିପାରିବେ ବୋଲି କହିଛନ୍ତି । ସମସ୍ତେ ମିଶି ଆମେରିକାକୁ ମାତ୍ ଦେବା ପାଇଁ ଶୁଳ୍କ ବିଷୟରେ ନିଷ୍ପତ୍ତି ନେବେ ।
…
୫.
ହଲିଉଡ୍ ଅଭିନେତ୍ରୀ କେଲୀ ମ୍ୟାକଙ୍କ ନିଧନ
ହଲିଉଡ୍ ଅଭିନେତ୍ରୀ କେଲୀ ମ୍ୟାକଙ୍କ ପରଲୋକ ଘଟିଛି । ମୃତୁ୍ୟବେଳକୁ ତାଙ୍କୁ ମାତ୍ର ୩୩ ବର୍ଷ ହୋଇଥିଲା । ଆମେରିକାର ସିନସିନାଟି ସହରରେ ରହୁଥିବା କେଲୀ ଏକ ବିପଦଜନକ ରୋଗ ଗ୍ଲିଓମାରେ ପୀଡ଼ିତ ଥିଲେ । ଏହା ବ୍ରେନ କ୍ୟାନସରର ଏକ ଜଟିଳ ରୂପ । ଏହି ରୋଗ ସିଧା ମସ୍ତିଷ୍କ ଏବଂ ସ୍ନାୟୁ ବ୍ୟବସ୍ଥାକୁ ପ୍ରଭାବିତ କରିଥାଏ । ଜନ୍ମଦିନର ଉପହାର ଭାବେ ମିଳିଥିବା ଭିଡିଓ କ୍ୟାମେରାକୁ ଦେଖି କେଲୀ ଅଭିନୟ ପ୍ରତି ଆକୃଷ୍ଟ ହୋଇଥିଲେ । ଏହାପରେ ସେ ଶିଶୁ କଳାକାର ଭାବେ ହଲିଉଡରେ ପାଦ ଥାପିଥିଲେ । ‘ଦି ଏଲିଫ୍ୟାଣ୍ଟ ଗାର୍ଡେନ’ ପାଇଁ ତାଙ୍କୁ ଟିସ୍ ସ୍କୁଲ ଅଫ ଦି ଆର୍ଟ୍ସରେ ସମ୍ମାନିତ କରାଯାଇଥିଲା । ସେ ଅଭିନୟ ସହିତ ଜଣେ କାହାଣୀକାର ଥିଲେ । ‘ଅନ ଦି ବ୍ଲକ’ ବ୍ଲକ ଚଳଚ୍ଚିତ୍ରର କାହାଣୀ ସେ ଲେଖିଥିଲେ ।
…
୬.
ହିମାଚଳରେ ବାଦଲଫଟା ବର୍ଷା; କୈଳାସ ଯାତ୍ରା ବନ୍ଦ, ୪୧୩ ତୀର୍ଥଯାତ୍ରୀ ଉଦ୍ଧାର
ହିମାଚଳ ପ୍ରଦେଶ କିନୋରସ୍ଥିତ ତଙ୍ଗଲିଙ୍ଗରେ ବୁଧବାର ଭୋରରେ ବାଦଲଫଟା ବର୍ଷା ହୋଇଛି । ଏଥିଯୋଗୁ ବନ୍ୟାସ୍ଥିତି ସୃଷ୍ଟି ହୋଇଛି । ଏହି ଘଟଣାର ଏକ ଭୟାବହ ଭିଡିଓ ସାମ୍ନାକୁ ଆସିଛି । ପାହାଡ଼ରୁ ପାଣି ସହ ମାଟି ଓ ପଥର ବୋହି ଆସି ସଡ଼କରେ ପଡ଼ିଛି । ଅଚାନକ ଆସିଥିବା ବନ୍ୟା ଯୋଗୁ କୈଳାସ ଯାତ୍ରା ମାର୍ଗର ୨ଟି ପୋଲ ଭାସିଯାଇଛି । ଅନ୍ୟାନ ରାସ୍ତାଗୁଡ଼ିକ ମଧ୍ୟ ସମ୍ପୂର୍ଣ୍ଣ କ୍ଷତିଗସ୍ତ ହୋଇଛି । କୈଳାସ ଯାତ୍ରାକୁ ସାମୟିକ ସମୟ ପାଇଁ ସ୍ଥଗିତ ରଖାଯାଇଛି । ଅନେକ ଶ୍ରଦ୍ଧାଳୁ ଫସି ରହିଛନ୍ତି । ଜିପ୍ ଲାଇନ୍ ମାଧ୍ୟମରେ ଆଇଟିବିପି ଟିମ୍ ୪୧୩ ତୀର୍ଥଯାତ୍ରୀଙ୍କୁ ଉଦ୍ଧାର କରିଛି । ଅନ୍ୟପକ୍ଷରେ ରିବା ଗ୍ରାମ ନିକଟ ରାଲଡାଙ୍ଗଖଡରେ ବାଦଲଫଟା ବର୍ଷା ଯୋଗୁ ୫ ନମ୍ବର ଜାତୀୟ ରାଜପଥକୁ ବନ୍ଦ କରିଦିଆଯାଇଛି । ହାଇୱେରେ ପ୍ରାୟ ୧୫୦ ମିଟର ପର୍ଯ୍ୟନ୍ତ କାଦୁଅ ଏବଂ ବଡ଼ ବଡ଼ ପଥର ଜମା ହୋଇରହିଛି ।
….
୭.
ଜୋତା ସଫା କଲେ ପଞ୍ଜାବ ଶିକ୍ଷାମନ୍ତ୍ରୀ, ଧାର୍ମିକ କାର୍ଯ୍ୟକ୍ରମରେ ନାଚିବାରୁ ଦଣ୍ଡ
ପଞ୍ଜାବ ଶିକ୍ଷାମନ୍ତ୍ରୀ ହରଜୋତ୍ ସିଂହ ବେନ୍ସଙ୍କୁ ଧାର୍ମିକ ଦଣ୍ଡ ମିଳିଛି । ଶିଖ ଧର୍ମର ସର୍ବୋଚ୍ଚ ସଂସ୍ଥା ‘ଶ୍ରୀ ଅକାଳ ତଖତ’ ତାଙ୍କୁ ଧାର୍ମିକ ମର୍ଯ୍ୟାଦା ଉଲ୍ଲଂଘନ ପାଇଁ ଜୋତା ସଫା କରିବାର ଦଣ୍ଡ ଦେଇଛନ୍ତି । ଏଥିଲାଗି ସେ ବୁଧବାର ସ୍ୱର୍ଣ୍ଣ ମନ୍ଦିରରୁ ଗୁରୁମହଲ ପର୍ଯ୍ୟନ୍ତ ଖାଲି ପାଦରେ ପହଞ୍ଚôଥିଲେ । ରାସ୍ତା ଓ ଜୋତା ସଫା ସହିତ ଅନ୍ୟାନ୍ୟ ସେବା ମଧ୍ୟ କରିଥିଲେ । ଗତ ୨୪ ତାରିଖରେ ଶ୍ରୀନଗରରେ ଶ୍ରୀ ଗୁରୁ ତେଗ୍ ବାହାଦୂରଙ୍କ ୩୫୦ତମ ବଳିଦାନ ଦିବସ କାର୍ଯ୍ୟକ୍ରମ ଆୟୋଜିତ ହୋଇଥିଲା । ଏଥିରେ ଯୋଗଦେଇ ମନ୍ତ୍ରୀ ହରଜୋତ୍ ଗୀତ ଗାଇ ନାଚିବା ସହିତ ଧାର୍ମିକ ମର୍ଯ୍ୟାଦାକୁ ଉଲ୍ଲଂଘନ କରିଥିଲେ । ଏଥିଲାଗି ସେ ନିଜ ଦୋଷ ସ୍ୱୀକାର କରିଥିଲେ । ଯେଉଁଥି ପାଇଁ ୫ଜଣ ସିଂହ ସାହିବାନ ତାଙ୍କୁ ଏହି ଦଣ୍ଡ ଦେଇଥିଲେ ।
…
୮.
ଅମିତ ଶାହଙ୍କ ବିରୋଧରେ ଆପତ୍ତିଜନକ ମନ୍ତବ୍ୟ ମାମଲାରେ ରାହୁଲ ଗାନ୍ଧୀଙ୍କୁ ଜାମିନ
କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ବଡ଼ ଆଶ୍ୱସ୍ତି ମିଳିଛି । ସ୍ୱରାଷ୍ଟ୍ର ମନ୍ତ୍ରୀ ଅମିତ୍ ଶାହାଙ୍କ ବିରୋଧରେ ଦେଇଥିବା ଆପତ୍ତିଜନକ ଟିପ୍ପଣୀ ମାମଲାରେ ଝାଡ଼ଖଣ୍ଡର ଚାଇଁବସା କୋର୍ଟ ତାଙ୍କୁ ଜାମିନ ପ୍ରଦାନ କରିଛନ୍ତି । ପୂର୍ବରୁ କୋର୍ଟ ରାହୁଲଙ୍କ ବିରୋଧରେ ଜାମିନ ବିହୀନ ଗିରଫ ପରୱାନା ଜାରି କରିଥିଲେ । ପରେ ଝାଡ଼ଖଣ୍ଡ ହାଇକୋର୍ଟ ଏହି ପରୱାନାକୁ ସ୍ଥଗିତ ରଖିଥିଲେ । ରାହୁଲ ବୁଧବାର କୋର୍ଟରେ ଉପସ୍ଥିତ ରହି ନ୍ୟାୟିକ ପ୍ରକ୍ରିୟାରେ ସହଯୋଗ କରିବା ପାଇଁ ସତ୍ୟପାଠ ଦାଖଲ କରିଥିଲେ । ତେବେ ରାହୁଲଙ୍କ ଉପରେ କୋର୍ଟ ଦଫା ଧାର୍ଯ୍ୟ କରିଛନ୍ତି । ଏବେ ଅଭିଯୋଗକାରୀଙ୍କ ପକ୍ଷରୁ ସାକ୍ଷ୍ୟ ଏବଂ ପ୍ରମାଣ ପ୍ରକି୍ରୟା ଆରମ୍ଭ ହେବ । ଏହି ମାମଲା ୨୦୧୮ ମସିହାର । ସେତେବେଳେ ଚାଇଁବସାର ଏକ ରାଲିରେ ଅମିତ୍ ଶାହାଙ୍କ ବିରୋଧରେ ରାହୁଲ ଆପତ୍ତିଜନକ ଟିପ୍ପଣୀ ଦେଇଥିଲେ । ଏହାକୁ ନେଇ ବିଜେପି ନେତା ପ୍ରତାପ କଟିହାରୀ ମାନହାନି ମାମଲା ରୁଜୁ କରିଥିଲେ ।
…
୯.
ଅଗଷ୍ଟ ୩୧ରେ ମୋଦିଙ୍କ ଚୀନ ଗସ୍ତ, ୨୦୧୯ ପରେ ପ୍ରଥମ ଥର ଯିବେ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅଗଷ୍ଟ ୩୧ରେ ଚୀନ ଗସ୍ତରେ ଯିବେ । ସେ ସାଂଘାଇ ସହଯୋଗ ସମ୍ମିଳନୀ ତଥା ଏସସିଓରେ ଯୋଗଦେବେ । ୨୦୨୦ରେ ପୂର୍ବ ଲଦାଖର ଗଲୱାନରେ ଦୁଇ ସେନାର ସଂଘର୍ଷ ପରେ ଏହା ମୋଦିଙ୍କ ପ୍ରଥମ ଚୀନ୍ ଗସ୍ତ ହେବ । ଶେଷଥର ପାଇଁ ୨୦୧୯ରେ ମୋଦି ଚୀନ ଗସ୍ତରେ ଯାଇଥିଲେ । ପ୍ରଧାନମନ୍ତ୍ରୀ ଭାବେ ଏହା ତାଙ୍କର ୬ଷ୍ଠ ଚୀନ୍ ଗସ୍ତ ହେବ । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଶୁଳ୍କ ଧମକ ମଧ୍ୟରେ ପ୍ରଧାନମନ୍ତ୍ରୀ ଏହି ଗସ୍ତ ପାଇଁ ନିଷ୍ପତ୍ତି ନେଇଛନ୍ତି । ଆମେରିକା ଶୁଳ୍କର ମୁକାବିଲା ସହିତ ଭାରତ ଓ ଚୀନ୍ ମଧ୍ୟରେ ଦ୍ୱିପାକ୍ଷିକ ସମ୍ପର୍କକୁ ଉନ୍ନତ କରିବା ପାଇଁ ପ୍ରୟାସକୁ ଦୃଷ୍ଟିରେ ରଖି ଏହି ଗସ୍ତ କରାଯିବ । ମୋଦୀ ଓ ଚୀନ୍ ରାଷ୍ଟ୍ରପତି ଜିନପିଙ୍ଗ୍ ଶେଷଥର ଲାଗି ୨୦୨୪ ଅକ୍ଟୋବରରେ ରୁଷରେ ଅନୁଷ୍ଠିତ ବ୍ରିକ୍ସ ସମ୍ମିଳନୀରେ ପରସ୍ପର ସାକ୍ଷାତ କରିଥିଲେ ।
…
୧୦.
ଭାରତୀୟ ସେନା ପୁଣି ପାକିସ୍ତାନକୂୁ ସ୍ମରଣ କରାଇଲା ୧୯୭୧ ମସିହାର କାହାଣୀ
ଦିନେ ତଳେ ଆମେରିକାକୁ ଆଇନା ଦେଖାଇଥିବା ଭାରତୀୟ ସେନା ବୁଧବାର ପାକିସ୍ତାନ ସେନାକୁ ଟାର୍ଗେଟ କରିଛି । ୧୯୭୧ ମସିହାର ସମ୍ବାଦପତ୍ର କ୍ଲିପିଙ୍ଗ ପୋଷ୍ଟ କରି ସ୍ମରଣ କରାଇଛି ପରାଜୟର କାହାଣୀ । ଭାରତୀୟ ସେନାର ଇଷ୍ଟର୍ଣ୍ଣ କମାଣ୍ଡ ସୋସିଆଲ ମିଡିଆରେ ଏହା ପୋଷ୍ଟ କରିଛି । ପାକିସ୍ତାନ କିପରି ଏୟାରଷ୍ଟ୍ରାଇକରେ ସହାୟତା ପାଇଁ ୧୯୭୧ ଡିସେମ୍ବର ୬ରେ ବର୍ମା ସହ ବୁଝାମଣା କରିଥିଲା, ତାହାର ଫଟୋଚିତ୍ର ପୋଷ୍ଟ କରାଯାଇଛି । ସେହିପରି ପୂର୍ବ-ପାକିସ୍ତାନର ଜଣେ କୂଟନୀତିଜ୍ଞ ପାକିସ୍ତାନର ହାତ ଛାଡ଼ିଥିବା ଖବର ମଧ୍ୟ ପୋଷ୍ଟ କରାଯାଇଛି । ୧୯୭୧ ଡିସେମ୍ବର ୩ରୁ ୧୬ ପର୍ଯ୍ୟନ୍ତ ଭାରତ-ପାକିସ୍ତାନ ଯୁଦ୍ଧ ହୋଇଥିଲା । ପରାଜିତ ହେବା ପରେ ପାକିସ୍ତାନର ୯୦ ହଜାର ସୈନ୍ୟ ଆତ୍ମସମର୍ପଣ କରିଥିଲେ ।
…
୧୧.
ପ୍ରିୟଙ୍କା ଗାନ୍ଧୀଙ୍କ ବିରୋଧରେ ବିଜେପି ଆଣିପାରେ କୋର୍ଟ ଅବମାନନା ମାମଲା
ରାହୁଲ ଗାନ୍ଧୀଙ୍କ ବିବାଦୀୟ ବୟାନ ପ୍ରସଙ୍ଗରେ ସୁପ୍ରିମକୋର୍ଟଙ୍କ ମନ୍ତବ୍ୟକୁ ସମାଲୋଚନା କରିଥିଲେ ସାଂସଦ ପ୍ରିୟଙ୍କା ଗାନ୍ଧୀ । ଏଥିରେ କଡ଼ା ପ୍ରତିକ୍ରିୟା ଦେଇଛି ବିଜେପି । ଦଳର ସାଂସଦ ମନନ କୁମାର ମିଶ୍ର କହିଛନ୍ତି, ପ୍ରିୟଙ୍କା ଅବଗତ ନାହାନ୍ତି ସୁପ୍ରିମକୋର୍ଟ କ’ଣ କହିଛନ୍ତି । ଏହାସତ୍ତ୍ୱେ କୋର୍ଟଙ୍କୁ ଗଣମାଧ୍ୟମରେ ସମାଲୋଚନା କରିଛନ୍ତି । ତେଣୁ ତାଙ୍କ ବିରୋଧରେ ବାର କାଉନସିଲର ସଦସ୍ୟମାନେ କୋର୍ଟ ଅବମାନନା ପିଟିସନ ପକାଇବେ । ଏଭଳି ଦାୟତ୍ୱହୀନ ମନ୍ତବ୍ୟକୁ ଦେଶବାସୀ ବରଦାସ୍ତ କରିବେନି । ରାହୁଲ ସଚ୍ଚା ଭାରତୀୟ ହୋଇଥିଲେ ଭାରତୀୟ ସେନାଙ୍କୁ ଆକ୍ରମଣ ଓ ଚୀନ ସେନାର ଭାରତୀୟ ଜମି ଦଖଲ ପ୍ରସଙ୍ଗରେ ବିବାଦୀୟ ମତ ଦେଇ ନଥାନ୍ତେ ବୋଲି ସୁପ୍ରିମକୋର୍ଟ କହିଥିଲେ । ତେବେ ପ୍ରିୟଙ୍କା କହିଥିଲେ ସଚ୍ଚା ଭାରତୀୟ କିଏ ତାହା କୋର୍ଟ କହିପାରିବେନି ।
…
୧୨.
ଟ୍ରମ୍ପଙ୍କ ଧମକକୁ ନାହିଁ ଖାତିର, ମସ୍କୋରେ ପହଞ୍ଚିଲେ ଏନଏସଏ ଅଜିତ ଡୋଭାଲ
ରୁଷ ଠାରୁ ତୈଳ କ୍ରୟ ନ କରିବାକୁ ଭରତକୁ ଟ୍ରମ୍ପଙ୍କ ଧମକ । ନ ମାନିଲେ ଶୁଳ୍କ ବଢ଼ାଇବାକୁ କରିଥିଲେ ତାଗିଦ । କିନ୍ତୁ ଏହାକୁ ଖାତିର କରିନାହିଁ ଭାରତ । ରୁଷ୍ ସହ ବିଭିନ୍ନ ପ୍ରସଙ୍ଗରେ ଆଲୋଚନା କରିବାକୁ ମସ୍କୋରେ ପହଞ୍ଚିଛନ୍ତି ଜାତୀୟ ସୁରକ୍ଷା ପରାମର୍ଶଦାତା ବା ଏନଏସଏ ଅଜିତ ଡୋଭାଲ । ତେବେ ଏହି ଗସ୍ତ କାର୍ଯ୍ୟକ୍ରମ ପୂର୍ବରୁ ସ୍ଥିର ହୋଇଥିଲା ବୋଲି ଭାରତ ପକ୍ଷରୁ କୁହାଯାଇଛି । ଯାହା ସୂଚନା ମିଳିଛି, ଡୋଭାଲ ଗସ୍ତ ସମୟରେ ପ୍ରତିରକ୍ଷା ଓ ବାଣିଜ୍ୟ ସମ୍ପର୍କରେ ବିଶେଷ ଭାବେ ଆଲୋଚନା କରିବେ । ତେବେ ବର୍ତ୍ତମାନ ସମୟରେ ଟ୍ରମ୍ପଙ୍କ ଧମକ ଭୂ-ରାଜନୈତିକ ସ୍ଥିତିକୁ ଆଲୋଚନାରେ ଅଧିକ ଗୁରୁତ୍ୱ ଦିଆଯିବ ।
……
୧୩.
ଉତ୍ତରାଖଣ୍ଡ ପ୍ରଳୟର କାରଣ ବର୍ଷା ନୁହେଁ, ହିମଖଣ୍ଡ କିମ୍ବା ବରଫ ହ୍ରଦ ଫାଟିବା
ଉତ୍ତରାଖଣ୍ଡର ଉତ୍ତରକାଶୀ ଜିଲ୍ଲାରେ ବାଦଲଫଟା ବର୍ଷା ଯୋଗୁ ମଙ୍ଗଳବାର ପ୍ରଳୟ ହୋଇଥିଲା । ପାହାଡ଼ ଉପରୁ କାଦୁଅ ମିଶା ବର୍ଷା ଜଳ ମାଡ଼ି ଆସିବାରୁ ଧରାଳି ଗ୍ରାମ ଭାସି ଯାଇଛି । ୧୦ରୁ ଅଧିକ ପ୍ରାଣ ହରାଇଥିବା ଆଶଙ୍କା କରାଯାଉଛି ଏବଂ ଅନେକ ଏବେ ବି ନିଖୋଜ ଅଛନ୍ତି । ତେବେ ଏହି ପ୍ରଳୟ ବର୍ଷା ପାଇଁ ନୁହେଁ ବୋଲି ଅନୁମାନ କରୁଛନ୍ତି ଜଳବାୟୁ ବିଶେଷଜ୍ଞ । ସେମାନଙ୍କ ମତରେ ମଙ୍ଗଳବାର ଚବିଶ ଘଣ୍ଟା ମଧ୍ୟରେ ସମଗ୍ର ଉତ୍ତରକାଶୀ ଅଞ୍ଚଳରେ ମୋଟ ୨୭ ମିଲିମିଟର ବର୍ଷା ହୋଇଛି । ମାତ୍ର ଏତିକି ବର୍ଷାରେ ବନ୍ୟା ଅସମ୍ଭବ । ସାଟେଲାଇଟ ଚିତ୍ର ମଧ୍ୟ ଦର୍ଶାଉଛି ବର୍ଷା ଯୋଗୁ ଏହା ହୋଇନି । ଅନୁମାନ କରାଯାଉଛି ପାହାଡ଼ ଉପରେ ଥିବା ହିମଖଣ୍ଡ କିମ୍ବା ବରଫ ହ୍ରଦ ଫାଟିବା ଯୋଗୁ ଏପରି ପ୍ରଳୟ ହୋଇଛି । ଜିଓଲୋଜି ବିଭାଗର ତଥ୍ୟ ଅନୁସାରେ ଉତ୍ତରାଖଣ୍ଡରେ ୧୨୬୬ଟି ବରଫ ହ୍ରଦ ରହିଛି, ଯେଉଁଥିରୁ ୧୩ଟି ବିପଦପୂର୍ଣ୍ଣ ସ୍ଥିତିରେ ରହିଛି ।
……
୧୪.
ବଢ଼ିଲା ମମତା ବାନାର୍ଜୀଙ୍କ ମୁଣ୍ଡବିନ୍ଧା, ତୁଟୁନି ମହୁଆ-କଲ୍ୟାଣଙ୍କ କନ୍ଦଳ,
ଦଳ ମଧ୍ୟରେ ବରିଷ୍ଠ ନେତାଙ୍କ କନ୍ଦଳ ତୃଣମୂଳ କଂଗ୍ରେସ ସଭାନେତ୍ରୀ ମମତା ବାନାର୍ଜୀଙ୍କ ମୁଣ୍ଡବିନ୍ଧା ବଢ଼ାଇଛି । ଦଳର ଦୁଇ ବରିଷ୍ଠ ସାଂସଦ କଲ୍ୟାଣ ବାନାର୍ଜୀ ଓ ମହୁଆ ମିତ୍ର ମୁହାଁମୁହିଁ ହୋଇଛନ୍ତି । ଦଳାର ସାଂସଦଙ୍କ ଭିତରେ ସମନ୍ୱୟ ନାହିଁ ବୋଲି ମମତା କିଛି ଦିନ ତଳେ କହିଥିଲେ । ଏଥିରେ କ୍ଷୁବ୍ଧ ହୋଇ କଲ୍ୟାଣ ବାନାର୍ଜୀ ଲୋକସଭାରେ ଦଳର ମୁଖ୍ୟ ସଚେତକ ପଦରୁ ଇସ୍ତଫା ଦେଇଛନ୍ତି । ଏହି ବିବାଦ ମହୁଆଙ୍କ ଏକ ପୋଡକାଷ୍ଟରୁ ଆରମ୍ଭ ହୋଇଥିଲା, ଯେତେବେଳେ ସେ କହିଥିଲେ, ସଂସଦରେ କିଛି ପୁରୁଷଙ୍କ ଚିନ୍ତାଧାରା ବିକୃତ । ଘୁଷୁରୀଙ୍କ ସହ କୁସ୍ତି କଲେ ଅସନା ହୋଇଯିବ । ଏହାକୁ ଜବାବ ଦେଇ କଲ୍ୟାଣ କହିଥିଲେ, ଏଭଳି ମନ୍ତବ୍ୟ ମୌଳିକ ଶିଷ୍ଟାଚାର ବିରୋଧୀ । ପୂର୍ବରୁ ଦୃଢ଼ତାର ସହ ମହୁଆଙ୍କୁ ସୁରକ୍ଷା ଦେବା ମୋର ଭୁଲ ଥିଲା । ସେ ଜଣେ ୬୫ ବର୍ଷୀୟ ପୁରୁଷଙ୍କ ବିବାହ କରି ଘର ଭାଙ୍ଗିଛନ୍ତି ।
……….
୧୫.
ପୁରସ୍କାର ସତ୍ତ୍ୱେ ଚୀନରେ ବଂଶ ବୃଦ୍ଧିରେ ଯୁବ ପିଢ଼ି ଅନାଗ୍ରହୀ, ଚିନ୍ତାରେ ସରକାର
ଚୀନରେ ଜନସଂଖ୍ୟା ହ୍ରାସ ପାଉଛି । କ୍ରମାଗତ ଦ୍ୱିତୀୟ ବର୍ଷ ପାଇଁ ୨୦୨୩ରେ ଜନସଂଖ୍ୟା ହ୍ରାସ ପାଇଛି । ୧୯୪୦ ମସିହା ପରେ ଏହା ସବୁଠାରୁ ସର୍ବନିମ୍ନ ଜନ୍ମ ହାର । ଦେଶରେ ପୂର୍ବରୁ ଜନସଂଖ୍ୟା ବୃଦ୍ଧି ସମସ୍ତଙ୍କ ପାଇଁ ଚିନ୍ତାର କାରଣ ହୋଇଥିଲା । ଅଧିକ ସନ୍ତାନ ଜନ୍ମ ପାଇଁ ଦଣ୍ଡାଦେଶ ଘୋଷଣା ହୋଇଥିଲା । ଏବେ ସରକାର ନିୟମରେ ପରିବର୍ତ୍ତନ କରିଛନ୍ତି । ଅଧକ ସନ୍ତାନ ଜନ୍ମ ପାଇଁ ପୁରସ୍କାର ଘୋଷଣା ହୋଇଛି । ବିଭିନ୍ନ ପ୍ରଦେଶରେ ବାର୍ଷିକ ୩ ହଜାର ରୁ ୧୦ ହଜାର ୟୁଆନ ପର୍ଯ୍ୟନ୍ତ ପୁରସ୍କାର ଦିଆଯାଉଛି । ଶୁଳ୍କ ଛାଡ଼, ଟଙ୍କା ରିହାତି ଏବଂ ଅନ୍ୟାନ୍ୟ ସୁବିଧା ମଧ୍ୟ ଦିଆଯାଉଛି । ତଥାପି ଯୁବ ପିଢ଼ି ସନ୍ତାନ ଜନ୍ମ ପାଇଁ ଆଗ୍ରହ ଦେଖାଉ ନଥିବା ଏକ ସର୍ଭେରେ ଜଣାପଡ଼ିଛି ।
……..
16.
ବ୍ୟାଙ୍କ ଅଫ୍ ବରୋଦାରେ ୪୧୭ ପଦବୀ ପାଇଁ ନିଯୁକ୍ତି ସୁଯୋଗ
ବ୍ୟାଙ୍କ ଅଫ୍ ବରୋଦା ପକ୍ଷରୁ ୨୦୨୫ ବର୍ଷ ପାଇଁ ୪୧୭ଟି ପଦବୀରେ ନିଯୁକ୍ତି ପାଇଁ ବିଜ୍ଞପ୍ତି ପ୍ରକାଶ ପାଇଛି। ଏଥିରେ ମ୍ୟାନେଜର-ସେଲ୍ସ ଏବଂ କୃଷି ସେଲ୍ସ ଅଧିକାରୀ ଭଳି ପଦବୀ ରହିଛି। ଏହି ପଦବୀ ପାଇଁ ଆବେଦନ ପ୍ରକ୍ରିୟା ଅଗଷ୍ଟ ୨୬, ୨୦୨୫ ପର୍ଯ୍ୟନ୍ତ ଚାଲିବ। ମ୍ୟାନେଜର-ସେଲ୍ସ ପାଇଁ ଯୋଗ୍ୟତା ଯେକୌଣସି ବିଷୟରେ ସ୍ନାତକ (ଗ୍ରାଜୁଏଟ୍)। ଏବଂ କୃଷି ସେଲ୍ସ ଅଧିକାରୀ ପାଇଁ କୃଷି କିମ୍ବା ଏହା ସହ ଜଡ଼ିତ ବିଷୟରେ ଡିଗ୍ରୀ ରହିଥିବା ଆବଶ୍ୟକ। ସାଧାରଣ ବର୍ଗର ପ୍ରାର୍ଥୀଙ୍କ ପାଇଁ ୮୫୦ ଟଙ୍କା ଏବଂ ମହିଳା, ଏସସି, ଏସଟି ଓ ପିଡବ୍ଲୁଡି ପ୍ରାର୍ଥୀଙ୍କ ପାଇଁ ୧୭୫ ଟଙ୍କା ଆବେଦନ ଫି ରହିଛି। ଇଚ୍ଛୁକ ପ୍ରାର୍ଥୀମାନେ ବ୍ୟାଙ୍କର ଅଫିସିଆଲ୍ ୱେବସାଇଟ୍ bankofbaroda.in ମାଧ୍ୟମରେ ଅନଲାଇନ୍ ଆବେଦନ କରିପାରିବେ।
……
17.
ଭାରତୀୟ ଷ୍ଟେଟ୍ ବ୍ୟାଙ୍କରେ ୬୫୮୯ କ୍ଲର୍କ ପଦବୀ ପାଇଁ ନିଯୁକ୍ତି ସୁଯୋଗ
ଭାରତୀୟ ଷ୍ଟେଟ୍ ବ୍ୟାଙ୍କ ପକ୍ଷରୁ ୬୫୮୯ଟି ଜୁନିୟର ଆସୋସିଏଟ୍ (କ୍ଲର୍କ) ପଦବୀ ପାଇଁ ଏକ ବଡ଼ ନିଯୁକ୍ତି ବିଜ୍ଞପ୍ତି ପ୍ରକାଶ ପାଇଛି। ଏଥିପାଇଁ ଅନଲାଇନ୍ ଆବେଦନ ପ୍ରକ୍ରିୟା ଅଗଷ୍ଟ ୬ ତାରିଖରୁ ଆରମ୍ଭ ହୋଇଯାଇଛି | ଏହା ଅଗଷ୍ଟ ୨୬ ତାରିଖ ପର୍ଯ୍ୟନ୍ତ ଚାଲିବ। ଯେକୌଣସି ବିଷୟରେ ସ୍ନାତକ (ଗ୍ରାଜୁଏଟ୍) ଡିଗ୍ରୀ ହାସଲ କରିଥିବା ପ୍ରାର୍ଥୀମାନେ ଏଥିପାଇଁ ଆବେଦନ କରିପାରିବେ। ପ୍ରାର୍ଥୀଙ୍କ ବୟସ ସୀମା ୨୦ରୁ ୨୮ ବର୍ଷ ମଧ୍ୟରେ ହେବା ଆବଶ୍ୟକ। ସାଧାରଣ/ଓବିସି/ଇଡବ୍ଲୁଏସ ବର୍ଗର ପ୍ରାର୍ଥୀଙ୍କ ପାଇଁ ଆବେଦନ ଫି ୭୫୦ ଟଙ୍କା ରଖାଯାଇଥିବା ବେଳେ ଏସସି/ଏସଟି ଏବଂ ଦିବ୍ୟାଙ୍ଗ ପ୍ରାର୍ଥୀଙ୍କ ପାଇଁ କୌଣସି ଶୁଳ୍କ ଲାଗିବ ନାହିଁ। ଇଚ୍ଛୁକ ଯୋଗ୍ୟ ପ୍ରାର୍ଥୀମାନେ ଏସବିଆଇର ଅଫିସିଆଲ୍ ୱେବସାଇଟ୍ sbi.co.in ମାଧ୍ୟମରେ ଆବେଦନ କରିପାରିବେ।
……
18.
ଭାରତୀୟ ନୌସେନାରେ ୧୨୬୬ ଟ୍ରେଡ୍ସମ୍ୟାନ୍ ପଦବୀରେ ନିଯୁକ୍ତି ସୁଯୋଗ
ଭାରତୀୟ ନୌସେନା ପକ୍ଷରୁ ୧୨୬୬ଟି କୁଶଳୀ ଟ୍ରେଡ୍ସମ୍ୟାନ୍ ପଦବୀ ପାଇଁ ବିଜ୍ଞପ୍ତି ପ୍ରକାଶ ପାଇଛି। ଦଶମ ପାସ୍ କରିଥିବା ସହିତ ଆଇଟିଆଇ ଡିଗ୍ରୀ ଥିବା ପ୍ରାର୍ଥୀମାନେ ଏଥିପାଇଁ ଆବେଦନ କରିପାରିବେ। ପ୍ରାର୍ଥୀଙ୍କ ବୟସ ୧୮ରୁ ୨୫ ବର୍ଷ ମଧ୍ୟରେ ହେବା ଆବଶ୍ୟକ। ଏହି ପଦବୀଗୁଡ଼ିକ ପାଇଁ ଆବେଦନ ପ୍ରକ୍ରିୟା ଅଗଷ୍ଟ ୧୩, ୨୦୨୫ରୁ ଆରମ୍ଭ ହୋଇ ସେପ୍ଟେମ୍ବର ୨, ୨୦୨୫ ପର୍ଯ୍ୟନ୍ତ ଚାଲିବ। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଏଥିପାଇଁ କୌଣସି ଆବେଦନ ଶୁଳ୍କ ଦେବାକୁ ପଡ଼ିବ ନାହିଁ। ଇଚ୍ଛୁକ ପ୍ରାର୍ଥୀମାନେ ନୌସେନାର ଅଫିସିଆଲ୍ ୱେବସାଇଟ୍ indiannavy.gov.in ମାଧ୍ୟମରେ ଅନଲାଇନ୍ ଆବେଦନ କରିପାରିବେ।
……
19.
ଓପେନଏଆଇର ବଡ଼ ଘୋଷଣା: ଏବେ ସାଧାରଣ ଲାପଟପରେ ଚାଲିବ ଶକ୍ତିଶାଳୀ ଏଆଇ ମଡେଲ୍
ଚ୍ୟାଟଜିପିଟି ନିର୍ମାତା କମ୍ପାନୀ ଓପେନଏଆଇ, ୬ ବର୍ଷ ପରେ ପ୍ରଥମ ଥର ପାଇଁ ଦୁଇଟି ନୂଆ ‘ଓପନ୍-ୱେଟ୍’ ଆର୍ଟିଫିସିଆଲ୍ ଇଣ୍ଟେଲିଜେନ୍ସ (ଏଆଇ) ମଡେଲ୍ ଲଞ୍ଚ କରିଛି। ଏହି ମଡେଲ୍ଗୁଡ଼ିକର ବିଶେଷତ୍ୱ ହେଉଛି, ଏହାକୁ ଡେଭଲପର୍ମାନେ ମାଗଣାରେ ଡାଉନଲୋଡ୍ କରି ନିଜ ଇଚ୍ଛା ଅନୁସାରେ ବ୍ୟବହାର ଓ ପରିବର୍ତ୍ତନ କରିପାରିବେ। ଏପରିକି ଏହାର ଛୋଟ ସଂସ୍କରଣଟିକୁ ସାଧାରଣ ଲାପଟପ୍ରେ ମଧ୍ୟ ଚଲାଯାଇପାରିବ। ଓପେନଏଆଇ କହିଛି ଯେ ଏହି ମଡେଲଗୁଡ଼ିକ କ୍ଷମତାରେ କମ୍ପାନୀର ଅନ୍ୟାନ୍ୟ ଉନ୍ନତ ମଡେଲ୍ ସହିତ ସମକକ୍ଷ। ଏହାର ଦୁରୁପଯୋଗ ରୋକିବା ପାଇଁ କମ୍ପାନୀ ସୁରକ୍ଷା ଉପରେ ଗୁରୁତ୍ୱ ଦେଇଛି ଏବଂ ଏଥିରେ ଥିବା ତ୍ରୁଟି ଖୋଜିବା ପାଇଁ ୫୦୦,୦୦୦ ଡଲାରର ପୁରସ୍କାର ମଧ୍ୟ ଘୋଷଣା କରିଛି। ଏହି ପଦକ୍ଷେପ ଫଳରେ ସାଧାରଣ ଲୋକଙ୍କ ପାଇଁ ଏଆଇ ଟେକ୍ନୋଲୋଜି ଅଧିକ ସହଜ ହୋଇପାରିବ।
……
20.
ସିଦ୍ଧୁ ମୁସେୱାଲାଙ୍କ ପ୍ରତିମୂର୍ତ୍ତିକୁ ଗୁଳିମାଡ଼, ସମର୍ଥକଙ୍କୁ ବିଷ୍ଣୋଇ ଗ୍ୟାଙ୍ଗର ଧମକ
୨୦୨୨ ରେ ପ୍ରଖ୍ୟାତ ପଂଜାବୀ ଗାୟକ ସିନ୍ଧୁ ମୁସେୱାଲା ଗ୍ୟାଙ୍ଗଷ୍ଟରଙ୍କ ଗୁଳିମାଡ଼ରେ ନିହତ ହୋଇଥିଲେ । ନିକଟରେ ପୁଣି ଥରେ ତାଙ୍କ ପ୍ରତିମୂର୍ତ୍ତିକୁ ସିରିଜ ଗୁଳିମାଡ଼ ହୋଇଛି । ତାଙ୍କ ପ୍ରତିମୂର୍ତ୍ତି ହରିଆନାର ଡାବୱାଲିରେ ରହିଛି । ଘଟଣାର ଭିଡିଓ ବିଦେଶକୁ କେହି ଜଣେ ପଠାଇବା ପରେ ସୋସିଆଲ ମିଡିଆରେ ଏହା ପ୍ରସାରିତ ହୋଇଛି । ସିଦ୍ଧୁଙ୍କ ମା’ ଚରଣ କୌର ଗଭୀର ଉଦବେଗ ପ୍ରକାଶ କରି କହିଛନ୍ତି, ଏହା ସିଦ୍ଧୁଙ୍କୁ ଆତ୍ମାକୁ ଆକ୍ରମଣ । ଗୁଳିମାଡ଼ କରି ତାଙ୍କ ଲୋକପ୍ରିୟତାକୁ କେହି କମାଇ ପାରିବେ ନାହିଁ । ଅପରପକ୍ଷରେ ଏହି ଗୁଳିମାଡ଼ କରିଥିବା ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇଙ୍କ ଗ୍ୟାଙ୍ଗ ସ୍ୱୀକାର କରିଛି । ସିଦ୍ଧୁଙ୍କୁ ମହାନ ଆଖ୍ୟା ଦେଉଥିବା ତାଙ୍କ ସମର୍ଥକଙ୍କୁ ଏହା ଚେତାବନୀ ବୋଲି ଗ୍ୟାଙ୍ଗ ପକ୍ଷରୁ କୁହାଯାଇଛି ।
…
21.
କର୍ତ୍ତବ୍ୟ ଭବନ-୩ର ଉଦଘାଟନ କଲେ ମୋଦି, ବିଭିନ୍ନ ମନ୍ତ୍ରାଳୟର ଅଫିସ ରହିବ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦିଲ୍ଲୀର କର୍ତ୍ତବ୍ୟ ପଥରେ କର୍ତ୍ତବ୍ୟ ଭବନ-୩ର ଉଦଘାଟନ କରିଛନ୍ତି । ସାତ ମହଲା ବିଶିଷ୍ଟ ଏହି କୋଠାରେ ରହିବ ବିଭିନ୍ନ ମନ୍ତ୍ରଣାଳୟର ଅଫିସ । ଏଥିସହ ଇଣ୍ଟେଲିଜେନ୍ସ ବୁ୍ୟରୋ ଅଫିସ ମଧ୍ୟ ରହିବ । ୧.୫ ଲକ୍ଷ ବର୍ଗ ମିଟର ପରିମିତ ଅଞ୍ଚଳରେ ଏହା ଛିଡ଼ା ହୋଇଛି । କୋଠାରେ ୮୫୦ ଅଫଇସ ରୁମ୍, ୨୪ଟି କନଫରେନ୍ସ ରୁମ୍ ରହିଛି । ୬୦୦ଟି କାର୍ ପାର୍କିଂର ସୁବିଧା ରହିଛି । ସମ୍ପୂର୍ଣର୍ ବିଲଡିଂଟି ଗ୍ରୀନ ଟେକ୍ନୋଲୋଜି ଆଧାରରେ ନିର୍ମାଣ ହୋଇଥିବାରୁ କମ୍ ବିଦୁ୍ୟତ ଖର୍ଚ୍ଚ ହେବ । ସେଣ୍ଟ୍ରାଲ ଭିଷ୍ଟା ଯୋଜନାର ଅଂଶ ଭାବେ କେନ୍ଦ୍ର ସରକାର ମୋଟ ୧୦ଟି କର୍ତ୍ତବ୍ୟ ଭବନ ନିର୍ମାଣ କରିବେ । ଆସନ୍ତା ୨୨ ମାସ ମଧ୍ୟରେ ସବୁ ଗୁଡ଼ିକ ଶେଷ ହେବ ।
…
22.
ସରକାର କଠୋର ହେଲେ, ନାମଫଳକ ଓଡ଼ିଆରେ ନ ଲେଖିଲେ ଜରିମାନା ଗଣିବେ
ଓଡ଼ିଆ ଭାଷାକୁ ବାଧ୍ୟତାମୂଳକ କରିବା ନେଇ ରାଜ୍ୟ ସରକାର କଠୋର ହୋଇଛନ୍ତି । ପ୍ରତ୍ୟେକ ବ୍ୟବସାୟିକ ପ୍ରତିଷ୍ଠାନର ସାଇନବୋର୍ଡ ଓଡ଼ିଆରେ ଲେଖିବା ବାଧ୍ୟତାମୂଳକ କରାଯାଇଛି । ଏ ସମ୍ପର୍କରେ ରାଜ୍ୟ ସରକାରଙ୍କ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ମହାନଗର ନିଗମ,ପୌରପାଳିକା ଓ ବିଜ୍ଞାପିତ ଅଞ୍ଚଳ ପରିଷଦକୁ ଚିଠି ଲେଖାଯାଇଛି । ସାଇନବୋର୍ଡର ମୋଟ କ୍ଷେତ୍ରଫଳର ଅନୁ୍ୟନ ୬୦ ପ୍ରତିଶତ ଭାଗରେ ଓଡ଼ିଆ ଭାଷା ବ୍ୟବହାର ହେବ । ଏହି ନିୟମ ପାଳନ କରୁଥିବା ସଂସ୍ଥାଗୁଡ଼ିକୁ ଟ୍ରେଡ ଲାଇସେନ୍ସର ନବୀକରଣ ସମୟରେ ୫ ପ୍ରତିଶତ ରିହାତି ଦିଆଯିବ । ଆସନ୍ତା ସେପ୍ଟେମ୍ବର ୩୦ ସୁଦ୍ଧା ଏହାକୁ ଅନୁପାଳନ କରିନଥିବା ସଂସ୍ଥାକୁ ୫୫ ଦିନର ସମୟ ଦିଆଯିବ । ଏହାପରେ ଦୈନିକ ୫ ଶହ ଟଙ୍କା ଜରିମାନା ଆଦାୟ ହେବ ।
…
23.
ଉତ୍ତରାଖଣ୍ଡରେ ୧୧ ଯବାନ ନିଖୋଜ, କେରଳର ୨୮ ପର୍ଯ୍ୟଟକଙ୍କ ପତ୍ତା ନାହିଁ
ଉତ୍ତରାଖଣ୍ଡ ଉତ୍ତରକାଶୀ ଜିଲ୍ଲାର ହର୍ସିଲ ଅଞ୍ଚଳରେ ମଙ୍ଗଳବାର ବାଦଫଟା ବର୍ଷାରେ ହୋଇଥିବା ବନ୍ୟାବ । ଏଥିରେ ୧୧ ଜଣ ଯବାନ ଭାସିଯାଇଛନ୍ତି । ଏହି ସୂଚନା ଦେଇଛି ଏନଡିଆରଫ । ଉକ୍ତ ଅଞ୍ଚଳରେ ସେନା ଯବାନଙ୍କ ଏକ କ୍ୟାମ୍ପ ଥିଲା । ଯବାନଙ୍କ ସହ ପ୍ରାୟ ଶତାଧିକ ନିଖୋଜ ଥିବା କୁହାଯାଉଛି । ଏ ପର୍ଯ୍ୟନ୍ତ ମୃତୁ୍ୟସଂଖ୍ୟା ୫ ବୋଲି ସ୍ପଷ୍ଟ କରାଯାଇଛି । ଏନଡିଆରଏଫ ଯବାନଙ୍କ ସମେତ ୨୨୫ ଜଣ ଯବାନ ଉଦ୍ଧାର କାର୍ଯ୍ୟରେ ସାମିଲ ହୋଇଛନ୍ତି । ସାତଟି ସ୍ୱତନ୍ତ୍ର ଟିମ୍ ସହ ସନ୍ଧାନୀ କୁକୁରଙ୍କୁ ଏହି କାମରେ ଲଗାଯାଇଛି । ଉଭୟ ପାଶ୍ୱର୍ରୁ ଉକ୍ତ ଅଞ୍ଚଳକୁ ଯୋଗାଯୋଗ ବିଚ୍ଛିନ୍ନ ହୋଇଥିବାରୁ ସମସ୍ୟା ହୋଇଛି । ୪୧୩ ଜଣଙ୍କୁ ଉଦ୍ଧାର କରାଯାଇଛି ଏବଂ ପ୍ରାୟ ଶହେ ଜଣ ଅଟକି ରହିଛନ୍ତି । ଅପରପକ୍ଷରେ କେରଳର ୨୮ ଜଣ ପର୍ଯ୍ୟଟକଙ୍କ ଖୋଜଖବର ମିଳୁନଥିବା କୁହାଯାଇଛି । ସେମାନେ ଉତ୍ତରକାଶୀରୁ କଙ୍ଗୋତ୍ରୀ
…
24.
ଭାରତ ଉପରେ ଆଉ ୨୫ ପ୍ରତିଶତ ଶୁଳ୍କ ଲଗାଇଲେ ଟ୍ରମ୍ପ, ମୋଟ ୫୦ ପ୍ରତିଶତ
ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ ପୂର୍ବରୁ ଭାରତ ଉପରେ ୨୫ ପ୍ରତିଶତ ଶୁଳ୍କ ଘୋଷଣା କରିଥିଲେ । ଏହା ଆଜିଠାରୁ ଲାଗୁ ହେଉଛି । ଏଥିସହ ବୁଧବାର ଟ୍ରମ୍ପ ଆଉ ଅତିରିକ୍ତ ୨୫ ପ୍ରତିଶତ ଶୁଳ୍କ ଘୋଷଣା କରିଛନ୍ତି । ଏହି ନୂତନ ଶୁଳ୍କ ଘୋଷଣାର ୨୧ ଦିନରେ ଲାଗୁ ହେବ । ଏହି ନିଦେ୍ର୍ଦଶନାମାରେ ଟ୍ରମ୍ପ ଦସ୍ତଖତ କରିସାରିଛନ୍ତି । ସେଥିରେ କୁହାଯାଉଛି ଭାରତ ସରକାର ପ୍ରତ୍ୟକ୍ଷ କିମ୍ବା ପରୋକ୍ଷରେ ରୁଷରୁ ତୈଳ ଆମଦାନି କରୁଛନ୍ତି । ଏହା ରୁଷର ଯୁଦ୍ଧ କ୍ଷମତାକୁ ପ୍ରୋତ୍ସାହିତ କରୁଛି । ଟ୍ରମ୍ପ ବାଣିଜ୍ୟ ସହଯୋଗୀ ରାଷ୍ଟ୍ରଙ୍କ ଉପରେ ଲଗାଇଥିବା ଶୁଳ୍କ ମଧ୍ୟରେ ଏହା ସବୁଠାରୁ ଅଧିକ ।
…
25.
ସାମ୍ବାଦିକଙ୍କ ପ୍ରଶ୍ନରେ ହଡ଼ବଡ଼ ଟ୍ରମ୍ପ, ଜାଣି ନଥିବା କହି ଆଡ଼େଇଗଲେ
ସାମ୍ବାଦିକ ସମ୍ମିଳନୀରେ ହଡ଼ବଡ଼ ହୋଇଗଲେ ଆମେରିକା ରାଷ୍ଟ୍ରପତି ଟ୍ରମ୍ପ । ବିଭିନ୍ନ ଦେଶ ଉପରେ ଶୁଳ୍କ ଲଦି ଆରାମ ପାଉଥିବା ଟ୍ରମ୍ପ ବୁଧବାର କରିଥିଲେ ଏକ ସାମ୍ବାାଦିକ ସମ୍ମିଳନୀ । ସେଠାରେ କେତେକ ସମ୍ବାଦିକ ପ୍ରଶ୍ନ କରିଥିଲେ, ରୁଷ୍ ଠାରୁ ଆମେରିକା କ’ଣ କ’ଣ ସାମଗ୍ରୀ କ୍ରୟ କରୁଛି । କେମିକାଲ କିମ୍ବା ସାର? କିଛି ଆମଦାନି କରୁଛି କି? ଏହା ଶୁଣି ଟ୍ରମ୍ପ ହଡ଼ବଡ଼ ହୋଇ ଯାଇଥିଲେ । କିଛି ସମୟ ପରେ କହିଥିଲେ ମୋ ପାଖରେ ଏ ନେଇ କିଛି ସୂଚନା ନାହିଁ । ଉଲ୍ଲେଖଯୋଗ୍ୟ, ଆମେରିକା ଓ ଇଉରୋପୀୟ ସଂଘ ରୁଷ୍ ସହ ବାଣିଜ୍ୟ କାରବାର କରୁଛନ୍ତି, କିନ୍ତୁ ଅନ୍ୟମାନଙ୍କ ଉପରେ ଦୋମୁହାଁ ନୀତି ଧରୁଛନ୍ତି । ଭାରତ ଦିନେ ତଳେ ଏହି ଆରୋପ ଲଗାଇଥିଲା ।
…
26.
ଆଇସିସି ପୁରସ୍କାର ଦୌଡ଼ରେ ଶୁଭମନ ଗିଲ୍, ଶେଷ ସିରିଜରେ କରିଛନ୍ତି ୭୫୪ ରନ୍
ଗତ ଜୁଲାଇ ମାସର ଶ୍ରେଷ୍ଠ ଖେଳାଳି ପୁରସ୍କାର ପାଇଁ ଆଇସିସି ତାଲିକା ଘୋଷଣା କରିଛି । ତାଲିକାରେ ଅଛନ୍ତି ଭାରତୀୟ ଟେଷ୍ଟ ଦଳର ଅଧିନାୟକ ଶୁଭମନ ଗିଲ୍, ଦକ୍ଷିଣ ଆଫ୍ରିକାର ୱିଆନ ମୁଲ୍ଡର ଏବଂ ଇଂଲଣ୍ଡ ଟେଷ୍ଟ ଦଳର ଅଧିନାୟକ ବେନ୍ ଷ୍ଟୋକ୍ସ । ଜୁଲାଇ ମାସରେ ଗିଲ୍ ୩ଟି ଟେଷ୍ଟ ଖେଳି ୯୪.୫୦ ଆଭରେଜରେ କରିଛନ୍ତି ୫୬୭ ରନ୍ । ଗତ ଇଂଲଣ୍ଡ ସିରିଜରେ ୫ଟି ମ୍ୟାଚରେ ଗିଲ୍ ୭୫.୪୦ ପ୍ରତିଶତରେ କରିଛନ୍ତି ୭୫୪ ରନ୍ । ଏହା ମଧ୍ୟରେ ରହିଛି ୪ଟି ଶତକ ଓ ଗୋଟିଏ ଦ୍ୱିଶତକ । ଅପରପକ୍ଷରେ ଷ୍ଟୋକ୍ସ ୩ଟି ଟେଷ୍ଟ ଖେଳି ୨୫୧ ରନ୍ କରିବା ସହ ୧୨ଟି ୱିକେଟ ପାଇଛନ୍ତି । ମୁଲ୍ଡର ଜିମ୍ବାୱେ ବିପକ୍ଷରେ ୨ଟି ଟେଷ୍ଟରେ କରିଛନ୍ତି ୫୩୧ ରନ୍ ।
..
27.
ସିବିଏସଇ ଦଶମ, ଦ୍ୱାଦଶ ଛାତ୍ରଛାତ୍ରୀଙ୍କ ପାଇଁ ୭୫ ପ୍ରତିଶତ ଉପସ୍ଥାନ ଜରୁରୀ
ଛାତ୍ରଛାତ୍ରୀଙ୍କ ଉପସ୍ଥାନ କ୍ଷେତ୍ରରେ ସିବିଏସଇ କଠୋର ହୋଇଛି । ଆଉ କୋହଳ ମନୋଭାବ ଗ୍ରହଣ କରାଯିବ ନାହିଁ ବୋଲି କୁହାଯାଇଛି । ସିବିଏସଇ ଦଶମ ଓ ଦ୍ୱାଦଶ ଶ୍ରେଣୀ ଛାତ୍ରଛାତ୍ରୀମାନଙ୍କ ପାଇଁ ୭୫ ପ୍ରତିଶତ ଉପସ୍ଥାନ ଜରୁରି । ଏହା ନଥିଲେ ସେମାନେ ବୋର୍ଡ ପରୀକ୍ଷା ଦେଇପାରିବେନି । ଏ ସମ୍ପର୍କରେ ଅଭିଭାବକମାନେ ମଧ୍ୟ ସତର୍କ ହେବା ଉଚିତ ବୋଲି କୁହାଯାଇଛି । ଏହା କେବଳ ମେଡିକାଲ ଭଳି ଜରୁରି କାରଣ ଯୋଗୁ ୨୫ ପ୍ରତିଶତ ପର୍ଯ୍ୟନ୍ତ କୋହଳ ହୋଇପାରିବ । ତେବେ ଏଥିପାଇଁ ଉଚିତ ପ୍ରମାଣପତ୍ର ଦାଖଲ ଆବଶ୍ୟକ ।
….
28.
ଅଗଷ୍ଟ ୧୫ ପର୍ଯ୍ୟନ୍ତ ଏମବିବିଏସ୍-ବିଡିଏସ୍ ଚଏସ ଫିଲିଙ୍ଗ ହୋଇପାରିବ
ଏମବିବିଏସ୍ ଓ ବିଡିଏସ୍ ସଂଶୋଧିତ କାଉନସେଲିଂ ନେଇ ଓଡ଼ିଶା ଯୁଗ୍ମ ପ୍ରବେଶିକା ପରୀକ୍ଷା-ଓଜେଇଇ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ରାଜ୍ୟ କୋଟାରେ କାଉନସେଲିଂ ଓ ନାମଲେଖା ପାଇଁ ନୂଆ ତାରିଖ ହୋଇଛି । ଆସନ୍ତା ଅଗଷ୍ଟ ୧୫ ଅପରାହ୍ଣ ସାଢ଼େ ୪ଟା ପର୍ଯ୍ୟନ୍ତ ଚଏସ ଫିଲିଂ ଏବଂ ଲକିଂ କରିପାରିବେ । ଆସନ୍ତା ୧୬ ତାରିଖ ୧୧ଟାରେ ପ୍ରଥମ ରାଉଣ୍ଡ ଆଲଟମେଣ୍ଟ ବାହାରିବ । ୧୮ ତାରିଖରେ ଆସିବ ପ୍ରଥମ ପର୍ଯ୍ୟାୟ ଆଲଟମେଣ୍ଟ ଲେଟର । ୧୯ ତାରିଖରୁ ୨୪ ତାରିଖ ପର୍ଯ୍ୟନ୍ତ ଭୁବନେଶ୍ୱର ଗଣ୍ଡମୁଣ୍ଡାରେ ଓଜେଇଇ କାର୍ଯ୍ୟାଳୟରେ ପ୍ରୋଭିଜନାଲ ଆଡମିସନ ଚାଲିବ । ୨୫ ତାରିଖ ସୁଦ୍ଧା ଆଡମିସନ ପ୍ରକ୍ରିୟାରୁ ଓହରି ହେବ ବୋଲି କୁହାଯାଇଛି ।
..
29.
ଆଜି ହସ୍ତତନ୍ତ ଦିବସ: ତନ୍ତଶାଳ ପାଇଁ ବୁଣାକାରଙ୍କୁ ସରକାର ଦେବେ ସହାୟତା
ରାଜ୍ୟ ସରକାର ବୟନ ଶିଳ୍ପକୁ ପ୍ରୋତ୍ସାହିତ କରିବାକୁ ବୁଣାକାରମାନଙ୍କୁ ସହାୟତା ଦେବେ । ଆଜି ରାଜ୍ୟରେ ପାଳନ କରାଯାଉଛି ହସ୍ତତନ୍ତ ଦିବସ । ଏହି ଅବସରରେ ବୁଣାକାର ଭାଇମାନଙ୍କ ପାଇଁ ସରକାର ନେଇଥିବା ନିଷ୍ପତ୍ତି ଖୁବ ଶୀଘ୍ର ଘୋଷଣା କରାଯିବ । ରାଜ୍ୟରେ ପ୍ରାୟ ୧.୨୫ ଲକ୍ଷ ବୁଣାକାର ଅଛନ୍ତି । ସେମାନଙ୍କୁ ତନ୍ତଶାଳ ପାଇଁ ସରକାର ସହାୟତା ଦେବେ । ଆଦିବାସୀ ଓ ପଛୁଆ ଜିଲ୍ଲାରେ ୧ ଲକ୍ଷ ୩୦ ହଜାର ଏବଂ ଅନ୍ୟ ଜିଲ୍ଲାରେ ୧ ଲକ୍ଷ ୨୦ ହଜାର ଟଙ୍କା ପ୍ରଦାନ କରାଯିବ । ହସ୍ତତନ୍ତ ଜନଗଣନା ଡାଟାବେସରେ ନାମ ଥିବା ବୁଣାକାରଙ୍କ ପରିବାରର ଜଣେ ଏହା ପାଇବାକୁ ଯୋଗ୍ୟ ହେବେ । ‘ଆବାସ’ ଭଳି ୪ଟି ପର୍ଯ୍ୟାୟରେ ଏହି ସହାୟତା ଦିଆଯିବ ।
..
30
ପର୍ତ୍ତୁଗାଲ ପଳାଇବାକୁ ଯୋଜନା କରୁଛନ୍ତି ପାକିସ୍ତାନର ଅନେକ ଅଧିକାରୀ
ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖ୍ୱାଜା ଆସିଫ ଏକ ଚମକପ୍ରଦ ସୂଚନା ଗଣମାଧ୍ୟମକୁ ଦେଇଛନ୍ତି । ସେ ସୋସିଆଲ ମିଡିଆରେ ଲେଖିଛନ୍ତି, ଦେଶର ଅର୍ଦ୍ଧାଧିକ ଅଧିକାରୀ କଳାଧନ ଜରିଆରେ ପର୍ତ୍ତୁଗାଲରେ ସମ୍ପତ୍ତି କିଣିଛନ୍ତି । ଅନେକ ସେଠାରେ ନାଗରିକତ୍ୱ ଗ୍ରହଣ କରିଛନ୍ତି । ସେମାନେ ପାକିସ୍ତାନ ଛାଡ଼ି ସେଠାକୁ ପଳାଇବାକୁ ଯୋଜନା କରିଛନ୍ତି । ସାଧାରଣତଃ ପର୍ତ୍ତୁଗାଲରେ ନିବେଶ କରୁଥିବା ଲୋକଙ୍କୁ ସେଠାରେ ସହଜରେ ନାଗରିକତା ମିଳିଥାଏ । ତେଣୁ ପାକିସ୍ତାନର ଦୁର୍ନୀତିଗ୍ରସ୍ତ ଅଧିକାରୀମାନେ ଏହି ଯୋଜନା କରିଛନ୍ତି ।
About the Author
