Top 30 news
1.
ବାରମ୍ବାର ଶ୍ରୀମନ୍ଦିର ସୁରକ୍ଷାରେ ତ୍ରୁଟି, କ୍ୟାମେରାଯୁକ୍ତ ଚଷମା ପିନ୍ଧି ପଶୁଛନ୍ତି ଭକ୍ତ
ଶ୍ରୀମନ୍ଦିରର ସୁରକ୍ଷା ପାଇଁ ସରକାର ଅନେକ ଗୁଡ଼ିଏ ପଦକ୍ଷେପ ନେଇଥିବା ସତ୍ତ୍ୱେ କ୍ରମାଗତ ଏହା ଉଲ୍ଲଂଘନ ହେଉଛି । ମଙ୍ଗଳବାର ଶ୍ରୀମନ୍ଦିର ପଶ୍ଚିମ ଦ୍ୱାର ଦେଇ ଯାଉଥିବା ଜଣେ ଯୁବକଙ୍କୁ ପୁଲିସ ସନେ୍ଦହରେ ତଲାସୀ କରିଥିଲା । ସେ କ୍ୟାମେରାଯୁକ୍ତ ଚଷମା ପିନ୍ଧିଥିବା ଜଣାପଡ଼ିଥିଲା । ଯୁବକଙ୍କ ନାମ ପ୍ରତିଶ ପାଲ ଏବଂ ତାଙ୍କ ଘର ପଶ୍ଚିମବଙ୍ଗର ପଶ୍ଚିମ ବର୍ଦ୍ଧମାନରେ । ତାଙ୍କଠାରୁ ଚଷମା ଓ ମୋବାଇଲ ଫୋନ୍ ଜବତ କରାଯାଇଛି । ସୋମବାର ମଧ୍ୟ ଗୁଜରାଟର ଜଣେ ଯୁବକଙ୍କ ଠାରୁ କ୍ୟାମେରା ଯୁକ୍ତ ଚଷମା ଜବତ ହୋଇଥିଲା । ଗତ ମାସ ୨୯ ତାରିଖରେ ମଧ୍ୟ ଜଣେ ଯୁବକଙ୍କ ଠାରୁ ଏଭଳି ଚଷମା ଜବତ ହୋଇଥିଲା । ଶ୍ରୀମନ୍ଦିରରେ ଚେକିଂ ଆହୁରି କଡ଼ାକଡ଼ି କରିବାକୁ ଚିନ୍ତା କରାଯାଉଥିବା କହିଛନ୍ତି ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ।
….
2.
ସରକାରଙ୍କ ନିଦେ୍ର୍ଦଶ, ସମସ୍ତ ରାଜସ୍ୱ କାର୍ଯ୍ୟାଳୟରେ ଲାଗିବ ବାୟୋମେଟ୍ରିକ ଉପସ୍ଥାନ ମେସିନ
ରାଜ୍ୟର ସମସ୍ତ ରାଜସ୍ୱ କାର୍ଯ୍ୟାଳୟରେ ଲାଗିବ ବାୟୋମାଟି୍ରକ ଉପସ୍ଥାନ ମେସିନ । ରାଜସ୍ୱ ଓ ବିପର୍ଯ୍ୟୟ ପରିଚାଳାନ ବିଭାଗ ଏହି ନିଷ୍ପତ୍ତି ନେଇଛି । ସମସ୍ତ ଜିଲ୍ଲାପାଳଙ୍କ ନିକଟକୁ ଏ ନେଇ ନିଦେ୍ର୍ଦଶନାମା ପଠାଯାଇଛି । ତଳ କର୍ମଚାରୀଙ୍କ ଠାରୁ ଆରମ୍ଭ କରି ଉଚ୍ଚପଦସ୍ଥ ଅଧିକାରୀଙ୍କ ପାଇଁ ଏହି ନିୟମ ଲାଗୁ ହେବ । ଏହା ହେଲେ କର୍ମଚାରୀମାନେ ଠିକ୍ ସମୟରେ ଅଫିସ ଆସିବେ ବୋଲି ଆଶା କରାଯାଇଥିବା ଜଣେ ବରିଷ୍ଠ ଅଧିକାରୀ କହିଛନ୍ତି ।
…
3.
ଦୀର୍ଘଦିନ ସ୍ୱରାଷ୍ଟ୍ର ମନ୍ତ୍ରୀ ଦାୟିତ୍ୱ ନିର୍ବାହ କରିବାରେ ଅମିତ ଶାହଙ୍କ ରେକର୍ଡ
ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ରେକର୍ଡ କରିଛନ୍ତି । ଏହି ପଦବିରେ ସେ ସର୍ବାଧିକ ଦିନ ରହି ଏହି ସଫଳତା ପାଇଛନ୍ତି । ୨୦୧୯ ମସିହା ମେ ୩୦ ତାରିଖରେ ସେ ସ୍ୱରାଷ୍ଟ୍ର ମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିଥିଲେ । ୨୦୨୫ ଅଗଷ୍ଟ ୫ ତାରିଖ ସୁଦ୍ଧା ସେ ୨୨୫୮ ଦିନ ଏହି ପଦରେ ରହିପାରିଛନ୍ତି । ଏହା ପୂର୍ବରୁ ବିଜେପିର ଲାଲକୃଷ୍ଣ ଆଡଭାନୀ ୧୯୯୮ ମାର୍ଚ୍ଚ ୧୯ ରୁ ୨୦୦୪ ମେ ୨୨ ତାରିଖ ପର୍ଯ୍ୟନ୍ତ ୨୨୫୬ ଦିନ ରହିଥିଲେ । କଂଗ୍ରେସର ଗୋବିନ୍ଦ ବଲ୍ଲଭ ପନ୍ଥ ୧୯୫୫ ଜାନୁଆରୀ ୧୦ରୁ ୧୯୬୧ ମାର୍ଚ୍ଚ ୭ ପର୍ଯ୍ୟନ୍ତ ୬ ବର୍ଷ ୫୬ ଦିନ ରହିଥିଲେ । ମଙ୍ଗଳବାର ଏନଡିଏ ସାଂସଦଙ୍କ ବୈଠକରେ ପ୍ରଧାନମନ୍ତ୍ରୀଙ୍କ ସମେତ ଅନ୍ୟ ନେତାମାନେ ଅମିତ ଶାହଙ୍କୁ ଅଭିନନ୍ଦନ ଜଣାଇଛନ୍ତି ।
….
4.
ଜମ୍ମୁ-କାଶ୍ମୀରର ପୂର୍ବତନ ରାଜ୍ୟପାଳ ସତ୍ୟପାଲ ମଲ୍ଲିକଙ୍କ ପରଲୋକ
୭୯ ବର୍ଷ ବୟସରେ ଜମ୍ମୁ-କାଶ୍ମୀରର ପୂର୍ବତନ ରାଜ୍ୟପାଳ ସତ୍ୟପାଲ ମଲ୍ଲିକଙ୍କର ମଙ୍ଗଳବାର ପରଲୋକ ହୋଇଯାଇଛି । ଅସୁସ୍ଥ ଥାଇ ସେ ନୂଆଦିଲ୍ଲୀର ରାମ ମନୋହର ଲୋହିଆ ହସପିଟାଲରେ ଚିକିତ୍ସିତ ହେଉଥିଲେ । ଜମ୍ମୁ-କାଶ୍ମୀରର ଶେଷ ରାଜ୍ୟପାଳ ଭାବେ ସେ ୨୦୧୮ ଅଗଷ୍ଟରୁ ୨୦୧୯ ଅକ୍ଟୋବର ପର୍ଯ୍ୟନ୍ତ ଥିଲେ । ପରେ ସେ ଗୋଆ ଏବଂ ମେଘାଳୟର ରାଜ୍ୟପାଳ ଭାବେ ମଧ୍ୟ ଦାୟିତ୍ୱ ନିର୍ବାହ କରିଥିଲେ । ସେ କିଛି ଦିନ ଧରି ଓଡ଼ିଶାର ରାଜ୍ୟପାଳ ଭାବେ ଅତିରିକ୍ତ ଦାୟିତ୍ୱରେ ଥିଲେ । ୨୦୧୮ ମସିହା ମାର୍ଚ୍ଚ ୨୧ ତାରିଖରୁ ମେ ୨୮ ପର୍ଯ୍ୟନ୍ତ ସେ ଏହି ଦାୟିତ୍ୱରେ ଥିଲେ । ସେ ରାଜ୍ୟପାଳ ଥିବା ସମୟରେ ୨୦୧୯ ଅଗଷ୍ଟ ୫ ତାରିଖରେ ଜମ୍ମୁ-କାଶ୍ମୀରରୁ ଧାରା ୩୭୦ ଉଚ୍ଛେଦ ହୋଇଥିଲା । ପରେ ସେ ନରେନ୍ଦ୍ର ମୋଦିଙ୍କୁ ସମାଲୋଚନା ପାଇଁ ଚର୍ଚ୍ଚାରେ ଥିଲେ । ଉତ୍ତର ପ୍ରଦେଶ ବାଗପତ ଅଞ୍ଚଳର ଜାଠ ନେତା ସତ୍ୟପାଲ ପ୍ରଥମେ ୧୯୭୪ ମସିହାରେ ବିଧାୟକ ହୋଇଥିଲେ ।
….
5.
ପ୍ରିୟଙ୍କା ଗାନ୍ଧୀଙ୍କ ପ୍ରତିକ୍ରିୟା, କିଏ ପ୍ରକୃତ ଭାରତୀୟ କୋର୍ଟ ନିର୍ଦ୍ଧାରଣ କରନ୍ତି ନାହିଁ
ବିବାଦୀୟ ବିବୃତି ପାଇଁ ସୋମବାର କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କୁ ଭର୍ତ୍ସନା କରିଥିଲେ ସୁପ୍ରିମକୋର୍ଟ । ପ୍ରକୃତ ଭାରତୀୟ ଏଭଳି ମନ୍ତବ୍ୟ ଦିଅନ୍ତି ନାହିଁ ବୋଲି କହିଥିଲେ । ଏଥିରେ ପ୍ରତିକ୍ରିୟା ପ୍ରକାଶ କରିଛନ୍ତି ଭଉଣୀ ତଥା ସାଂସଦ ପ୍ରିୟଙ୍କା ଗାନ୍ଧୀ । ସେ କହିଛନ୍ତି, କିଏ ପ୍ରକୃତ ଭାରତୀୟ କୋର୍ଟ ସ୍ଥିିର କରନ୍ତି ନାହିଁ । ତାଙ୍କ ଭାଇ ବିରୋଧୀ ଦଳ ନେତା । ସରକାରଙ୍କୁ ପ୍ରଶ୍ନ କରିବା ଅଧିକାର ତାଙ୍କର ଅଛି । ବରିଷ୍ଠ କଂଗ୍ରେସ ନେତା କେସି ଭେନୁଗୋପାଳ କହିଛନ୍ତି, ରାହୁଲ ଗାନ୍ଧୀ ଯେଉଁ ପ୍ରଶ୍ନ ଉଠାଇଛନ୍ତି, ତାହା ପ୍ରତ୍ୟେକ ସଚ୍ଚା ଭାରତୀୟଙ୍କ ମନର ପ୍ରଶ୍ନ । ପ୍ରକୃତ ଭାରତୀୟ କିଏ ସ୍ଥିର କରିବ ବୋଲି ସେ ପ୍ରଶ୍ନ କରିଛନ୍ତି । ଭାରତ ଯୋଡ଼ୋ ଯାତ୍ରାରେ ସେନା ବିରୋଧରେ ରାହୁଲ ଗାନ୍ଧୀ ଦେଇଥିବା ଏକ ବିବୃତି ପ୍ରସଙ୍ଗରେ ସୁପ୍ରିମ କୋର୍ଟ ତାଙ୍କୁ ଭର୍ତ୍ସନା କରିଥିଲେ । ତେବେ କୋର୍ଟଙ୍କ ମନ୍ତବ୍ୟ ଅନାବଶ୍ୟକ ବୋଲି ଇଣ୍ଡିଆ ମେଣ୍ଟର ନେତାମାନେ କହିଛନ୍ତି ।
….
6.
ଆମେରିକାକୁ ଆଇନା ଦେଖାଇଲା ଭାରତୀୟ ସେନା, ୧୯୭୧ର ଖବରକାଗଜ କ୍ଲିପ ପୋଷ୍ଟ କଲା
ଆମେରିକାର ପାକିସ୍ତାନ ପ୍ରୀତି ନୂଆ ନୁହେଁ । ଦଶନ୍ଧି ଦଶନ୍ଧି ଧରି ଆମେରିକାର ପ୍ରତ୍ୟେକ ସରକାର ପାକିସ୍ତାନ ପ୍ରୀତି ଦେଖାଇ ଆସିଛନ୍ତି ଭାରତୀୟ ସେନା ଏହାର ଏକ ଉଦାହରଣ ଦେଖାଇଛି । ସେନାର ଇଷ୍ଟର୍ଣ୍ଣ କମାଣ୍ଡ ପକ୍ଷରୁ ୧୯୭୧ ମସିହା ଅଗଷ୍ଟ ୫ରେ ପ୍ରକାଶିତ ଏକ ସମ୍ବାଦପତ୍ର କ୍ଲିପକୁ ସୋସିଆଲ ମିଡିଆରେ ପୋଷ୍ଟ କରାଯାଇଛି । ୧୯୫୪ ମସିହାରୁ କିପରି ଆମେରିକା ପାକିସ୍ତାନକୁ ୨ ଶହ କୋଟି ଡଲାରର ଅସ୍ତ୍ରଶସ୍ତ୍ର ଦେଇଛି, ତାହା ଏହି କ୍ଲିପିଙ୍ଗରେ ବର୍ଣ୍ଣନା କରାଯାଇଛି । ଏହି ଅସ୍ତ୍ରକୁ ବାଂଲାଦେଶ ଯୁଦ୍ଧରେ ପାକିସ୍ତାନ ବ୍ୟବହାର କରିବାକୁ ପ୍ରସ୍ତୁତ ବୋଲି ପ୍ରକାଶ ପାଇଥିଲା । ଏବେ ବି ଆମେରିକା ସମାନ ନୀତିରେ ବିଶ୍ୱାସ କରେ ବୋଲି ସେନା କହିଛି ।
….
7.
ଶୋଭନା ମହାନ୍ତି ମହିଳା କମିଶନ ଅଧ୍ୟକ୍ଷା, ବବିତା ପାତ୍ର ଶିଶୁ ସୁରକ୍ଷା ଆୟୋଗ ଅଧ୍ୟକ୍ଷା
ରାଜ୍ୟ ସରକାର ଶୋଭନା ମହାନ୍ତିଙ୍କୁ ମହିଳା କମିଶନ ଅଧ୍ୟକ୍ଷା ଭାବେ ନିଯୁକ୍ତି ଦେଇଛନ୍ତି । ସେହିପରି ଶିଶୁ ସୁରକ୍ଷା ଆୟୋଗ ଅଧ୍ୟକ୍ଷା ଭଳାବେ ବବିତା ପାତ୍ରଙ୍କୁ ନିଯୁକ୍ତି ମିଳିଛି । ଆସନ୍ତା ୩ ବର୍ଷ ପାଇଁ ଏହି ନିଯୁକ୍ତି ମିଳିଛି । ମହିଳା ଓ ଶିଶୁ କଲ୍ୟାଣ ବିଭାଗ ପକ୍ଷରୁ ଏ ନେଇ ବିଜ୍ଞପ୍ତି ପ୍ରକାଶ ପାଇଛି । ଶିଶୁ ସୁରକ୍ଷା ଆୟୋଗରେ ସ୍ଥାନ ପାଇଥିବା ୬ ସଦସ୍ୟଙ୍କ ନାମ ମଧ୍ୟ ଘୋଷଣା କରାଯାଇଛି । ସେମାନେ ହେଲେ ସୁକେଶୀ ଓରାମ, କଳ୍ପନା ଲେଙ୍କା, ଚନ୍ଦନା ଦାସ, କସ୍ତୁରୀ ମିଶ୍ର, ମନସ୍ମିତା ଖୁଣ୍ଟିଆ ଏବଂ ସୁଜାତା ନାୟକ ।
….
8.
କଟକରେ ତାରକସୀ ହବ୍ ର ଶିଳାନ୍ୟାସ, ଖର୍ଚ୍ଚ ହେବ ୮ କୋଟି
କଟକରେ ନିର୍ମାଣ ହେବ ତାରକସୀ ହବ୍ । ସିଡିତଏ ସେକ୍ଟର-୬ ର ପେଟାନାଳ ରାସ୍ତାରେ ତାରକସୀ ସର୍ବସାଧାରଣ ସୁବିଧା କେନ୍ଦ୍ରର ଭିତ୍ତି ପ୍ରସ୍ତର ମଙ୍ଗଳବାର ସ୍ଥାପନ ହୋଇଛି । ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ଏହାର ଶିଳାନ୍ୟାସ କରିଛନ୍ତି । ୮ କୋଟି ୮୦ ଲକ୍ଷ ଟଙ୍କା ବ୍ୟୟରେ ପ୍ରାୟ ୧୫ ହଜାର ବର୍ଗଫୁଟ ଅଞ୍ଚଳରେ ଏହା ନିର୍ମାଣ କରାଯିବ । ଏକ ବର୍ଷ ମଧ୍ୟରେ ଏହାର ନିର୍ମାଣ ଶେଷ ହେବ । ଯନ୍ତ୍ରାଂଶ ପାଇଁ ବୟନଶିଳ୍ପ ବିଭାଗ ୫ କୋଟି ଟଙ୍କା ଦେବ । ଏଠାରେ ପ୍ରାୟ ୫ ଶହ କାରିଗରଙ୍କୁ ନିଯୁକ୍ତି ମିଳିବ । ସୁବିଧା କେନ୍ଦ୍ର ପାଇଁ ୭ ହଜାର ବର୍ଗଫୁଟ ଅଞ୍ଚଳ ଚିହ୍ନଟ କରାଯାଇଛି । ଭୁବନେଶ୍ୱର ଆଇଆଇଟି ଏହାର ବିସ୍ତୃତ ପ୍ରକଳ୍ପ ରିପୋର୍ଟ ପ୍ରସ୍ତୁତ କରିଛି ।
…..
9.
ୟୁନିଅନ ବ୍ୟାଙ୍କରେ ୱେଲ୍ଥ ମ୍ୟାନେଜର ପଦବୀ ପାଇଁ ନିଯୁକ୍ତି
ୟୁନିଅନ ବ୍ୟାଙ୍କ ଅଫ୍ ଇଣ୍ଡିଆ ପକ୍ଷରୁ ୨୫୦ଟି ୱେଲ୍ଥ ମ୍ୟାନେଜର ପଦବୀ ପାଇଁ ବିଜ୍ଞପ୍ତି ପ୍ରକାଶ ପାଇଛି। ଇଚ୍ଛୁକ ଓ ଯୋଗ୍ୟ ପ୍ରାର୍ଥୀମାନେ ବ୍ୟାଙ୍କର ଅଫିସିଆଲ୍ ୱେବସାଇଟ୍ ମାଧ୍ୟମରେ ଅନଲାଇନ୍ ଆବେଦନ କରିପାରିବେ। ଆବେଦନ ପ୍ରକ୍ରିୟା ୨୦୨୫ ମସିହା ଅଗଷ୍ଟ ୫ ତାରିଖରୁ ଆରମ୍ଭ ହୋଇ ଅଗଷ୍ଟ ୨୫ ତାରିଖରେ ଶେଷ ହେବ। ଏହି ପଦବୀ ପାଇଁ ଶିକ୍ଷାଗତ ଯୋଗ୍ୟତା ଏମବିଏ/ପିଜିଡିଏମ ବା ସମ୍ବନ୍ଧିତ ପୋଷ୍ଟ ଗ୍ରାଜୁଏଟ୍ ଡିଗ୍ରୀ ଆବଶ୍ୟକ। ପ୍ରାର୍ଥୀଙ୍କ ବୟସ ସୀମା ୨୫ରୁ ୩୫ ବର୍ଷ ମଧ୍ୟରେ ହେବା ଜରୁରୀ। ଆବେଦନ ଫି’ ଭାବରେ ଏସସି/ଏସଟି/ପିଡବ୍ଲ୍ୟୁବିଡି ବର୍ଗର ପ୍ରାର୍ଥୀଙ୍କ ପାଇଁ ୧୭୭ ଟଙ୍କା ଏବଂ ଅନ୍ୟ ସମସ୍ତ ବର୍ଗଙ୍କ ପାଇଁ ୧୧୮୦ ଟଙ୍କା ଧାର୍ଯ୍ୟ କରାଯାଇଛି। ଅଧିକ ବିବରଣୀ ପାଇଁ ବ୍ୟାଙ୍କର ୱେବସାଇଟ୍ ଦେଖନ୍ତୁ।
………
10.
ଖଲିସ୍ତାନୀଙ୍କ ନୂଆ ଷଡ଼ଯନ୍ତ୍ର, କାନାଡ଼ାରେ ଖୋଲିଲେ ନକଲି ଦୂତାବାସ
ଖଲିସ୍ତାନୀ ଆତଙ୍କବାଦୀମାନେ ଏକ ନୂଆ ଷଡ଼ଯନ୍ତ୍ର କରିଛନ୍ତି । ସେମାନେ କାନାଡ଼ାର ସରେରେ ଏକ ଦୂତାବାସ ଖୋଲିଛନ୍ତି, ଯାହାକି ନକଲି । ଏହାକୁ ସେମାନେ ରିପବ୍ଲିକ ଅଫ ଖଲିସ୍ତାନର ଦୂତାବାସ ଭାବେ ନାମକରଣ କରିଛନ୍ତି । ଏଭଳି ଖବର ମିଳିବା ମାତ୍ରେ ଭାରତର ବିଦେଶ ମନ୍ତ୍ରାଳୟ ଓ ଗୁଇନ୍ଦା ଏଜନ୍ସି ଗୁଡ଼ିକ ସତର୍କ ହୋଇଉଠିଛନ୍ତି । ଆତଙ୍କବାଦୀ ହରଦୀପ ସିଂହ ନିଜ୍ଜର ଏହି ଷଡ଼ଯନ୍ତ୍ରର ମୁଖ୍ୟ । ଭାରତ ପୂର୍ବରୁ ହରଦୀପକୁ ୱାଣ୍ଟେଡ ଆତଙ୍କବାଦୀ ଘୋଷଣା କରିସାରିଛି । ନିକଟରେ ଭାରତ ଓ କାନାଡ଼ା ପରସ୍ପର ମଧ୍ୟରେ ମତଭେଦକୁ ଦୂର କରି ସୁସମ୍ପର୍କ ପାଇଁ ଉଦ୍ୟମ ଆରମ୍ଭ କରିଛନ୍ତି । ଏଭଳି ସମୟରେ ଖଲାସ୍ତାନୀ ଏହାକୁ ପଣ୍ଡ କରିବାକୁ ଯୋଜନା କରିଛନ୍ତି ।
…
11.
ଜାତିସଂଘ ଟ୍ରୁପ କନକ୍ଲେଭକୁ ପାକିସ୍ତାନକୁ ନିମନ୍ତ୍ରଣ କଲାନାହିଁ ଭାରତୀୟ ସେନା
ଆସନ୍ତା ଅକ୍ଟୋବର ମାସରେ ଅନୁଷ୍ଠିତ ହେବ ୟୁନାଇଟେଡ ନେସନ୍ ଟ୍ରୁପ୍ କଣ୍ଟି୍ରିବୁ୍ୟଟର ଚିଫ୍ କନକ୍ଲେଭ । ଏହି କନକ୍ଲେଭକୁ ପାକିସ୍ତାନ ସେନା ଓ ଚୀନ୍ ସେନାକୁ ନିମନ୍ତ୍ରଣ କରିନାହିଁ ଭାରତୀୟ ସେନା । ଜାତିସଂଘ ଶାନ୍ତିରକ୍ଷା ମିସନରେ ସାମିଲ ଥିବା ଦେଶ ଗୁଡ଼ିକର ସେନାକୁ ଏହି ସମ୍ମିଳନୀକୁ ଡକାଯାଇଥାଏ । ଆଗାମୀ ଦିନରେ ପାକିସ୍ତାନ ସେନା ସହିତ ସମ୍ପର୍କ ନ ରଖିବା ବାର୍ତ୍ତା ଦେବାକୁ ଭାରତ ଏହି ପଦକ୍ଷେପ ନେଇଛି । ଏବେ ଜାତିସଂଘ ପକ୍ଷରୁ ବିଶ୍ୱର ପ୍ରାୟ ୧୧ଟି ସ୍ଥାନରେ ଶାନ୍ତି ମିସନ ଚାଲିଛି । ଏଥିରେ ୧୨୦ଟି ଦେଶର ସେନା ସାମିଲ ହୋଇଛନ୍ତି । ଭାରତୀୟ ସେନା ୯ଟି ମିସନରେ ସକ୍ରିୟ ଅଛନ୍ତି । ଏଥିରେ ଭାରତ ପକ୍ଷରୁ ପ୍ରାୟ ୫ ହଜାର ଯବାନଙ୍କୁ ମୁତୟନ କରାଯାଇଛି ।
…
12.
ବିହାର ପରେ ପଶ୍ଚିମବଙ୍ଗରେ ଆରମ୍ଭ ହେବ ଏସ୍ଆଇଆର, ନିର୍ବାଚନ କମିଶନ ଲେଖିଲେ ଚିଠି
ବିହାରରେ ଏବେ ନିର୍ବାଚନ କମିଶନଙ୍କ ପକ୍ଷରୁ ଚାଲିଛି ସ୍ପେଶାଲ ଇଣ୍ଟେନସିଭ୍ ରିଭିଜନ-ଏସଆଇଆର । ଏହାପରେ ପଶ୍ଚିମବଙ୍ଗରେ ଏହା ଆରମ୍ଭ କରିବାକୁ କମିଶନ ନିଷ୍ପତ୍ତି ନେଇଛନ୍ତି । ପଶ୍ଚିମବଙ୍ଗ ମୁଖ୍ୟ ସଚିବଙ୍କୁ ଚିଠି ଲେଖି କମିଶନ ଏ ସମ୍ପର୍କରେ ଅବଗତ କରାଇଛନ୍ତି । ରାଜ୍ୟ ନିର୍ବାଚନ ଅଧିକାରୀଙ୍କୁ ମତଦାତା ସୂଚୀର ପୁନଃନିରୀକ୍ଷଣ ଆରମ୍ଭ କରିବାକୁ କୁହାଯାଇଛି । ବିହାରରେ ଏବେ ଏହି ପ୍ରକ୍ରିୟା ଶେଷ ପର୍ଯ୍ୟାୟରେ ରହିଛି । ଏହା ଶେଷ ହେବା ବେଳକୁ ରାଜ୍ୟରେ ପ୍ରାୟ ୬୫ ଲକ୍ଷ ଭୋଟରଙ୍କ ନାମ ବାଦ ପଡ଼ିବା ସମ୍ଭାବନା ରହିଛି । ଅପରପକ୍ଷରେ ନିର୍ବାଚନ କମିଶନଙ୍କ ଏହି ପଦକ୍ଷେପକୁ ଦେଶର ବିରୋଧୀ ଦଳ ଗୁଡ଼ିକ ତୀବ୍ର ବିରୋଧ କରୁଛନ୍ତି । ସଂସଦରେ ମଧ୍ୟ ଏହା ବିରୋଧରେ ହଙ୍ଗାମା ଜାରି ରହିଛି ।
….
13.
ଆସନ୍ତା ଅଗଷ୍ଟ ୧୧ରେ ହେବ ମୁଖ୍ୟମନ୍ତ୍ରୀଙ୍କ ଜନ ଅଭିଯୋଗ ଶୁଣାଣି, ଆଜିଠୁ ଅନଲାଇନ ପଂଜିକରଣ
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆସନ୍ତା ୧୧ ତାରିଖରେ ଜନ ଅଭିଯୋଗ ଶୁଣାଣିରେ ଯୋଗଦେବେ । ୟୁନିଟ-୨, ଅଶୋକ ନଗର, ଭୁବନେଶ୍ୱର ସ୍ଥିତ ପୂର୍ବତନ ସରକାରୀ ପ୍ରାଥମିକ ବିଦ୍ୟାଳୟ ଠାରେ ଶୁଣାଣି ହେବ । ମୁଖ୍ୟମନ୍ତ୍ରୀ ସେଦିନ ପୂର୍ବାହ୍ନ ୧୧ଟାରୁ ଶୁଣାଣି ଆରମ୍ଭ କରିବେ । ଏହି ଅଭିଯୋଗ ଶୁଣାଣି ପାଇଁ ଅନଲାଇନ ପଂଜିକରଣ ଅଗଷ୍ଟ ୬ ତାରିଖ ପୂର୍ବାହ୍ନ ୧୧ଟାରୁ ଆରମ୍ଭ ହେବ । ସର୍ବାଧିକ ଏକ ହଜାର ଲୋକ ପଂଜିକରଣ କରିବା ପର୍ଯ୍ୟନ୍ତ ଏହା ଖୋଲା ରହିବ । ଆଗ୍ରହୀ ଜନସାଧାରଣ ଜନଶୁଣାଣି ପୋର୍ଟାଲ ଅଥବା ଜନଶୁଣାଣି ମୋବାଇଲ ଆପ୍ଲିକେସନ ମାଧ୍ୟରେ ପଂଜିକରଣ କରିପାରିବେ । ଜନସାଧାରଣ ପଂଜିକରଣ ପ୍ରାପ୍ତି ସ୍ୱୀକାରପତ୍ର ଏବଂବ ୍ୟକ୍ତିଗତ ପରିଚୟପତ୍ର ତଶ ନିଜର ଅଭିଯୋଗ ପତ୍ର ସହ ଧାର୍ଯ୍ୟ ହୋଇଥିବା ସ୍ଥାନରେ ପହଞ୍ଚିବାକୁ କୁହାଯାଇଛି ।
…
14.
ପାକିସ୍ତାନ ପାଇଁ ଗୁଇନ୍ଦାଗିରି କରୁଥିଲେ, ଗିରଫ ହେଲେ ଡିଆରଡିଓ କର୍ମଚାରୀ
ପାକିସ୍ତାନ ପାଇଁ ଗୁଇନ୍ଦାଗିରି କରିବା ଅଭିଯୋଗରେ ଗିରଫ । ରାଜସ୍ଥାନ ଜୈସାଲମେର ଠାରେ ଥିବା ଡିଆରଡିଓ ଗେଷ୍ଟ ହାଉସର ମ୍ୟାନେଜରଙ୍କୁ ଗିରଫ କରାଯାଇଛି । ସେ ଗତ ୫ ବର୍ଷ ଧରି ସେଠାରେ ଚାକିରି କରୁଛନ୍ତି । ପାକିସ୍ତାନର ଗୁଇନ୍ଦା ସଂସ୍ଥା ଆଇଏସଆଇକୁ ସେ ନିୟମିତ ଡିଆରଡିଓ ସଂକ୍ରାନ୍ତ ଗୁପ୍ତ ତଥ୍ୟ ପ୍ରଦାନ କରୁଥିଲେ । ପୁଲିସ ସନେ୍ଦହରେ ତାଙ୍କୁ ଗିରଫ କରି ଦୁଇଟି ମୋବାଇଲ ଫୋନ ଜବତ କରିଛି । ଜୈସାଲମେରରେ ପୋଖରାନ ଫାୟାରିଂ ରେଞ୍ଜ ରହିଛି । ଏଠାରେ ବିଭିନ୍ନ ପ୍ରକାର ମିସାଇଲ ଓ ଯୁଦ୍ଧାସ୍ତ୍ର ନିୟମିତ ପରୀକ୍ଷଣ ହେଉଛି ।
…
15.
ସାନ୍ତାଳୀ ପରମ୍ପରାରେ ହେଲା ଶିବୁ ସୋରେନଙ୍କ ଶେଷକୃତ୍ୟ, ହେମନ୍ତ ଦେଲେ ମୁଖାଗ୍ନି
ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଶିବୁ ସୋରେନଙ୍କୁ ଦିଆଯାଇଛି ବିଦାୟ । ସାନ୍ତାଳୀ ପରମ୍ପରା ଅନୁସାରେ ତାଙ୍କର ଶେଷକୃତ୍ୟ ହୋଇଥିଲା । ପୈତୃକ ଗ୍ରାମ ରାମଗଡ଼ ଜିଲ୍ଲାର ନେମରାଠାରେ ଏହା ସମ୍ପନ୍ନ ହୋଇଥିଲା । ତାଙ୍କ ଅନ୍ତିମ ଯାତ୍ରାରେ ରାଜନେତାଙ୍କ ଠାରୁ ଆରମ୍ଭ କରି ସାଧାରଣ ଲୋକେ ସାମିଲ ହୋଇଥିଲେ । ବିରୋଧୀ ଦଳ ନେତା ରାହୁଲ ଗାନ୍ଧୀ, କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ, ଆରଜେଡି ନେତା ତେଜସ୍ୱୀ ଯାଦବଙ୍କ ସମେତ ବହୁ ନେତା ସାମିଲ ହୋଇଥିଲେ । ଶିବୁ ସୋରେନ ଅମର ରହେ ନାରାରେ ଚତୁର୍ଦ୍ଦିଗ କମ୍ପିଥିଲା । ମଙ୍ଗଳବାର ସକାଳେ ରାଞ୍ଚିସ୍ଥିତ ତାଙ୍କ ବାସଭବନରେ ଲୋକମାନେ ମରଶରୀରକୁ ଦର୍ଶନ କରିଥିଲେ । ପାର୍ଥିବ ଶରୀରକୁ ବିଧାନସଭା ପରିସରରେ ମଧ୍ୟ ଶ୍ରଦ୍ଧାଞ୍ଜଳି ଦିଆଯାଇଥିଲା । ତାଙ୍କ ବଡ଼ପୁଅ ତଥା ମୁଖ୍ୟମନ୍ତ୍ରୀ ହେମନ୍ତ ସୋରେନ ମୁଖାଗ୍ନି ଦେଇଥିଲେ ।
…
16.
ଉତ୍ତରାଖଣ୍ଡରେ ବାଦଲଫଟା ବର୍ଷା; ଭାସିଗଲା ଗାଁ, ୧୦ ମୃତ, ଅନେକ ନିଖୋଜ
ପ୍ରଳୟ ସୃଷ୍ଟି କରିଛି ବାଦଲଫଟା ବର୍ଷା । ଧ୍ୱଂସଲୀଳାରେ ଅନେକଙ୍କ ଜୀବନ ଯାଇଛି, ବହୁତ ଅଛନ୍ତି ନିଖୋଜ । ଉତ୍ତରକାଶୀର ଧରାଲି ଗ୍ରାମ ଉପରେ ପଡ଼ିଛି ଏହି ଭୟଙ୍କର ବିପତ୍ତି । ଡେରାଡୁନଠାରୁ ୨୧୮ ଓ ଗଙ୍ଗୋତ୍ରୀ ଠାରୁ ୧୦ କିମି ଦୂରରେ ଅବସ୍ଥିତ ଏହି ଗ୍ରାମ । ବାଦଲଫଟା ବର୍ଷା ଯୋଗୁ ସୁଖୀ ଟପ୍ ରୁ କାଦୁଆ ମିଶା ବର୍ଷା ପାଣିର ସ୍ରୋତ ମାଡ଼ି ଆସିଥିଲା । ଖୀର ଗଙ୍ଗା ନଦୀରେ ପ୍ରବଳ ବନ୍ୟା ଆସିଥିଲା । ମାତ୍ର କେଇ ସେକେଣ୍ଡରେ ସମ୍ପୂର୍ଣ୍ଣ ଗ୍ରାମକୁ ଭସାଇ ନେଇଥିଲା । ଲୋକମାନେ ପ୍ରାଣ ବିକଳରେ ଧାଁ ଦଉଡ଼ କରିବାର ଭିଡିଓ ଏବେ ଭାଇରଲ ହୋଇଛି । କାଦୁଅ ମଧ୍ୟରେ ଅନେକ ପୋତି ହୋଇ ରକ୍ଷା ପାଇବାକୁ ଆକୁଳ ଚିକ୍ରାର କରୁଥିଲେ । ଏହି ଅଘଟଣରେ ୧୦ ଜଣଙ୍କ ମୃତୁ୍ୟ ହୋଇଥିବା ବେଳେ ଶତାଧିକ ନିଖୋଜ ଥିବା କୁହାଯାଉଛି । ସେନା କ୍ୟାମ୍ପରୁ କେତେକ ଯବାନ ଭାସିଯାଇଥିବା ଅନୁମାନ କରାଯାଉଛି ।
…
17.
ସୁପ୍ରିମକୋର୍ଟରେ ଜମ୍ମୁ-କାଶ୍ମୀର ରାଜ୍ୟ ମାନ୍ୟତା ପିଟିସନ, ଆସନ୍ତା ୮ରେ ଶୁଣାଣି
ଜମ୍ମୁ-କାଶ୍ମୀରକୁ ପୂର୍ଣ୍ଣ ରାଜ୍ୟ ମାନ୍ୟତା ପାଇଁ ଦାବି କରାଯାଇଛି । ଏହି ଦାବିରେ ସୁପ୍ରିମକୋର୍ଟରେ ଏକ ପିଟିସନ ଦାଖଲ ହୋଇଛି । ଏଥିପାଇଁ କେନ୍ଦ୍ର ସରକାରଙ୍କୁ ନିଦେ୍ର୍ଦଶ ଦବୋକୁ ପିଟିସନରେ ଅନୁରୋଧ କରାଯାଇଛି । ଦୀର୍ଘଦିନ ଧରି ରାଜ୍ୟ ମାନ୍ୟତାରୁ ବଂଚିତ କରାଯାଉଥିବାରୁ ନାଗରିକ ଅଧିକାରର ଉଲ୍ଲଂଘନ ହେଉଥିବା ପିଟିସନରେ ଦର୍ଶାଯାଇଛି । ଜମ୍ମ-କାଶ୍ମୀରର ପ୍ରଫେସର ଜହୁର ଅହମ୍ମଦ ଭଟ୍ଟ ଏବଂ ସାମାଜିକ କର୍ମୀ ଖୁର୍ସିଦ ଅହମ୍ମଦ ମଲିକଙ୍କ ପକ୍ଷରୁ ପିଟିସନ ଆଗତ ହୋଇଛି । ପ୍ରଧାନ ବିଚାରପତି ଜଷ୍ଟିସ ବି.ଆର. ଗଭଇଙ୍କ ନିକଟରେ ମାମଲା ଉଠିଥିଲା । ଏହାର ଶୁଣାଣି ଅଗଷ୍ଟ ୮ ତାରିଖରେ କରାଯିବା ସକାଶେ ଧାର୍ଯ୍ୟ ହୋଇଛି ।
…
18.
ବ୍ରାଜିଲର ପୂର୍ବତନ ରାଷ୍ଟ୍ରପତି ବୋଲସୋନାରୋ ଗୃହବନ୍ଦୀ, ବିଦ୍ରୋହ ଷଡ଼ଯନ୍ତ୍ର ଅଭିଯୋଗ
ବ୍ରାଜିଲର ପୂର୍ବତନ ରାଷ୍ଟ୍ରପତି ଜାଏର ବୋଲସୋନାରୋଙ୍କୁ ଗୃହବନ୍ଦୀ ରଖାଯାଇଛି । ସୁପ୍ରିମକୋର୍ଟଙ୍କ ନିଦେ୍ର୍ଦଶରେ ଏହି ପଦକ୍ଷେପ ନିଆଯାଇଛି । ୨୦୨୨ ମସିହାରେ ଜାଏର ନିର୍ବାଚନରେ ପରାଜିତ ହୋଇଥିଲେ । ଏହା ପରେ ସେ କ୍ଷମତା ପରିବର୍ତ୍ତନ ପାଇଁ ସେନା ସହାୟତାରେ ବିଦ୍ରୋହ ଷଡ଼ଯନ୍ତ୍ର କରିଥିଲେ । ତାଙ୍କର ୩ ସାଂସଦ ପୁଅଙ୍କ ସହାୟତାରେ ସୋସିଆଲ ମିଡିଆରେ ଆଇନ ଉଲ୍ଲଂଘନକାରୀ ପୋଷ୍ଟ କରିଥିଲେ । ଏପରିକି ସେ ସୁପ୍ରିମକୋର୍ଟ ଉପରେ ଆକ୍ରମଣ, ରାଷ୍ଟ୍ରପତି ଲୁଲା ଡା ସିଲଭାଙ୍କ ହତ୍ୟା ଯୋଜନା କରିଥିବା ଅଭିଯୋଗ ହୋଇଥିଲା । ଜାଏର ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ନିକଟତର ବୋଲି କୁହାଯାଏ । ତାଙ୍କ ବିରୋଧରେ କାର୍ଯ୍ୟାନୁଷ୍ଠାନକୁ ଟ୍ରମ୍ପ ସମାଲୋଚନା କରିଛନ୍ତି ।
…
19.
ପୁଣି ଧମକାଇଲେ ଟ୍ରମ୍ପ, ୨୪ ଘଣ୍ଟାରେ ଭାରତ ଉପରେ ଆହୁରି ବଢ଼ିବ ଶୁଳ୍କ
ପୁଣି ଭାରତକୁ ଧମକାଇଲେ ଟ୍ରମ୍ପ । ଭାରତ ଉପରେ ବଢ଼ା ଶୁଳ୍କ ଘୋଷଣା ହେବ । ୨୪ ଘଣ୍ଟା ମଧ୍ୟରେ ସେ ଏହି ଘୋଷଣା କରିବେ । ପୂର୍ବରୁ ୨୫ ପ୍ରତିଶତ ଶୁଳ୍କ ଘୋଷଣା କରାଯାଇଥିଲା । ଏହାକୁ ଆହୁରି ବଢ଼ାଇ ଦିଆଯିବ । ରୁଷରୁ ତୈଳ ସମେତ ବିଭିନ୍ନ ସାମଗ୍ରୀ ଭାରତ ଆମଦାନି କରୁଥିବାରୁ ଟ୍ରମ୍ପ ଏହାକୁ ବିରୋଧ କରିଛନ୍ତି । ୟୁକ୍ରେନ ଯୁଦ୍ଧ ବନ୍ଦ କରିବାକୁ ରୁଷ ଉପରେ ଭାରତ ଚାପ ପକାଉ ବୋଲି ଟ୍ରମ୍ପ ଚାହୁଁଛନ୍ତି । କିନ୍ତୁ ଆମେରିକା ସମ୍ମୁଖରେ ଭାରତ ମୁଣ୍ଡ ନୁଆଁଇବାକୁ ପ୍ରସ୍ତୁତ ନାହିଁ । ବରଂ ଆମେରିକା ଓ ୟୁରୋପୀୟ ସଂଘ ରୁଷ ପ୍ରସଙ୍ଗରେ ଦୋମୁହାଁ ନୀତି ଧରୁଥିବା ଭାରତ ଖୋଲାଖୋଲି ଅଭିଯୋଗ କରିଛି ।
…
20
ବିଶ୍ୱ କୁସ୍ତି ଚାମ୍ପିଅନସିପ୍, ଭାଗ ନେବେ ଭାରତର ୩୦ ଜଣିଆ ଦଳ
କ୍ରୋଏସିଆର ଜାଗ୍ରେବ ଠାରେ ଆଗାମୀ ସେପ୍ଟେମ୍ବର ୧୩ରୁ ୨୧ ପର୍ଯ୍ୟନ୍ତ ହେବ ବିଶ୍ୱ କୁସ୍ତି ଚାମ୍ପିଅନସିପ୍ । ଭାରତ ଏଥିପାଇଁ ୩୦ ଜଣିଆ ଦଳ ଘୋଷଣା କରଛି । ଭାରତୀୟ ଟିମର ନେତୃତ୍ୱ ନେବେ ପ୍ୟାରିସ ଅଲିମ୍ପିକ ବ୍ରୋଞ୍ଜ ପଦକ ବିଜେତା ଅମନ ସେହରାୱତ ଏବଂ ଯୁବ କୁସ୍ତିଯୋଦ୍ଧା ଅନ୍ତିମ ପଂଘାଲ । ଦଳରେ ଏସୀୟ ଚାମ୍ପିଅନ ମନିଷା ଭାନୱାଲ, ସୁଜିତ କଲକଲ, ଦୀପକ ପୁନିଆ, ଅଙ୍କୁଶ, ତପସ୍ୟା, ନେହା ସାଙ୍ଗୱାନ, ଅନିଲ ମୋର, ବୈଷ୍ଣବୀ ପାଟିଲ ପ୍ରମୁଖ ସ୍ଥାନ ପାଇଛନ୍ତି ।
…
21.
ଚାଟ୍ଜିପିଟି ବୁଝିବ ଉପଭୋକ୍ତାଙ୍କ ମାନସିକ ସ୍ଥିତି, ଦେବ ସଠିକ୍ ପରାମର୍ଶ
ଓପେନଏଆଇ ତା’ର ଆର୍ଟିଫିସିଆଲ୍ ଇଣ୍ଟେଲିଜେନ୍ସ (ଏଆଇ) ଚାଟ୍ବଟ୍, ଚାଟ୍ଜିପିଟିରେ ଏକ ବଡ଼ ପରିବର୍ତ୍ତନ ଆଣିବାକୁ ଯାଉଛି। ଏହି ନୂଆ ଅପଡେଟ୍ ଦ୍ୱାରା ଚାଟ୍ଜିପିଟି ଉପଭୋକ୍ତାଙ୍କ ମାନସିକ ଚାପ ବା ଦୁଶ୍ଚିନ୍ତାର ସଙ୍କେତକୁ ଚିହ୍ନଟ କରିପାରିବ। ଏହି ପରିବର୍ତ୍ତନ ପରେ ଯଦି କେହି ମାନସିକ ସମସ୍ୟା ବିଷୟରେ ପଚାରନ୍ତି, ତେବେ ଚାଟ୍ବଟ୍ ସେମାନଙ୍କୁ ସଠିକ୍ ପରାମର୍ଶ ଦେବା ସହ ଜରୁରୀ ସହାୟତା ପାଇଁ ଉପଯୁକ୍ତ ସମ୍ବଳର ତଥ୍ୟ ମଧ୍ୟ ଦେବ। ଏହାଛଡ଼ା, ବ୍ୟକ୍ତିଗତ ଗୁରୁତ୍ୱପୂର୍ଣ୍ଣ ପ୍ରଶ୍ନର ସିଧାସଳଖ ଉତ୍ତର ନଦେଇ, ଏହା ଉପଭୋକ୍ତାଙ୍କୁ ନିଷ୍ପତ୍ତି ନେବାରେ ସାହାଯ୍ୟ କରିବ।
ଅଧିକ ସମୟ ଚାଟିଂ କଲେ ଏହା ବିରତି ନେବା ପାଇଁ ମଧ୍ୟ ମନେ ପକାଇଦେବ। ଲୋକମାନେ ଏଆଇକୁ ଥେରାପି ପାଇଁ ବ୍ୟବହାର କରୁଥିବାରୁ ଏହି ପଦକ୍ଷେପ ନିଆଯାଇଛି।
…
22.
ମୋଦିଙ୍କୁ ଭେଟିଲେ ଫିଲିପାଇନ୍ସ ରାଷ୍ଟ୍ରପତି, ବିଭିନ୍ନ ପ୍ରସଙ୍ଗରେ ହେଲା ଆଲୋଚନା
ଭାରତ ଗସ୍ତରେ ଆସିଛନ୍ତି ଫିଲିପାଇନ୍ସ ରାଷ୍ଟ୍ରପତି ଫର୍ଡିନାଣ୍ଡ ମାର୍କୋସ ଜୁନିଅର । ମଙ୍ଗଳବାର ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭେଟିଥିଲେ । ଏହି ଅବସରରେ ବାଣିଜ୍ୟ, ପ୍ରତିରକ୍ଷା, ଆଞ୍ଚଳିକ ସୁରକ୍ଷା ଆଦି ପ୍ରସଙ୍ଗରେ ଆଲୋଚନା ହୋଇଥିଲା । କେତେକ କ୍ଷେତ୍ରରେ ଦୁଇ ଦଶେ ମଧ୍ୟରେ ବୁଝାମଣା ପତ୍ର ସ୍ୱାକ୍ଷର ହୋଇଥିଲା । ଦ୍ୱିପାକ୍ଷିକ ବାଣିଜ୍ୟ ବୃଦ୍ଧି କରିବାକୁ ଉଭୟ ନେତା ସହମତ ହୋଇଥିଲେ । ଫିଲିପାଇନ୍ସ ଭାରତୀୟ ପର୍ଯ୍ୟଟକଙ୍କ ପାଇର୍ ଭିସାମୁକ୍ତ ନୀତି ଘୋଷଣା କରିଥିବାରୁ ମୋଦି ଧନ୍ୟବାଦ ଜଣାଇଥିଲେ । ଫିଲିପାଇନ୍ସ ପର୍ଯ୍ୟଟକଙ୍କ ପାଇଁ ଭାରତ ମଧ୍ୟ ଭିସା ମୁକ୍ତ ନୀତି ଗ୍ରହଣ କରିବ ବୋଲି ମୋଦି ଘୋଷଣା କରିଥିଲେ । ୨୦୨୪ରେ ହୁତି ବିଦ୍ରୋହୀଙ୍କ ଆକ୍ରମଣରୁ ଫିଲିପାଇନ୍ସ ନାଗରିକଙ୍କୁ ଉଦ୍ଧାର କରିଥିବାରୁ ଭାରତୀୟ ନୌସେନାକୁ ମାର୍କୋସ କୃତଜ୍ଞତା ଜଣାଇଥିଲେ ।
…
23.
ଦୁଇଟି ମେଡିକାଲ କଲେଜରେ ୨ ଶହ ସିଟ୍ ବୃଦ୍ଧି ପାଇଁ କେନ୍ଦ୍ରକୁ ରାଜ୍ୟର ଅନୁରୋଧ
ରାଜ୍ୟ ସ୍ୱାସ୍ଥ୍ୟ ମନ୍ତ୍ରୀ ଡ.ମୁକେଶ ମହାଲିଙ୍ଗ ଦିଲ୍ଲୀରେ ସ୍ୱାସ୍ଥ୍ୟମନ୍ତ୍ରୀ ଜେପି ନଡ୍ଡାଙ୍କୁ ଭେଟିଛନ୍ତି । ରାଜ୍ୟର ଦୁଇଟି ମେଡିକାଲ କଲେଜରେ ୨ଶହ ଏମବିବିଏସ ସିଟ୍ ବଢ଼ାଇବାକୁ ସେ ଅନୁରୋଧ କରିଛନ୍ତି । ୨୦୨୫-୨୬ ଶିକ୍ଷାବର୍ଷରେ ନାମ ଲେଖା ପାଇଁ ଅନୁମତି ଦେବାକୁ ଅନୁରୋଧ କରାଯାଇଛି । ଏହି ଦୁଇଟି ମେଡିକାଲ କଲେଜ ହେଲା ତାଳଚେରର ପବିତ୍ର ମୋହନ ପ୍ରଧାନ ମେଡିକାଲ କଲେଜ ଏବଂ ଫୁଲବାଣୀ ସରକାରୀ ମେଡିକାଲ କଲେଜ । ଦୁଇ ଅନୁଷ୍ଠାନ ପକ୍ଷରୁ ଗତ ଜାନୁଆରୀ ୧୮ ତାରିଖରେ ନ୍ୟାସନାଲ ମେଡିକାଲ କମିଶନ ପୋର୍ଟାଲ ମାଧ୍ୟମରେ ଏଥିପାଇଁ ଆବେଦନ କରାଯାଇଥିଲା ।
…
24.
ମଣିପୁରରେ ରାଷ୍ଟ୍ରପତି ଶାସନ ଅବଧି ଆଉ ୬ ମାସ ବଢ଼ିଲା
ମଣିପୁରରେ ଆଉ ୬ ମାସ ବୃଦ୍ଧି ହୋଇଛି ରାଷ୍ଟ୍ରପତି ଶାସନର ଅବଧି । ମଙ୍ଗଳବାର ରାଜ୍ୟସଭାରେ ବାଚନିକ ଭୋଟରେ ଏହି ପ୍ରସ୍ତାବ ଗୃହୀତ ହୋଇଛି । ରାଜ୍ୟସଭାରେ ଏହି ପ୍ରସ୍ତାବ ଆଗତ କରିଥିଲେ ଗୃହ ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟ । ଏହି ଅବସରରେ ସେ କହିଥିଲେ, ଗତ ଫେବ୍ରୁଆରୀ ୧୩ରୁ ରାଜ୍ୟରେ ରାଷ୍ଟ୍ରପତି ଶାସନ ଜାରି ହେବା ପରେ ମାତ୍ର ଗୋଟିଏ ହିଂସା ହୋଇଛି । ଏଥିରେ ଜଣେ ପ୍ରାଣ ହରାଇଥିଲେ । ଇତି ମଧ୍ୟରେ ଏହି ପ୍ରସ୍ତାବ ଗତ ଜୁନ୍ ୩୦ରେ ଲୋକସଭାରେ ଗୃହୀତ ହୋଇସାରିଛି । ସଂସଦର ଉଭୟ ଗୃହରେ ଏହା ଗୃହୀତ ହୋଇଥିବାରୁ ଆସନ୍ତା ୧୩ ତାରିଖରୁ ଲାଗୁ ହେବ ।
…
25.
ବାଂଲାଦେଶରେ ପରାମର୍ଶଦାତା ୟୁନୁସ ହଟିବେ, ୨୦୨୬ ଫେବ୍ରୁଆରୀରେ ନିର୍ବାଚନ
ବାଂଲାଦେଶରେ ଆଗାମୀ ୨୦୨୬ ଫେବ୍ରୁଆରୀରେ ନିର୍ବାଚନ ହେବ । ଏହି ସୂଚନା ଦେଇଛନ୍ତି ଦେଶର ମୁଖ୍ୟ ପରାମର୍ଶଦାତା ମହମ୍ମଦ ୟୁନୁସ । ଏହା ହେବ ଦେଶର ୧୩ତମ ସଂସଦୀୟ ନିର୍ବାଚନ । ଏହା ଦେଶର ଗଣତାନ୍ତ୍ରିକ ପ୍ରକ୍ରିୟାରେ ଏକ ମାଇଲଖୁଣ୍ଟ ହେବ ବୋଲି ସେ କହିଛନ୍ତି । ଖୁବ ଶୀଘ୍ର ସେ ମୁଖ୍ୟ ନିର୍ବାଚନ କମିଶନରଙ୍କୁ ଏ ନେଇ ଚିଠି ପଠାଇବେ । ଥରେ ସରକାର ନିର୍ବାଚିତ ହୋଇଲେ ଅନ୍ତରୀଣ ସରକାର ଓ ସେ ନିଜେ ଦାୟିତ୍ୱରୁ ଓହରିଯିବେ ବୋଲି ୟୁନୁସ କହିଛନ୍ତି । ୨୦୨୬ ଫେବ୍ରୁଆରୀରେ ପରବର୍ତ୍ତୀ ରମଜାନ ଆରମ୍ଭ ହେବା ପୂର୍ବରୁ ନିର୍ବାଚନ ପାଇଁ ଉପଯୁକ୍ତ ସମୟ ବୋଲି ୟୁନୁସ କହିଛନ୍ତି ।
…
26.
ବଦଳିବ ଶ୍ରୀମନ୍ଦିର ଆଇନ, ସୁରକ୍ଷା ଉଲ୍ଲଂଘନରେ ମିଳିବ କଠୋର ଦଣ୍ଡ
ଶ୍ରୀମନ୍ଦିର ଆଇନ ସଂଶୋଧନ ପାଇଁ ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଯିବ । ଏହା କହିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସନ ଅରବିନ୍ଦ ପାଢ଼ୀ । ମଙ୍ଗଳବାର ଏ ନେଇ ଗୁରୁତ୍ୱପୂର୍ଣ୍ଣ ବୈଠକ ବସିଥିଲା । ବିଶେଷ କରି ଶ୍ରୀମନ୍ଦିର ସୁରକ୍ଷାକୁ ଦୃଷ୍ଟିରେ ରଖି ଏହି ସଂଶୋଧନ କରାଯିବ । ଶ୍ରୀମନ୍ଦିର ଭିତରେ ମୋବାଇଲ ଫୋନ୍ ବ୍ୟବହାର, ସୋସିଆଲ ମିଡିଆରେ ଶ୍ରୀମନ୍ଦିର ଗାରିମା କ୍ଷୁଣ୍ଣ ହେବା ଭଳି ପୋଷ୍ଟ କିମ୍ବା ମନ୍ଦିର ଉପରେ ଡ୍ରୋନ ଉଡ଼ାଇଳେ କଠୋର ଦଣ୍ଡ ମିଳିବ । ଶ୍ରୀମନ୍ଦିର ପରିଚାଳନା କମିଟି ପରାମର୍ଶ କ୍ରମେ ଏହି ଦଣ୍ଡବିଧାନର ବ୍ୟବସ୍ଥା ରହିବ । ଜାମିନ ବିହୀନ ଗିରଫ ପରୱାନା ଏବଂ ୩ ବର୍ଷ ପର୍ଯ୍ୟନ୍ତ ଜେଲ ଦଣ୍ଡ ପର୍ଯ୍ୟନ୍ତ ଦଣ୍ଡର ବ୍ୟବସ୍ଥା ରଖିବାକୁ ଆଲୋଚନା ହୋଇଛି ।
…
27.
ଟ୍ରମ୍ପଙ୍କ କଟକଣା ଯୋଗୁ ଭାରତୀୟ ଔଷଧ କମ୍ପାନିଙ୍କ ଉପରେ ପଡ଼ିବ ପ୍ରଭାବ
ଭାରତୀୟ ଫାର୍ମା କମ୍ପାନିଙ୍କ ଉପରେ ଶୁଳ୍କ ବଢ଼ାଇବାକୁ ପରୋକ୍ଷରେ ଚେତାବନୀ ଦେଇଛନ୍ତି ଟ୍ରମ୍ପ । ଏକ ସାକ୍ଷାତକାରରେ ସେ କହିଛନ୍ତି, ପ୍ରାରମ୍ଭିକ ଭାବେ ଏହି ଶୁଳ୍କ କ୍ଷୁଦ୍ର ପରିମାଣ ରହିପାରେ । କିନ୍ତୁ ପର୍ଯ୍ୟାୟ କ୍ରମେ ଏହା ବୃଦ୍ଧି ପାଇବ । ଏହା କିଛିଦିନ ପରେ ୧୫୦ ପ୍ରତିଶତ ଏବଂ ତା’ ପରେ ୨୫୦ ପ୍ରତିଶତକୁ ଛୁଇଁପାରେ । ଗତ ଜୁଲାଇ ମାସରେ ଟ୍ରମ୍ପ ଭାରତୀୟ ଫାର୍ମା ଉପରେ ୨୦୦ ପ୍ରତିଶତ ଶୁଳ୍କ ଧମକ ଦେଇଥିଲେ । ଆମେରିକାରେ ଔଷଧ ଉତ୍ପାଦନ ବଢ଼ାଇବା ପାଇଁ ଟ୍ରମ୍ପ ଏହି ଯୋଜନା କରିଥିବା କୁହାଯାଉଛି ।
…
28.
ଅସ୍ତ୍ରତ୍ୟାଗ କରିବାକୁ ମନା କଲା ହିଜବୁଲ୍ଲା, ଯୁଦ୍ଧ ଜାରି ରଖିବ
ଆତଙ୍କୀ ସଙ୍ଗଠନ ହିଜବୁଲ୍ଲାକୁ ନିରସ୍ତ୍ର କରିବାକୁ ଆମେରିକା ଓ ଇସ୍ରାଏଲ ଯୋଜନା କରିଥିଲେ । ଏହାକୁ ଯୁଦ୍ଧବିରତି ପାଇଁ ରାଜି କରାଇବାକୁ ଲେବାନନ ଉପରେ କ୍ରମାଗତ ଚାପ ପକାଉଥିଲେ । ବଦଳରେ ହିଜବୁଲ୍ଲା ଏକ ରାଜନୈତିକ ଦଳ ଭାବେ ମାନ୍ୟତା ପାଉ ବୋଲି ପରାମର୍ଶ ଦେଉଥିଲେ । କିନ୍ତୁ ହିଜବୁଲ୍ଲା ଏଭଳି ପ୍ରସ୍ତବାକୁ ରୋକଠୋକ ପ୍ରତ୍ୟାଖ୍ୟାନ କରିଛି । ହିଜବୁଲ୍ଲା ସ୍ପଷ୍ଟ କରିଛି, ଇସ୍ରାଏଲ ଦକ୍ଷିଣ ଲେବାନନରୁ ସୈନ୍ୟ ପ୍ରତ୍ୟାହାର ନ କରିବା ପର୍ଯ୍ୟନ୍ତ ଅସ୍ତ୍ରତ୍ୟାଗର ସମ୍ଭାବନା ନାହିଁ । ବାକି ଥିବା ୫ଟି ବିବାଦୀୟ ସ୍ଥାନ ଉପରେ ମଧ୍ୟ ତୁରନ୍ତ ନିଷ୍ପତ୍ତି ଆବଶ୍ୟକ । ସୋମବାର ରାତିରେ ବିଭିନ୍ନ ସ୍ଥାନରେ ହିଜବୁଲ୍ଲା ପକ୍ଷରୁ ବାଇକ ରାଲି କରାଯାଇ ନିଜର ନିଷ୍ପତ୍ତି ଶୁଣାଯାଇଥିଲା ।
…
29.
ଦିଲ୍ଲୀ ଗସ୍ତରେ ଗଲେ ମୁଖ୍ୟମନ୍ତ୍ରୀ ଓ ରାଜ୍ୟ ବିଜେପି ସଭାପତି
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଦିଲ୍ଲୀ ଗସ୍ତରେ ଯାଇଛନ୍ତି । ତାଙ୍କର ସହ ବିଜେପି ରାଜ୍ୟ ସଭାପତି ମଧ୍ୟ ଦିଲ୍ଲୀ ଗସ୍ତରେ ଯାଇଛନ୍ତି । ଗସ୍ତ ଅବସରରେ ମୁଖ୍ୟମନ୍ତ୍ରୀ ଓଡ଼ିଶାର ସ୍ୱାର୍ଥ ସମ୍ବଳିତ ବିଭିନ୍ନ ପ୍ରସଙ୍ଗରେ କେତେକ କେନ୍ଦ୍ର ମନ୍ତ୍ରୀଙ୍କ ସହ ଆଲୋଚନା କରିବେ । ଗୁରୁବାର ମୁଖ୍ୟମନ୍ତ୍ରୀ ପ୍ରତ୍ୟାବର୍ତ୍ତନ କରିବାର କାର୍ଯ୍ୟକ୍ରମ ରହିଛି । ଶ୍ରୀ ସାମଲ ଦିଲ୍ଲୀରେ କେନ୍ଦ୍ରୀୟ ନେତୃତ୍ୱଙ୍କୁ ଭେଟି ତାଙ୍କ ନୂଆ ଟିମ୍ ଗଠନ ସମ୍ପର୍କରେ ଆଲୋଚନା କରିପାରନ୍ତି ।
..
30
କ୍ରାଇମବ୍ରାଞ୍ଚ ଦ୍ୱାରା ଗିରଫ ପରେ ନିଲମ୍ବିତ ହେଲେ ବୋର୍ଡ ଉପସଭାପତି ନିହାର ମହାନ୍ତି
ଓଟିଇଟି ପ୍ରଶ୍ନପତ୍ର ଲିକ୍ ମାମଲାରେ ଗିରଫ ହୋଇଛନ୍ତି ବୋର୍ଡ ଉପସଭାପତି ଡ. ନିହାର ରଞ୍ଜନ ମହାନ୍ତି ନିଲମ୍ବିତ ହୋଇଛନ୍ତି । ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ କରିଛନ୍ତି ରାଜ୍ୟ ସରକାର । ନିହାରଙ୍କ ସମେତ ମୋଟ ୮ ଜଣ ଏହି ମାମଲାରେ ଗିରଫ ହୋଇଛନ୍ତି । ଗିରଫ ହୋଇଥିବା ଜଣେ ଶିକ୍ଷକଙ୍କୁ ମଧ୍ୟ ସରକାର ନିଲମ୍ବିତ କରିଛନ୍ତି । ପ୍ରଶ୍ନପତ୍ର ଲିକ୍ ବାବଦରେ ଅଧିକ ତଥ୍ୟ ପାଇବାକୁ କ୍ରାଇମବ୍ରାଞ୍ଚ ସମସ୍ତଙ୍କୁ ରିମାଣ୍ଡରେ ଆଣିବାକୁ ଯୋଜନା କରିଛି ।
About the Author
